Filipi 2 - Samoan Contemporary New Testament

O le Lotomaulalo ma le Silisili ‘Ese o Keriso

1O lenei, ‘āfai e i ai se fa‘alototele ‘iā Keriso, ‘āfai e i ai se fa‘amatalaloto i le alofa, ‘āfai e i ai se mafuta ma le Agaga, ‘āfai e i ai se alofa mutimutivale ma se loto alofa,

2‘ia ‘outou fa‘a‘ato‘atoaina lo‘u ‘oli‘oli, ‘ina ‘ua gatasitasi o ‘outou manatu ma tasi lo ‘outou alofa, ‘ua ‘outou loto gatasi fo‘i ma manatunatu i le mea e tasi.

3‘Aua ne‘i faia se mea e tasi ma le manatu fa‘apito ma le mitamitavale; a ‘ia ta‘ito‘atasi ‘outou ma manatu ifo ma le loto maulalo, e sili isi tagata i lo ia.

4‘Aua ne‘i ta‘ito‘atasi ‘outou ma va‘ava‘ai tau lava o mea e fiafia i ai o ia; a ‘ia va‘ava‘ai fo‘i i mea e fiafia i ai isi tagata.

5‘Ia ‘iā te ‘outou le manatu lenei o lo‘o ‘iā Keriso Iesu,

6o lē sa matuā tutusa lelei ma le Atua;

e le‘i manatu o ia e tāofi mau lona tulaga tutusa ma le Atua.,

7Peita‘i ‘ua matuā fa‘amaulaloina o ia e ia lava,

ma ‘ua tino mai o ia o le pologa,

‘ina ‘ua fānau mai o ia e pei lava o tagata.

8A o i ai pea o ia i lona foliga tagata, sa fa‘amaulalo o ia e ia lava,

ma ‘ua usiusita‘i se‘ia o‘o ai lava ‘ina maliu, o le maliu lea i le satauro.

9O le mea lea ‘ua matuā fa‘aeaina ai o ia e le Atua,

ma foa‘iina atu ‘iā te ia le suafa e silisili i suafa uma lava.

10‘Ina ia to‘otuli tulivae uma lava i le suafa o Iesu,

o ē o i le lagi, ma ē o i le lalolagi,

ma ē o i lalo o le lalolagi.

11Ma ‘ia ta‘utino atu e laulaufaiva uma lava o Iesu Keriso o le Ali‘i lava o ia,

ia i‘u ai i le vi‘iga o le Atua le Tamā.

‘Ia Susulu e pei o le Malamalama i le Lalolagi

12O lenei, a‘u uō pele e, fa‘apei ‘ona ‘outou usiusita‘i mai e lē aunoa, ‘ia ‘outou galulue pea mo lo ‘outou fa‘aolataga i le mata‘u ma le gatete, e lē gata ‘ina o tatou nonofo ma ‘outou, a ‘ia sili atu ai ‘ina ‘ua ‘ou lē i ai;

13auā o lo‘o galue le Atua i totonu ‘iā te ‘outou, ‘ina ‘ia ‘outou loto i mea e finagalo malie ai o ia, ma ‘ia ‘outou galulue ai.

14‘Ia ‘outou faia mea uma lava e aunoa ma le muimui ma le fefinaua‘i;

15‘ina ‘ia ‘avea ‘outou ma tagata e lē ta‘uleagaina, ma ‘ua sao fo‘i la ‘outou amio, o le fānau a le Atua e lē ponā i totonu o le tupulaga amio pi‘opi‘o ma le finauvale. ‘Ua ‘outou susulu atu ‘iā te i latou e pei o mea e fa‘amalamalama a‘i le lalolagi,

16o lo‘o ‘outou tāofi mau le ‘upu o le ola, e fai ma mea ‘ou te mitamita ai i le aso o Keriso ‘ina ‘ua ‘ou lē momo‘e fa‘alēaogā, pe galue fa‘alēaogā.

17‘Āfai fo‘i e fa‘amaligiina lo‘u toto i luga o le taulaga, o le ofoina atu lea o lo ‘outou fa‘atuatua; o le mea lea ‘ou te ‘oli‘oli ai, tatou te ‘oli‘oli fo‘i fa‘atasi ma ‘outou uma lava.

18O le mea lea ‘ia ‘outou ‘oli‘oli ai, tatou te ‘oli‘oli fo‘i fa‘atasi ma a‘u.

O Timoteo ma Epaferoti

19‘Ou te fa‘amoemoe i le Ali‘i o Iesu ‘ou te vave ‘auina atu Timoteo ‘iā te ‘outou, ‘ina ‘ia fa‘afiafiaina ai fo‘i a‘u, pe a ‘ou iloa se tala ‘iā te ‘outou;

20auā e lē o ‘iā te a‘u se tagata e pei o ia, e naunau fa‘amaoni i mea e manuia ai ‘outou.

21Auā e sā‘ili e i latou uma a latou lava mea, ‘ae lē o mea a Iesu Keriso.

22A ‘ua ‘outou iloa lona fa‘amaoni; na ‘au‘auna o ia fa‘atasi ma a‘u i le Tala Lelei, e pei o se atali‘i ma lona tamā.

23O lea, ‘ua ‘ou fa‘amoemoe e ‘auina atu vave o ia pe a ‘ou iloa le mea e o‘o ‘iā te a‘u.

24Peita‘i, ‘ou te fa‘atuatua lava i le Ali‘i, ‘ou te vave alu atu fo‘i a‘u.

25A ‘ua ‘ou manatu e tatau ‘ona ‘auina atu ‘iā te ‘outou Epaferoti, o lo‘u uso lea o lē na ma galulue fa‘atasi, ma o ia lava sa ma tau fa‘atasi; o ia o la ‘outou sāvali, ma o lo‘o fesoasoani mai fo‘i o ia i lo‘u mativa.

26Auā sa naunau atu o ia ‘iā te ‘outou, ma sa popole fo‘i o ia, auā na ‘outou fa‘alogo mai o ma‘i o ia.

27Sa ma‘i lava o ia, semanū a oti; a ‘ua alofa le Atua ‘iā te ia, e lē gata ‘iā te ia, a o a‘u fo‘i, ‘ina ne‘i fa‘aopoopoina atili ‘iā te a‘u le fa‘anoanoa tele.

28O lea ‘ua atili ai ‘ona ‘ou ‘auina atu fa‘avave o ia, ‘ina ‘ia ‘outou ‘oli‘oli pe a ‘outou toe feiloa‘i ma ia, ma ‘ia feoloolo ai fo‘i lo‘u fa‘anoanoa.

29O lea ‘ia ‘outou talia ai o ia i le Ali‘i ma le ‘oli‘oli uma lava, ma ‘ia ‘outou fa‘aaloalo i tagata fa‘apenā.1 Kori 16.16; 1 Timo 5.17

30Auā na toetoe a oti o ia ‘ona o le galuega a Keriso, e le‘i fa‘apelepeleina fo‘i e ia lona ola, ‘ina ‘ia fa‘a‘ato‘atoaina e ia lo ‘outou ‘au‘auna mai ‘iā te a‘u.