Galuega 25 - Samoan Contemporary New Testament

O le Moliaga o Paulo i luma o Feso

1‘Ua mavae aso e tolu talu ‘ona taunu‘u Feso i lona itūmālō, ‘ona alu atu lea o ia nai Kaisareia i Ierusalema.

2‘Ona ta‘u atu lea ‘iā te ia e le ositaulaga sili ma ali‘i o Iutaia e uiga ‘iā Paulo. ‘Ua ōle atu fo‘i i latou ia Feso,

3ma ‘ai‘oi atu ‘ina ‘ia alofagia i latou, ma ‘ia ‘auina atu Paulo i Ierusalema, a o le a lamalama e i latou e fasiotia o ia i le ala.

4A ‘ua tali mai Feso, “O lo‘o tāofia Paulo i Kaisareia, ma o a‘u fo‘i ‘ou te alu i ai i se taimi lata mai.

5‘Ia o ni ali‘i o ‘outou latou te molia lenei tagata pe ‘āfai e i ai se mea e tatau ai ‘ona molia o ia.”

6‘Ua nofo fo‘i Feso fa‘atasi ma i latou e le‘i silia i le valu po o le sefulu aso, ‘ona alu ifo ai lea o ia i Kaisareia. O le aso e soso‘o ai na nofo ai o ia i le nofoa fa‘amasino, ma fa‘atonu atu ‘ia ta‘ita‘iina mai Paulo.

7‘Ua o‘o mai o ia, ‘ona si‘omia lea o ia e tagata Iutaia o ē na ō ifo mai Ierusalema, ‘ua molia fo‘i Paulo i mea e tele ma le mamafa, ‘ua lē mafaia e i latou ‘ona fa‘amaonia.

8‘Ua fai atu Paulo i lana fa‘amatalaga, “ ‘Ou te lē agasala i le tulafono a Iutaia, po o le malumalu, po o Kaisara.”

9A o Feso, ‘ua loto o ia e fa‘afiafia tagata Iutaia, ‘ua fai mai o ia ‘iā Paulo, “ ‘E te mana‘o ‘e te alu a‘e i Ierusalema, ia fa‘amasinoina ai oe i nei mea ‘ua molia ai oe i o‘u luma?”

10‘Ona tali atu lea o Paulo, “O lea ‘ua ‘ou tu nei i luma o le nofoa fa‘amasino o Kaisara, e tatau ‘ona fa‘amasinoina ai a‘u. ‘Ou te le‘i faia lava se mea lē tonu ‘iā Iutaia, ‘ua e silafia lelei lava lea mea.

11Auā ‘āfai ‘ua ‘ou amioleaga po ‘ua ‘ou faia se mea e tatau ‘ona oti ai, ‘ou te lē musu lava e oti, ‘ae ‘āfai e lē moni se mea o mea ia ‘ua molia ai a‘u e i latou, e lē mafai ‘ona tu‘uina atu a‘u e se isi ‘iā te i latou. ‘Ou te talosaga ‘iā Kaisara.”

12‘Ua talatalanoa Feso ma ē e pule, ‘ona tali mai lea o ia, “ ‘Ua e talosaga ‘iā Kaisara; o lea, o le a e alu lava ‘iā Kaisara.”

O Paulo i Luma o Akeripa ma Perenike

13‘Ua mavae nai aso, ‘ona ō mai lea o le tupu o Akeripa ma Perenike i Kaisareia e fa‘afeiloa‘i Feso.

14E tele aso o nonofo ai i lā‘ua, ‘ona fa‘ailoa atu lea e Feso i le tupu le tala ‘iā Paulo, ‘ua fai atu o ia, “ ‘Ua tu‘ua e Filiki le isi tagata o lo‘o sāisāia;

15sa ‘ou i Ierusalema fo‘i, sa fa‘ailoa mai ai e ositaulaga sili ma toeaina o Iutaia, sa ‘ai‘oi mai fo‘i ia fa‘asalaina o ia.

16‘Ona ‘ou tali atu ai lea ‘iā te i latou, e lē o le faiga lea e masani ai Roma, o le tu‘uina atu o se tagata ia oti, vaganā ‘ua fesaga‘i lē ‘ua molia ma ē na molia o ia, ma ‘ia faitalia o ia ‘ona fai mai lana fa‘amatalaga i le mea ‘ua molia ai o ia.

17‘Ua o‘o mai fo‘i i latou ‘i‘inei, ‘ou te le‘i fa‘atali lava, na ‘ou nofo i le taeao i le nofoa fa‘amasino, ma fai atu ia ta‘ita‘iina mai lea tagata.

18Na tula‘i mai lē na molia o ia, a ‘ua le molimauina mai e i latou se tasi o mea sa ‘ou manatu ai;

19a ‘ua molia o ia e i latou i nisi matā‘upu tau la latou tapua‘iga, ma le isi tagata e igoa ‘iā Iesu, ‘ua oti, ‘ae fai mai Paulo ‘ua ola o ia.

20Na ‘ou fa‘alētonu pe fa‘apefea le fa‘amasinoga o ia mea, ‘ona ‘ou fesili atu lea po ‘ua loto o ia e alu i Ierusalema, ia fa‘amasinoina ai o ia i ia mea.

21‘Ona vala‘au atu lea o Paulo ia tāofia o ia ‘ina ‘ia fa‘amasinoina e Aokuso; ‘ona ‘ou fai atu lea ia leoleoina o ia se‘ia ‘ou ‘auina atu o ia ‘iā Kaisara.”

22‘Ona fai mai lea o Akeripa ia Feso, “ ‘Ou te fia fa‘alogo atu fo‘i a‘u i lenā tagata.”

‘Ua fai atu o ia, “O a taeao o le a e fa‘afofoga ai ‘iā te ia.”

23O le taeao na soso‘o ai, na ō mai ai Akeripa ma Perenike ma o la uiga mamalu fa‘alialiavale, ‘ua ulufale i le mea e fa‘alogo ai fa‘atasi ma ta‘ita‘i‘au sili ma ali‘i o le ‘a‘ai. ‘Ua fa‘atonu atu e Feso, ‘ona ta‘ita‘iina mai ai lea o Paulo.

24‘Ona fai atu lea o Feso, “Le tupu e Akeripa, ‘atoa ma ‘outou ali‘i uma o lo‘o tatou fa‘atasi nei, ‘ua ‘outou silasila i lenei tagata, ‘ua ‘ai‘oi mai ai ‘iā te a‘u tagata uma o Iutaia i Ierusalema, ‘atoa fo‘i ma ‘i‘inei, ‘ua ‘alalaga mai e lē tatau ‘ona toe ola o ia.

25A o a‘u ‘ou te lē iloa se mea ‘ua na faia e tatau ai le oti. ‘Ua talosaga fo‘i o ia nei ‘iā Aokuso, ‘ua ‘ou manatu ai e momoli atu ‘iā te ia.

26‘Ua leai fo‘i se mea ‘ua ‘ou mautinoa ‘iā te ia e tusi atu ai i le tupu, o le mea lea ‘ua ‘ou ta‘ita‘iina mai ai o ia i o ‘outou luma, ‘ae maise oe le tupu e, Akeripa, ‘ina ‘ia ‘ou maua se mea e tusi atu ai pe a uma ‘ona fa‘amasinoina.

27Auā o lo‘u manatu e lē tatau ‘ona momoli atu o se tagata o lo‘o sāisāia, ‘ae lē fa‘ailoa atu mea ‘ua molia ai o ia.”