Iakopo 4 - Samoan Contemporary New Testament

Fa‘auō ma le Lalolagi

1Maifea ‘ea tau‘a ma misa o ‘iā te ‘outou? E lē mai mana‘o leaga ‘ea o lo‘o tau i totonu o ‘outou tino?Roma 7.23; 1 Pete 2.11

2‘Ua ‘outou tu‘inanau i mea, ‘ae tou te le‘i maua; o lea ‘ua ‘outou fasioti ai. ‘Ua ‘outou losilosi, ‘ae lē mafai ‘ona ‘outou maua; o lea fo‘i ‘ua ‘outou femisaa‘i ai ma fai tau‘a. ‘Ua ‘outou lē maua, auā tou te le‘i ōle atu.

3‘Ua ‘outou ōle atu ‘ae tou te le‘i maua, auā ‘ua sesē ‘ona ‘outou ōle atu, ‘ua fa‘apito ‘ona ‘outou ōle atu i mea tou te tu‘inanau i ai.

4O ‘outou tagata mulilua e, tou te lē iloa ‘ea o le fefa‘auōa‘i ma le lalolagi o le tete‘e atu lea i le Atua? O lenei, o sē e fia uō i le lalolagi, ‘ua ‘avea o ia ma tagata e tete‘e i le Atua.

5Tou te manatu ‘ea ‘ua lē aogā le mea ‘ua fai mai ai le Tusi, “O le agaga na tu‘uina e le Atua i totonu ‘iā te i tatou, ‘ua fa‘atūmuina o ia i le lotoleaga.”

6A o le alofa tunoa na foa‘iina mai e le Atua e sili atu lona malosi. O lea ‘ua fai mai ai le Tusi, “E tete‘e atu le Atua i ē e mitamitavale, ‘ae foa‘iina mai le alofa tunoa i ē e fa‘amaulalo.”

7O le mea lea ‘ia ‘outou tu‘uina atu ‘outou lava i le Atua; ‘ia ‘outou tete‘e atu i le tiapolo, ‘ona sola ‘ese ai lea o ia ‘iā te ‘outou.

8‘Ia ‘outou fa‘alatalata atu i le Atua, ‘ona fa‘alatalata mai lea o ia ‘iā te ‘outou. Tagata agasala e, inā fafano ia o ‘outou lima. ‘Ia fa‘amamā o ‘outou loto ‘outou tagata fa‘alotolotolua.

9‘Ia fa‘asauāina ‘outou ma fa‘avauvau ma fētāgisi; ia liua lo ‘outou ‘ata‘ata ma fa‘avauvau, ma ‘ia ‘avea lo ‘outou ‘oli‘oli ma fa‘anoanoa.

10‘Ia ‘outou fa‘amaulalo i luma o le Ali‘i, ‘ona fa‘aeaina lea o ‘outou e ia.

Lapata‘iga e Uiga i le Fa‘amasino atu i le Uso Kerisiano

11Uso e, ‘aua ne‘i fai ‘upu leaga le isi i le isi. So o se isi e fai ‘upuleaga i le uso pe fa‘amasino ‘iā te ia, ‘ua fai ‘upu leaga o ia i le tulafono, ma ‘ua fa‘amasino fo‘i i le tulafono. ‘Ae peita‘i ‘āfai ‘e te fa‘amasinoina le tulafono, e lē o oe o se tagata e usiusita‘i i le tulafono, a o oe o le fa‘amasino.

12E to‘atasi lava le fai tulafono e to‘atasi fo‘i le fa‘amasino, o lē na te mafai ‘ona fa‘aola ma fasioti; a o ai ‘ea oe o lē e fa‘amasino atu i lē lua te tuā‘oi?

Lapata‘iga e Uiga i le Mitamitavale

13O lenei, fa‘alogo mai ia ‘iā te a‘u ‘outou o ē fai ane, “O le asō po o a taeao tatou te ō atu ai i le ‘a‘ai, tatou te nonofo ai i le tausaga, ma fa‘atau ma maua ai tupe e tele.”

14‘Ae lē iloa e ‘outou pe se ā le mea e tupu a taeao. Auā se ā ‘ea lo ‘outou ola? O le puao lava ia, e aliali mai i sina taimi itiiti ‘ona mou ‘ese atu lea.

15‘Ae tatau ‘ona ‘outou fa‘apea, “ ‘Āfai e finagalo ai le Ali‘i, tatou te ola ai, ‘ona tatou faia lea o lea mea ma lea mea.”

16A o lenei, ‘ua ‘outou mitamita ia ‘outou ‘upu fa‘amaualuga; e leaga le mitamita fa‘apenā uma lava.

17O le mea lea, o lē ‘ua iloa le mea lelei e fai ‘ae lē faia, o le agasala lea ‘iā te ia.