Roma 8 - Samoan Contemporary New Testament

O le Ola i le Agaga

1O lenei, ‘ua leai se fa‘asalaga mo ē o lo‘o ‘iā Keriso Iesu.

2Auā o le tulafono a le Agaga, o le ola lea ‘ua ‘iā Keriso Iesu, ‘ua fa‘asa‘olotoina ai a‘u nai le tulafono a le agasala ma le oti.

3Auā o le mea na lē mafaia e le tulafono, ‘ina ‘ua vaivai o ia ‘ona o le tino, ‘ua faia lea e le Atua i lona ‘auina mai o lona lava Alo, ‘ua foliga mai e pei o tagata agasala, ma ‘ua fa‘asalaina ai e ia le agasala i le tino;

4‘ina ‘ia fa‘a‘ato‘atoaina ai ia i tatou le amiotonu e tusa ma le tulafono; o i tatou o ē e lē savavali fa‘aletino, ‘ae fa‘aleagaga.

5Auā o ē e fa‘aletino e loto atu i latou i mea a le tino; a o ē e fa‘aleagaga e loto atu i latou i mea a le Agaga.

6O le loto atu i le tino o le oti lea; a o le loto i le Agaga o le ola lea ma le manuia.

7Auā o le loto i le tino o le ita lea i le Atua; e lē usiusita‘i fo‘i i le tulafono a le Atua, ma e matuā lē mafai lava ‘ona usiusita‘i i ai.

8O i latou fo‘i o ē e fa‘aletino, e lē mafai ‘ona fiafia i ai le Atua.

9A o ‘outou, tou te lē fa‘aletino ‘ae fa‘aleagaga, pe ‘āfai e nofo mau le Agaga o le Atua i totonu ‘iā te ‘outou. So o se isi e lē o ‘iā te ia le Agaga o Keriso, e lē se tagata o Keriso o ia.

10‘Ae ‘āfai ‘ua i totonu ‘iā te ‘outou Keriso, e ui lava ‘ina oti o ‘outou tino ‘ona o le agasala, e ola lava o ‘outou agaga ‘ona o le amiotonu.

11‘Ae ‘āfai e nofo i totonu ‘iā te ‘outou le Agaga o le Atua, o lē na toe fa‘atūina mai Iesu nai ē ‘ua oti, o ia lava o lē na te fa‘atūina mai Keriso Iesu nai ē ‘ua oti, o le a na foa‘iina atu le ola i o ‘outou tino fa‘aletagata, e ala i lona Agaga o lo‘o nofo i totonu ‘iā te ‘outou.

12O lenei, uso e, o i tatou o tagata o lo‘o nofo ‘aitalafu, ‘ae lē o le itū i le tino, ‘ina ‘ia tatou amio ai fa‘aletino;

13auā ‘āfai tou te amio fa‘aletino, e oti ai ‘outou; ‘ae ‘āfai tou te fasiotia amioga a le tino i le mana o le Agaga, ‘ona ola ai lea o ‘outou.

14Auā o i latou uma ‘ua ta‘ita‘iina e le Agaga o le Atua, o atali‘i i latou o le Atua.

15Auā ‘ua ‘outou lē maua le agaga o le pologa e toe fefefe ai; a ‘ua ‘outou maua le Agaga e ‘avea ai ‘outou ma tamafai, tou te vala‘au atu ai, “Tamā! Le Tamā e!”

16O le Agaga lava lea o lo‘o molimau mai i o tatou agaga, o le fānau i tatou a le Atua.

17‘Āfai fo‘i o le fānau i tatou, o lona uiga o i tatou o suli, o suli lava o le Atua o suli fa‘atasi ma Keriso, pe ‘āfai tatou te tigā fa‘atasi ma ia, ‘ina ‘ia fa‘amanuiaina fo‘i i tatou fa‘atasi ma ia.

O le Mamalu i Aso o i Luma

18O lo‘u manatu e lē tatau ‘ona fa‘atusa le tigā i aso nei, ma le manuia o le a o‘o mai, e fa‘aalia mai ‘iā te i tatou.

19Auā o lo‘o fa‘atalitali mea uma na faia ma le naunauta‘i i le fa‘aalia mai o atali‘i o le Atua.

20Auā o mea uma na faia e i‘uvale le taunu‘uga, e lē ‘ona o le loto o mea na faia, peita‘i ‘ona o lē na fuafuaina fa‘apea e tusa ma lona fa‘amoemoe;

21auā o le a fa‘asa‘olotoina mea uma na faia, ia lē fa‘apologaina ma ‘ia lē i‘uvale, a ‘ia maua le manuia o le sa‘olotoga o le fānau a le Atua e manuia ai.

