1 Peteru 3 - Samoan Contemporary New Testament

O avā ma Tane

1‘Ia fa‘apea fo‘i ‘outou avā, ia usiusita‘i ia ‘outou tane, auā ‘āfai o i ai ni tane e lē talitonu i le ‘upu, ‘ia ‘outou taumafai ia maua i latou i la ‘outou amiolelei e aunoa ma sa ‘outou ‘upu,

2pe a va‘ai ane i latou i la ‘outou amio mamā ma le fa‘aaloalo.

3‘Aua le faia i mea va‘aia i fafo a ‘outou teuga e pei o le teuina o le lauulu, ma le teuteu i auro ma ‘ofu.

4‘Ae peita‘i, ia fa‘aalia lo ‘outou matagofie i totonu o ‘outou loto, o le mea e lē pala, o le agamalū ma le filemū, o le mea tau tele i luma o le silafaga a le Atua.

5Auā sa fa‘apea fo‘i ‘ona teuteu o fafine pa‘ia anamua, o ē na fa‘amoemoe i le Atua, sa teuteu i latou lava ma sa usiusita‘i fo‘i ‘iā latou lava tane.

6Sa fa‘apea lava Sara, na usiusita‘i ‘iā Aperaamo, na ia ta‘ua o ia, “O lo‘u matai.” ‘Ua ‘avea nei ‘outou ma ana tama pe ‘āfai tou te faia mea lelei ma le lē mata‘u i se mea.

7‘Ia fa‘apea fo‘i ‘outou tane, ‘ia ‘outou fa‘aaloalo ia ‘outou avā. ‘Ia ‘outou iloa o i latou e vāivāi, ‘ia ‘outou fa‘aaloalo ‘iā te i latou; auā o le a maua fo‘i e i latou fa‘atasi ma ‘outou le meaalofa a le Atua, o le ola lea. ‘Ia ‘outou faia lenei mea ‘ina ne‘i fa‘alavelaveina a ‘outou tatalo.

‘Ia Puapuagātia ‘ona o le Faia o Mea Tonu

8O le toe ‘upu, ia loto gatasi ‘outou uma, ia fa‘atūmuina i le alofa fa‘auso, ia agalelei ma loto maulalo,

9‘aua ne‘i taui atu le leaga i le leaga, po o le fāifāi i le fāifāi. ‘Ae peita‘i ia taui atu i le fa‘amanuia, auā na vala‘auina ‘outou e le Atua ia maua le manuia.

10E pei ‘ona fai mai o le Tusi,

“So o se isi e mana‘o i le ola,

ma ‘ia iloa aso lelei,

ia tāofia e ia lona laulaufaiva i ‘upu leaga,

ma ona laugutu i le tautala fa‘a‘ole‘ole.

11‘Ia liliu ‘ese i mea leaga; a ‘ia fai mea lelei;

ia sā‘ili i le filemū ma tausisi i ai.

12Auā e silasila fofoga o le Ali‘i i ē e amiotonu,

e liliu mai fo‘i ona taliga ‘iā latou tatalo,

‘ae liliu ‘ese o ia i ē e fai mea leaga.”

13O ai ‘ea na te fa‘aleaga ‘iā te ‘outou pe ‘āfai tou te naunau e fai le mea lelei?

14‘Ae ‘āfai tou te tigāina ‘ona o le faia o le mea sa‘o, ‘amu‘ia ‘outou. ‘Aua tou te matata‘u i tagata, ‘aua fo‘i ne‘i fa‘aatuatuvaleina ‘outou e i latou.

15‘Ia pa‘ia le Ali‘i le Atua i o ‘outou loto. ‘Ia sauni pea lava pea e tali atu ma le agamalū ma le āva ia i latou uma o ē e fesili mai ‘iā te ‘outou, i le uiga o le fa‘amoemoe o lo‘o ‘iā te ‘outou.

16‘Ia tausia pea lo ‘outou loto fuatiaifo e lelei, ‘āfai e fāifāiina ‘outou i latou o ē e fa‘aleaga ‘iā te ‘outou, peiseaī ‘ua amioleaga ‘outou; ia māasiasi i latou o ē e tu‘ua‘ifua la ‘outou amiolelei o ‘iā Keriso.

17Auā e sili ‘ona lelei o le puapuagātia i le faia o mea lelei, pe ‘āfai o le finagalo lea o le Atua, i lo le faia o mea leaga.

18Auā o Keriso fo‘i na maliu fa‘atasi o ia mo agasala, o le amiotonu mo ē e amiolētonu, ‘ina ‘ia ta‘ita‘iina e ia i tatou i le Atua; na fasiotia i le tino a ‘ua toe fa‘aolaina e le Agaga;

19na afio atu o ia i lona itū fa‘aleagaga, ma tāla‘i atu i agaga i le falepuipui.

20O i latou ia o ē na lē fa‘alogo i le Atua anamua, a o fa‘atalitali mai o ia ma le ‘onosa‘i mo i latou i aso o Noa, ‘ina ‘ua uma ‘ona saunia o le va‘a. Na fa‘asaoina ai nai tagata to‘aitiiti, e to‘avalu na ‘aveina a‘e saogalemū i le vai.

21O le vai o le fa‘atusa lea o le papatisoga. O le papatisoga, e lē o le ‘ave‘esea o le ‘ele‘ele mai le tino, a o le folafolaga na faia i le Atua i le loto fuatiaifo e mamā. ‘Ua fa‘aolaina ai nei ‘outou i le toetū mai o Iesu Keriso;

22o lē ‘ua afio atu i le lagi ma ‘ua i le itū taumatau o le Atua, ‘ua pule o ia i agelu uma lava ma faipule ‘atoa ma ē e malolosi.