Galuega 14 - Samoan Contemporary New Testament

‘Ua o‘o i Ikonio

1Sa i ai i lā‘ua i Ikonio, ma sa ulufale fa‘atasi i le sunako o tagata Iutaia; na ‘avea ‘upu na tautala atu ai i lā‘ua ma ala e fa‘atuatua ai tagata e to‘atele o Iutaia ma Eleni.

2Peita‘i o tagata Iutaia lē fa‘atuatua, ‘ua fa‘aoso ma fa‘aita e i latou loto o tagata o Nu‘u ‘ese i le au uso.

3O le mea lea ‘ua nonofo ai pea i lā‘ua i se taimi umi, ma tautala atu i le afioga a le Ali‘i ma le lototele, ‘ua molimau mai o ia i le ‘upu o lona alofa tunoa, ma ‘ua tu‘uina mai fa‘ailoga ma mea ofoofogia e faia i o la lima.

4‘Ua vaeluaina fo‘i tagata o le ‘a‘ai; o isi ‘ua au ma tagata Iutaia, a o isi ‘ua au ma le ‘au ‘aposetolo.

5‘Ua taupulepule fo‘i tagata o Nu‘u ‘ese ‘atoa ma Iutaia, ma o latou ali‘i, e fa‘asauā ma fetogi ‘iā te i lā‘ua i ma‘a.

6Na iloa lea mea e i lā‘ua, ‘ona la sosola ai lea i Lusa ma Teipe, o ‘a‘ai ia o Lukaonia ma nu‘u e tuā‘oi ai;

7ma ‘ua folafola atu fo‘i e i lā‘ua le Tala Lelei.

‘Ua o‘o i Lusa ma Teipi

8Sa nofo i Lusa le tagata pipili, na fānau mai lava o ia o pipili, e le‘i savali lava.

9‘Ua fa‘alogo mai lenei tagata ‘iā Paulo a o tautala atu; ‘ua pulato‘a atu fo‘i Paulo ‘iā te ia, ma iloa ai ‘ua ‘iā te ia le fa‘atuatua e fa‘amālōlōina ai.

10‘Ona tautala leotele atu lea o Paulo ‘iā te ia, “Tu sa‘o ia i luga ou vae.” ‘Ona tula‘i lea o ia ma savali.

11‘Ua iloa fo‘i e tagata e to‘atele le mea ‘ua faia e Paulo, ‘ona ‘alalaga ai lea o i latou i le gagana a Lukaonia, ma fai ane, “ ‘Ua afio mai atua ‘iā te i tatou e pei ni tagata.”

12‘Ua fa‘aigoa e i latou Panapa ia Seu; a o Paulo ia Hereme, auā o ia o le failauga sili.

13A o le ositaulaga a Seu, e i ai lona malumalu i luma tonu o le ‘a‘ai, ‘ua ‘aumaia e ia povi po‘a ma pale i faitoto‘a, o le a osi le taulaga e ia fa‘atasi ma tagata e to‘atele.

14‘Ua fa‘alogo i ai ‘aposetolo o Panapa ma Paulo, ‘ona saeia lea e i lā‘ua o la ‘ofu, ma feosofi atu i tagata, ma ‘alalaga,

15‘ua fai atu, “Ali‘i e, ‘ua ‘outou faia aiseā nei mea? O i mā‘ua o tagata e pei lava o ‘outou, o lo‘o ma tala‘iina atu le Tala Lelei ‘iā te ‘outou. ‘Ia ‘outou lafoa‘iina nei mea lē aogā, ‘ae liliu atu i le Atua soifua o lē na faia le lagi ma le lalolagi, ma le sami ma mea uma o i ai.Eso 20.11; Sala 146.6

16Sa fa‘atagaina e ia tagata e savavali i o latou lava ala i tupulaga ‘ua mavae.

17E ui lava i lea, sa le‘i tāofia e ia ana molimau; auā sa faia pea e ia mea lelei, ma foa‘i mai le timu mai le lagi ‘iā te i tatou, ‘atoa ma taimi o fuata, ma ‘ua fa‘amalilieina ai o tatou loto i mea‘ai ma le fiafia.”

18A o fai atu nei ‘upu, ‘ua tau lē mafai ‘ona vavao tagata e ‘aua le osia mai le taulaga ‘iā te i lā‘ua.

19A ‘ua ō mai tagata Iutaia mai Anetioka ma Ikonio, ma ‘ua fa‘aoso atu i tagata, ma fetogi Paulo i ma‘a; ‘ona toso ai lea o ia e i latou i tua o le ‘a‘ai, ma le manatu ai ‘ua oti o ia.

20‘Ua potopoto mai so‘o, ‘ua si‘omia o ia, ‘ona tula‘i lea o ia ma alu i le ‘a‘ai; o le taeao fo‘i na ō atu ai i lā‘ua ma Panapa i Teipe.

‘Ua Toe Fo‘i i Anetioka i Suria

21‘Ua uma ‘ona tāla‘i atu e Paulo ma Panapa le Tala Lelei i Teipe, e to‘atele fo‘i ‘ua ‘avea ma so‘o, ‘ona toe fo‘i lea o i lā‘ua i Lusa ma Ikonio ma Anetioka,

22‘ua fa‘alototeleina e i lā‘ua so‘o, ma apoapoa‘i atu ‘ina ‘ia tumau i latou i le fa‘atuatua, ‘ua fai atu fo‘i, “O puapuagā e tele e tatau ‘ona tatou ulufale atu ai i le Mālō o le Atua.”

23‘Ua uma ‘ona tofia e i lā‘ua toeaina mo i latou i lea ekalesia ma lea ekalesia, ‘ua tatalo fo‘i ma anapopogi, ‘ona tu‘uina atu ai lea o i latou i le Ali‘i o lo‘o fa‘atuatua i ai.

24‘Ua uma ‘ona ui ane i lā‘ua i Pisitia, ‘ona o‘o lea i Pafulia.

25‘Ua tautala atu fo‘i i lā‘ua i le ‘upu i Pereka, ‘ona la ō ifo ai lea i Ataleia;

26‘ona folau atu lea o i lā‘ua nai lea mea i Anetioka, ma ‘ua tu‘uina atu ai i lā‘ua i le alofa tunoa o le Atua, mo le galuega na la fa‘ataunu‘uina.

27‘Ua taunu‘u atu i lā‘ua, ‘ona la fa‘apotopotoina lea o le ekalesia, ma fa‘amatalaina atu i ai mea uma na faia e le Atua e ala ia i lā‘ua, ma lona tatalaina o le faitoto‘a o le fa‘atuatua mo tagata o Nu‘u ‘ese.

28‘Ua nonofo ai fo‘i i lā‘ua i aso e tele fa‘atasi ma so‘o.