22Auā ‘ua tatou iloa ‘ua ōi fa‘atasi, ma ‘o‘ono fa‘atasi mea uma lava na faia, ‘ua o‘o mai lava i aso nei.

23E lē gata i lea, a o i tatou lava o ē ‘ua i ai ulua‘i fua o le Agaga, tatou te ōi i totonu ‘iā te i tatou lava, a o tatou fa‘atalitali atu i le ‘avea o i tatou ma tamafai, o le fa‘aolaina lea o tatou tino.

24Auā o le fa‘amoemoe lea ‘ua fa‘aolaina ai i tatou. A o le fa‘amoemoe ‘ua va‘aia, e lē o le fa‘amoemoe lea; auā, e fa‘apefea ‘ona toe fa‘amoemoe se isi i le mea ‘ua va‘aia?

25‘Ae peita‘i a tatou fa‘amoemoe i le mea ‘ua lē va‘aia, tatou te fa‘atalitali i ai ma le ‘onosa‘i.

26E fa‘apea fo‘i ‘ona fesoasoani mai le Agaga i lo tatou vaivai; auā tatou te lē iloa pe fa‘apefea ‘ona tatalo atu e pei ‘ona tatau ai; peita‘i o le Agaga lava e fautua mo i tatou i le ōi e lē mafai ‘ona fa‘amatalaina.

27O lē o lo‘o su‘esu‘e i loto o tagata, ‘ua silafia e ia le finagalo o le Agaga; auā o lo‘o fautua le Agaga mo le au pa‘ia e tusa ma le finagalo o le Atua.

28‘Ua tatou iloa fo‘i o lo‘o galue le Atua i mea uma lava mo le lelei, fa‘atasi ma i latou o ē ‘ua alolofa atu ‘iā te ia, o i latou ia ‘ua vala‘auina i lona finagalo.

29Auā o ē na silafia e ia anamua, na tofia fo‘i e ia anamua, ia foliga i latou i lona Alo, ‘ina ‘ia ‘avea o ia ma ulumatua o le au uso e to‘atele.

30O i latou fo‘i na tofia anamua e ia, ‘ua vala‘auina fo‘i i latou e ia; o ē ‘ua vala‘auina e ia, ‘ua ta‘uamiotonuina fo‘i i latou e ia; o ē ‘ua ta‘uamiotonuina e ia, ‘ua fa‘amanuiaina fo‘i i latou e ia.

O le Alofa o le Atua ‘ua Fa‘aalia ‘iā Keriso Iesu

31O le ā ‘ea sa tatou ‘upu e fai i lenei mea? ‘Āfai ‘ua ‘au ma i tatou le Atua, o ai la e fa‘asagatau mai ia i tatou?

32E le‘i fa‘asaoina e le Atua lona lava Alo, a ‘ua foa‘iina mai o ia e ia mo i tatou uma; e lē foa‘iina mai ‘ea e ia ‘iā te i tatou mea uma lava fa‘atasi ma ia?

33O ai na te molia le au filifilia a le Atua? O le Atua na te ta‘uamiotonuina mai,

34o ai la na te fa‘asalaina mai? O Keriso o lē na maliu, a ‘ua toetū mai lava o ia; o lo‘o i ai nei i le itū taumatau o le Atua, o lo‘o fautua fo‘i o ia mo i tatou.

35O ai se isi na te fa‘ate‘a‘eseina mai i tatou i le alofa o Keriso? O le puapuagā ‘ea, po o le atuatuvale, po o le sauā, po o le oge, po o le lē lavalavā, po o le pagātia, po o le pelu?

36Fa‘apei ‘ona tusia:

“ ‘Ona o oe ‘ua fasiotia ai i matou i aso uma;

‘ua ‘avea i matou e peiseaī o mamoe o le a fasia.”

37A ‘ua tatou matuā manumālō i nei mea uma lava ‘ona o ia ‘ua alofa mai ‘iā te i tatou.

38Auā ‘ua ‘ou mautinoa, e lē mafaia e le oti, po o le ola, po o agelu, po o ali‘i, po o mea i aso nei, po o mea i aso o lumana‘i, po o le malosi,

39po o le maualuga, po o le loloto, po o se isi mea na faia, e lē mafaia e ia mea ‘ona fa‘ate‘aina mai i tatou i le alofa o le Atua, o lo‘o ‘iā Keriso Iesu lo tatou Ali‘i.