Ioane 15 - Samoan Contemporary New Testament

O Iesu o le Vine Moni

1“O a‘u nei o le vine moni, a o lo‘u Tamā o le galue vine o ia.

2O lālā uma o ‘iā te a‘u e lē fua e sala‘eseina; a o lālā e fua, e teuteuina ‘ina ‘ia saga fua mai pea.

3‘Ua uma ‘ona fa‘amamāina ‘outou i le ‘upu na ‘ou tautala atu ai ‘iā te ‘outou.

4‘Ia ‘outou tumau ‘iā te a‘u, fa‘apei ‘ona ‘ou tumau ‘iā te ‘outou. E pei ‘ona lē fua o le lālā pe a na o ia, pe ‘āfai e lē pipi‘i i le vine, e fa‘apea fo‘i ‘outou, pe ‘āfai tou te lē tumau ‘iā te a‘u.

5“O a‘u o le vine, o lālā ‘outou. O lē e tumau ‘iā te a‘u, ma ‘ou tumau fo‘i ‘iā te ia, o ia lava e fua tele mai; auā e lē mafai ‘ona ‘outou faia se mea e tasi pe a ‘ou lē i ai.

6O lē e lē tumau ‘iā te a‘u, e lafoa‘iina o ia e pei o le lālā la‘au ma fa‘amagoina; ‘ona fa‘aputuina ai lea o ia lālā, ma lafo i le afi, ‘ua susunu ai.

7‘Āfai tou te tumau ‘iā te a‘u, a tumau fo‘i a‘u ‘upu ‘iā te ‘outou, o mea uma lava tou te ōle atu ai, e foa‘iina atu ‘iā te ‘outou.

8E vi‘ia lo‘u Tamā i lenei mea, pe a ‘outou fua tele mai; ‘ona ‘avea ai lea o ‘outou ma o‘u so‘o.

9E pei ‘ona alofa mai o le Tamā ‘iā te a‘u, e fa‘apea lava ‘ona ‘ou alofa atu ‘iā te ‘outou; ‘ia ‘outou tumau i lo‘u alofa.

10‘Āfai tou te tausia a‘u poloa‘iga, ‘ona ‘outou tumau ai lea i lo‘u alofa; fa‘apei ‘ona ‘ou tausia poloa‘iga a lo‘u Tamā, ma ‘ou tumau i lona alofa.

11“ ‘Ua ‘ou fai atu nei mea ‘iā te ‘outou ‘ina ‘ia i ai ‘iā te ‘outou lo‘u ‘oli‘oli, ia ‘ato‘atoa fo‘i lo ‘outou ‘oli‘oli.

12O la‘u poloa‘iga lenei, ‘ia ‘outou fealofani, fa‘apei ‘ona ‘ou alofa atu ‘iā te ‘outou.

13E lē sili lava le alofa o se tagata i lenei alofa, ‘ia tu‘uina atu e le tagata lona ola e sui ai ana uō.

14O a‘u uō ‘outou, pe ‘āfai tou te faia mea uma na ‘ou fa‘atonuina ai ‘outou.

15‘Ou te lē toe ta‘ua ‘outou o ‘au‘auna; auā e lē iloa e le ‘au‘auna le mea e faia e lona ali‘i. ‘Ua ‘ou ta‘ua ‘outou o uō, auā ‘ua ‘ou fa‘ailoa atu ‘iā te ‘outou mea uma na ‘ou fa‘alogo ai i lo‘u Tamā.

16Tou te le‘i filifilia a‘u; a ‘ua ‘ou filifilia ma tofia ‘outou, ‘ia ‘outou ō ma fua mai ni fua, ma ‘ia tumau ai pea o ‘outou fua; ‘ina ‘ia foa‘iina atu fo‘i ‘iā te ‘outou e le Tamā mea uma lava tou te ōle atu ai ‘iā te ia i lo‘u igoa.

17‘Ua ‘ou fai atu ‘iā te ‘outou nei mea, ‘ina ‘ia ‘outou fealofani.

O le ‘Ino‘ino o le Lalolagi

18“ ‘Āfai e ‘ino‘ino le lalolagi ‘iā te ‘outou, ‘ia ‘outou iloa ‘ua muamua ‘ona ‘ino‘ino mai ‘iā te a‘u, a o le‘i ‘ino‘ino ‘iā te ‘outou.

19‘Āfai o ni tagata o le lalolagi ‘outou, po ‘ua alofa mai le lalolagi i ona tagata. ‘Ae lē ni tagata o le lalolagi ‘outou, a ‘ua ‘ou filifilia ‘outou mai le lalolagi; o le mea lea e ‘ino‘ino ai le lalolagi ‘iā te ‘outou.

20‘Ia ‘outou manatua le ‘upu na ‘ou fai atu ai ‘iā te ‘outou, ‘E lē sili le ‘au‘auna i lona ali‘i.’ ‘Āfai na fa‘asauā i latou ‘iā te a‘u, e fa‘asauā fo‘i ‘iā te ‘outou; ‘āfai na tausia e i latou la‘u ‘upu, e tausia fo‘i e i latou la ‘outou ‘upu.

21‘Ae faia e i latou ia mea uma ‘iā te ‘outou ‘ona o lo‘u igoa, auā e le‘i iloa e i latou lē na ‘auina mai a‘u.

22‘Ana ‘ou lē sau ma tautala atu ‘iā te i latou, po ‘ua lē agasala i latou; o lenei, e leai se mea e ‘alo i ai i latou ‘iā latou agasala.

23O lē e ‘ino‘ino mai ‘iā te a‘u, e ‘ino‘ino fo‘i i lo‘u Tamā.

24E lē ta‘usalaina fo‘i i latou pe ana ‘ou lē faia ‘iā te i latou galuega e lē mafaia e se isi; a o lenei, ‘ua va‘ai i latou i mea na ‘ou faia, a ‘ua ‘ino‘ino mai ‘iā te a‘u ‘atoa ma lo‘u Tamā.

25Na tutupu nei mea uma ‘ina ‘ia taunu‘u ai le ‘upu ‘ua tusia i la latou tulafono, ‘ ‘Ua ‘ino‘ino mai fua i latou ‘iā te a‘u.’

26“A maliu mai le Fesoasoani, o lē ‘ou te ‘auina mai ‘iā te ‘outou mai le Tamā, o le Agaga lea e tupu mai ai le ‘upu moni, e maliu mai o ia mai le Tamā e molimau ‘iā te a‘u;

27o molimau fo‘i ‘outou ‘iā te a‘u, auā na tatou fa‘atasi ma a‘u talu mai le amataga.