Roma 10 - Samoan Contemporary New Testament

O le Vala‘auina o Nu‘u ‘Ese

1Uso e, o le mana‘o lava lenei o lo‘u loto, ma la‘u tatalo i le Atua mo Isaraelu: ia fa‘aolaina i latou.

2Auā ‘ou te molimau ‘iā te i latou, e fa‘amaoni le tu‘uina atu o i latou i le Atua, peita‘i e lē lava lo latou malamalama.

3Auā e lē iloa e i latou le amiotonu mai le Atua, ma ‘ua taumafai e fa‘atū la latou lava amiotonu, a ‘ua lē usiusita‘i i latou i le amiotonu mai le Atua.

4Auā o Keriso le taunu‘uga o le tulafono, e o‘o mai ai le amiotonu i ē e fa‘atuatua uma lava.

O le Fa‘aolataga mo Tagata uma lava

5Auā ‘ua tusia e Mose e uiga i le amiotonu e maua i le tulafono, fai mai “O le tagata na te faia ia mea, e ola ai lava o ia.”Levi 18.5; Kala 3.12

6A o le amiotonu e maua i le fa‘atuatua, fai mai ‘upu e fa‘asino i ai: ‘Aua ‘e te fai ifo i lou loto, “O ai e alu a‘e i le lagi?” (o lona uiga, ‘ina ‘ia ‘a‘ami Keriso e maliu ifo).

7Pe fai ifo fo‘i, “O ai e alu ifo i le mea loloto?”

8‘Ae fai mai o le ā? ‘Ua latalata ‘iā te oe le ‘upu, o lo‘o i ai lava i lou gutu ma lou loto (o le ‘upu lea o le fa‘atuatua o lo‘o matou folafolaina atu).

9‘Āfai ‘e te ta‘utino atu i lou gutu o Iesu o le Ali‘i, ma fa‘atuatua i lou loto ‘ua toe fa‘atūina mai o ia e le Atua nai ē ‘ua oti, e fa‘aolaina ai oe.

10Auā o le loto e fa‘atuatua ai, e o‘o mai ai le amiotonu; a o le gutu e ta‘utino ai, e o‘o mai ai le ola.

11Auā ‘ua fai mai le Tusi, “E lē ma se isi e fa‘atuatua ‘iā te ia.”

12Auā e leai se ‘ese‘esega o le tagata Iutaia ma le tagata Eleni. E to‘atasi le Ali‘i o tagata uma, o lē o lo‘o liligi mai lona tamao‘āiga i luga o tagata uma o ē e vala‘au atu ‘iā te ia.

13Auā, “O tagata uma e vala‘au atu i le suafa o le Ali‘i, e fa‘aolaina.”

14Peita‘i, e fa‘apefea ‘ona vala‘au atu tagata i lē latou te lē fa‘atuatua i ai? E fa‘apefea fo‘i ‘ona fa‘atuatua i latou i lē latou te le‘i fa‘alogo lava i ai? E fa‘apefea fo‘i ‘ona fa‘alogo i latou e aunoa ma se tagata e tāla‘i atu?

15E fa‘apefea ‘ona tāla‘i atu e tagata pe ‘āfai e le‘i ‘auina atu i latou? E pei ‘ona tusia, “E matagofie tele vae o ē e tāla‘i mai le Tala Lelei!”Isai 52.7

16Peita‘i e le‘i usiusita‘i i latou uma lava i le Tala Lelei, auā fai mai Isaia, “Le Ali‘i e, o ai ‘ea ‘ua talitonu i le ‘upu na fa‘alogo ai mai ia i matou?”

17O le mea lea, e tupu mai le fa‘atuatua i le mea ‘ua fa‘alogo ai, o le mea fo‘i ‘ua fa‘alogo ai e tupu mai lea i le tala‘iina atu e Keriso.

18‘Ae peita‘i, se‘i ‘ou fesili atu, po ‘ua fa‘alogo mai ‘ea i latou? O le ‘upu moni e leai; auā

“ ‘Ua o‘o atu lo latou leo i le lalolagi uma,

ma a latou ‘upu i tulu‘iga o le lalolagi.”

19Se‘i ‘ou toe fesili atu, pe le‘i malamalama ‘ea Isaraelu? Na fai mai muamua Mose,

“ ‘Ou te fa‘atupuina ‘iā te ‘outou le fuā i ē e lē o se nu‘u;

‘ou te fa‘atupu ‘iā te ‘outou le ita i le nu‘u vālea.”

20‘Ua tautala mai Isaia ma le lototele,

“ ‘Ua maua a‘u e i latou o ē e le‘i sā‘ili mai ‘iā te a‘u;

‘ua ‘ou fa‘aali atu fo‘i a‘u lava ia i latou o ē e le‘i fesili mai ‘iā te a‘u.”

21‘Ae peita‘i ‘ua fai mai o ia ‘iā Isaraelu, “ ‘Ua ‘ou fa‘aloloa o‘u lima i aso uma i tagata lē usiusita‘i ma o lo‘o tete‘e mai.”