1 Peteru 4 - Samoan Contemporary New Testament

O Olaga ‘Ua Liliu i le Atua

1O lenei, ‘ua tigāina Keriso i le tino, o le mea lea ia fai ma ‘au‘upega ‘iā te ‘outou fo‘i lea manatu; auā o lē ‘ua tigāina i le tino ‘ua tu‘u e ia le agasala;

2‘ina ‘ia lē toe ola o ia i ona aso o totoe i le lalolagi i mea e manana‘o i ai tagata, a o le mea e finagalo i ai le Atua.

3‘Ua lava ia aso ‘ua mavae atu, na faia ai e ‘outou le mana‘o o tagata fa‘apaupau. Na ‘outou ola i le fa‘amatāaitu, ma tu‘inanau, ma le ‘onā, ma poula, ma inugāava, ma le tapua‘i i tupua ‘ua fa‘asāina.

4O lenei, ‘ua matuā ofo tagata fa‘apaupau ‘ina ‘ua ‘outou lē ‘au fa‘atasi ma i latou i le olaga leaga ma le so‘ona fai; o le mea lea ‘ua fāifaia ai ‘outou e i latou.

5‘Ae peita‘i, e tatau ‘ona tu‘uina atu e i latou se fa‘amatalaga o i latou i lē ‘ua sauni e fa‘amasino ē ‘ua ola ‘atoa ma ē ‘ua oti.

6O le mea lea ‘ua tala‘iina atu ai fo‘i le Tala Lelei i ē ‘ua oti, ia i latou o ē na fa‘amasinoina a o ola i latou i le tino e pei ‘ona fa‘amasinoina tagata uma lava; na tala‘iina atu ‘iā te i latou ‘ina ‘ia ola ai le agaga i la le Atua.

O Sāvali Lelei o Meaalofa a le Atua

7‘Ua latalata mai le i‘uga o mea uma lava, o le mea lea ‘ia ‘outou fa‘autauta, ma ‘ia mataala ma tatalo.

8A ‘ia silisili lava i mea uma ‘ona alofa ma le loto ‘atoa le tasi i le isi, auā o le alofa e ufiufi ai agasala e tele.

9‘Ia feagaleleia‘i o le tasi i le isi, e aunoa ma le muimui.

10‘Ia ta‘ito‘atasi ma fai ma ‘au‘auna lelei o meaalofa ‘ese‘ese a le Atua, e matuā tatau ‘ona fa‘aaogāina mo le lelei o isi tagata meaalofa fa‘apitoa na maua mai i le Atua.

11‘Āfai e tautala se isi, ia tautala e tusa ma afioga a le Atua; ‘āfai e ‘au‘auna se isi, ia ‘au‘auna e tusa ma le malosi ‘ua tu‘uina mai e le Atua ‘iā te ia; ‘ina ‘ia vi‘ia le Atua i mea uma lava, ‘ona o Iesu Keriso; ia ‘iā te ia le vi‘iga ma le mana e fa‘avavau fa‘avavau lava. Amene.

‘Ia Puapuagātia Fa‘apei o se Kerisiano

12A‘u uō pele e, ‘aua tou te ofo i le tofotofoga e pei o le afi, e peiseaī o se mea e le‘i fa‘amoemoeina ‘ua o‘o ‘iā te ‘outou. Na tupu ‘ina ‘ia tofotofoina ai ‘outou.

13‘Ae pei ‘ona tofusia ‘outou i puapuagā o Keriso, e tatau ‘ona ‘outou fiafia ai, ‘ina ‘ia fiafia ma ‘oli‘oli ai ‘outou pe a fa‘aalia mai lona mamalu.

14‘Amu‘ia ‘outou pe a ‘upuleagaina ‘ona o le suafa o Keriso, auā o le a afio ifo ‘iā te ‘outou le Agaga mamalu, o le Agaga o le Atua,

15‘ae peita‘i, ‘aua ne‘i puapuagātia se isi o ‘outou ‘ona ‘ua fasioti tagata, po ‘ua gaoi, po ‘ua amioleaga, po ‘ua ‘aiā fua i mea a isi tagata.

16‘Ae ‘āfai e puapuagātia se isi ‘ona o ia o le Kerisiano, ‘aua le māasiasi ai, a ‘ia fa‘afetai i le Atua i le suafa o Keriso.

17Auā ‘ua o‘o mai le taimi e amata ai le fa‘amasinoga i le ‘āiga o le Atua; ‘āfai e amata ‘iā te i tatou, pe se ā ‘ea le i‘uga o i latou o ē na lē usiusita‘i i le Tala Lelei a le Atua?

18E pei ‘ona fai mai le Tusi,

“ ‘Āfai e faigatā ‘ona fa‘aolaina tagata lelei,

o le ā la le mea e o‘o i tagata fa‘alēmata‘u ma le agasala?”

19O le mea lea, o i latou o lo‘o puapuagātia ‘ona o le finagalo o le Atua mo i latou, ia tu‘uina atu i latou lava i lē na faia i latou, i le faia o mea lelei, e lē tu‘ulafoa‘iina fo‘i i latou e ia.