1 Peteru 2 - Samoan Contemporary New Testament

O le Ma‘a Ola ma le Nu‘u Pa‘ia

1O le mea lea ia tu‘u ‘ese e ‘outou le loto leaga uma lava ma le pepelo, po o le lē fa‘amaoni, po o le losilosivale, po o le tu‘ua‘ifua.

2E pei ‘ona naunau o le pepe fa‘ato‘ā fānau mai i le suāsusu moni o lona tinā, ia fa‘apea fo‘i ‘ona naunau ‘outou i le suāsusu fa‘aleagaga, ‘ina ‘ia ‘outou tutupu a‘e ai i le fa‘aolataga.

3Auā ‘ua fai mai le Tusi, “ ‘Ua ‘outou tofo i le agalelei o le Ali‘i.”

4O le mea lea ‘ia ‘outou ō mai i le Ali‘i, o le ma‘a ola na lafoa‘iina e tagata, a ‘ua filifilia e le Atua, e tāua lava.

5‘Ia ‘outou ō mai ‘iā te ia fa‘apei o ma‘a ola, ma ‘ia ati a‘e i le fale fa‘aleagaga, i le mea o le a ‘outou ‘au‘auna ai e pei o ositaulaga pa‘ia, e avatu taulaga fa‘aleagaga e talia e le Atua e ala ‘iā Iesu Keriso.

6Auā ‘ua fai mai le Tusi,

“ ‘Ou te tu‘u i Siona le ma‘a tulimanu tāua ‘ua filifilia.

So o se isi e fa‘atuatua ‘iā te ia, e lē fa‘amāina.”

7O le aogā o lenei ma‘a ‘ua ‘iā te ‘outou o ē e fa‘atuatua; a o i latou o ē e lē fa‘atuatua:

“O le ma‘a na lafoa‘iina e le tufuga fai fale,

‘ua ‘avea lava lea ma ma‘a aupito sili ‘ona tāua.”

8‘Ua toe fai mai fo‘i le Tusi,

“O le ma‘a lenei e tautevateva ai tagata,

o le papa e pa‘u‘ū ai i latou.”

E tautevateva i latou, auā e le‘i talitonu i latou i le ‘upu; na tofia fo‘i i latou mo lea mea.

9A o ‘outou o le nu‘u ‘ua filifilia, o tupu ma ositaulaga, o le nu‘u pa‘ia, o tagata lava o le Atua, ‘ina ‘ia ‘outou fa‘aali atu galuega ofoofogia e lē na vala‘auina ‘outou mai le pouliuli i lona lava malamalama ofoofogia.

10O ‘outou o ē sa lē ‘avea ma nu‘u anamua, ‘ua ‘avea nei ma nu‘u o le Atua; sa lē alofagia ‘outou anamua, a o lenei ‘ua alofagia.

‘Ia Ola e pei o ‘Au‘auna a le Atua

11A‘u uō e, ‘ou te ‘ai‘oi atu ‘iā te ‘outou o tagata ‘ese ma ē e aumau i lenei lalolagi. ‘Ia ‘outou taumamao ma tu‘inanau o le tino, o mea ia o lo‘o tau ma le agaga.

12‘Ia ‘outou amiolelei i luma o Nu‘u ‘ese, o le mea lea latou te fai ‘upu leaga ai ‘iā te ‘outou e peiseaī o ‘outou o tagata amioleaga, ‘ina ‘ia latou va‘ava‘ai ia ‘outou galuega lelei, ma vi‘ia ai le Atua i le aso e asiasi mai ai.

13‘Ia ‘outou usiusita‘i i tagata pule ‘ona o le Ali‘i, po o le tupu, o lē e sili,

14po o kovana o ē ‘ua ‘auina mai e ia mo le fa‘asalaina o ē e amioleaga, a ‘ia vi‘ia ē e amiolelei.

15Auā o le finagalo lea o le Atua ‘ina ‘ia ‘outou amiolelei, ia i‘u ai ‘ina fa‘alologo le valea o tagata pouliuli.

16‘Ua finagalo o ia ‘ia ‘avea ‘outou ma tagata sa‘oloto; ‘aua ne‘i fa‘aaogāina lo ‘outou sa‘olotoga e pei o se ufiufi o le amioleaga, a ‘ia ‘outou ola e pei o ‘au‘auna a le Atua.

17‘Ia ‘outou āva i tagata uma lava, ia alolofa i le ‘au uso, ia migao i le Atua, ia āva i le tupu.

O le Fa‘aa‘oa‘oga o Puapuagā o Keriso

18O ‘outou ‘au‘auna, ‘ia ‘outou usiusita‘i i o ‘outou matai, ia fa‘aali atu ‘iā te i latou lo ‘outou fa‘aaloalo, ‘aua ne‘i na o i latou o ē e agalelei ma fa‘autauta, a o i latou fo‘i o ē e fa‘api‘opi‘o.

19Auā o le mea lelei pe ‘āfai e ‘onosa‘i se tagata i le tigā o lona puapuagātia fua ‘ona ‘ua iloa e ia le Atua.

20Auā pe se ā se vi‘iga e maua pe ‘āfai tou te ‘onosa‘i ‘ona o a ‘outou agasala. ‘Ae ‘āfai tou te ‘onosa‘i ‘ona o le faia o mea lelei, o le mea lea e talia e le Atua.

21O le mea lea na vala‘auina ai ‘outou e fai; auā na tigāina lava Keriso ‘ona o ‘outou, ‘ua tu‘uina mai ai e ia le fa‘aa‘oa‘o mo ‘outou, ‘ina ‘ia ‘outou mulimuli i ona tulaga ‘a‘ao.

22E le‘i faia e ia se agasala, e leai fo‘i se pepelo i lona fofoga;

23o lē sa fāifaia ‘ae le‘i fāifāi atu; na puapuagātia o ia, ‘ae le‘i fa‘afefe atu; a ‘ua tu‘uina atu o ia e ia lava i lē na te fa‘amasino tonu.

24O ia lava na tau‘aveina a tatou agasala i lona lava tino i le satauro, ‘ina ‘ia tatou oti i le agasala, a ‘ia ola i le amiotonu. O ona manu‘a ‘ua mālōlō ai ‘outou.

25Auā sa pei ‘outou o mamoe ‘ua se, a o lenei ‘ua toe liliu mai i le Leoleo Mamoe ma Lē na te tausia o ‘outou agaga.