1 Timoteo 4 - Samoan Contemporary New Testament

O A‘oa‘o Pepelo

1O lo‘o fetalai manino lelei mai le Agaga, o le a lafoa‘iina e nisi le fa‘atuatuaga i taimi mulimuli ane; e usiusita‘i i latou i agaga pepelo, ma mulimuli atu i a‘oa‘oga a temoni.2 Timo 3.1; 2 Pete 3.3; Iuta 18; 1 Ioane 2.18

2O nei a‘oa‘oga e sau mai le pepelo o tagata tala pepelo, o ē ‘ua fa‘ailogaina o latou loto fuatiaifo i le u‘amea ‘a‘asa;

3e fa‘asā e i latou le fa‘aipoipo, ma isi mea‘ai, o mea na faia e le Atua ia talia ma le fa‘afetai e i latou o ē e fa‘atuatua ma iloa le ‘upu moni.

4Auā o mea uma lava na faia e le Atua e lelei, e lē lafoa‘iina se tasi mea, pe ‘āfai e talia ma le fa‘afetai;

5auā ‘ua fa‘apa‘iaina i le afioga a le Atua ma le tatalo.

O le ‘Au‘auna Lelei a Keriso Iesu

6‘Āfai ‘e te tu‘uina atu nei fa‘atonuga i le au uso, o le a ‘avea oe ma ‘au‘auna lelei a Keriso Iesu, e fafagaina i ‘upu o le fa‘atuatua ma matā‘upu lelei ‘ua e tāofi i ai.

7A o tala leaga a fafine valevalematua, ia e ‘alo ‘ese ai. ‘Ia e fa‘amasani i le amioatua;

8auā e itiiti le aogā o le fa‘amasani i mea fa‘aletino, a o le fa‘amasani i le amioatua e aogā lea i mea uma lava, o lo‘o i ai le mea ‘ua folafolaina mai i le ola nei ‘atoa ma le ola o lo‘o lumana‘i.

9O le ‘upu moni lea e tatau ‘ona matuā talia.

10Auā o le mea lea o lo‘o tatou galulue ai ma taumafai malosi ai, auā tatou te fa‘amoemoe i le Atua soifua, o le Fa‘aola o ia o tagata uma lava, ‘ae maise lava ē e fa‘atuatua.

11‘Ia e fa‘atonu atu ma a‘oa‘o atu nei mea.

12‘Aua ne‘i ‘ino‘ino se isi i lou taule‘ale‘a; a ‘ia e tu‘uina atu i ē e fa‘atuatua se fa‘aa‘oa‘oga i lau tautala, ma le amio; i le alofa, i le fa‘amaoni ma le amio mamā.

13‘Ia e ‘auai atu i le faitauina o le Tusi Pa‘ia, ma tāla‘i atu, ma a‘oa‘o atu, se‘ia o‘o ‘ina ‘ou alu atu.

14‘Aua ne‘i e fa‘atamala i le meaalofa na tu‘uina atu ‘iā te oe i valo‘aga ma le fa‘ae‘e atu o lima o toeaina.1 Timo 5.22; 2 Timo 1.6; Galu 6.6; 8.17

15‘Ia e mafaufau i nei mea; ma ‘ia fa‘amasani i ai, ‘ia iloa ai e tagata uma lou alualu i luma.

16‘Ia e mataala i ia mea ‘atoa ma au a‘oa‘oga, ia e filigā i ai, auā a e faia ia mea e fa‘aolaina ai oe e oe lava, ‘atoa ma ē e fa‘alogologo ‘iā te oe.