Luka 11 - Samoan Contemporary New Testament

O le A‘oa‘oga a Iesu e Uiga i le Tatalo(Mata 6.9-13; 7.7-11)

1Sa tatalo Iesu i le isi mea. ‘Ua uma lana tatalo, ‘ona fai ane lea ‘iā te ia o le tasi o ona so‘o, “Le Ali‘i e, ia e a‘oa‘o mai ‘iā te i matou le faiga o tatalo, e pei ‘ona a‘oa‘o atu fo‘i e Ioane i ona so‘o.”

2‘Ona fetalai atu lea o Iesu ‘iā te i latou, “A ‘outou tatalo, ia fai atu:

‘Le Tamā e, o i le lagi,

ia pa‘ia lou suafa,

ia o‘o mai lou Mālō.

3‘Ia e foa‘i mai mea‘ai mo i matou i aso ta‘itasi.

4‘Ia e fa‘amāgalo i matou ‘iā matou agasala,

auā ‘ua matou fa‘amāgalo atu ia i latou uma, o ē e agaleaga mai ia i matou.

‘Aua fo‘i ‘e te ta‘ita‘iina i matou i le fa‘aosoosoga.’ ”

‘Ia Fa‘amaoni i le Tatalo

5‘Ona fetalai atu lea o Iesu i ona so‘o, “ ‘Āfai ana o se isi o ‘outou ‘ua alu atu i le fale o lana uō i le tulua o po, ma fai atu, ‘La‘u uō e, se‘i aumai lava ni nai areto se tolu.

6‘Ua sau la‘u uō i lana malaga ma afe mai i lo‘u fale, a ‘ua leai se mea‘ai e tali ai.’

7‘Āfai la e fa‘apea mai lana uō mai totonu, ‘Soia le fa‘alavelave mai. ‘Ua uma ‘ona fa‘amau le faitoto‘a; ‘ua matou ta‘o‘oto i le moega ma la‘u fānau; ‘ua ‘ou lē lavā toe tu i luga e avatu se mea ‘iā te oe.’

8‘Ou te fai atu, tusa pe lē tula‘i o ia ‘ona o oe o lana uō, ‘ae tula‘i lava ma avatu ‘iā te oe mea uma ‘e te mana‘o ai, ‘ona o lou saga fa‘atauānau pea.

9“O lea ‘ou te fai atu ai ‘iā te ‘outou: ‘Ia ‘outou ōle atu, ‘ona foa‘iina mai lea ‘iā te ‘outou; ‘ia ‘outou sā‘ili, ‘ona ‘outou maua ai lea; ‘ia ‘outou tu‘itu‘i atu, ‘ona tatalaina mai lea ‘iā te ‘outou.

10Auā o lē e ōle atu, e foa‘iina i ai; o lē e sā‘ili, e maua lava e ia, e tatalaina fo‘i le faitoto‘a i lē e tu‘itu‘i atu.

11O ai se isi o ‘outou tamā na te avatu i lona atali‘i se gata pe a tagi mai i se i‘a?

12Pe avatu ‘iā te ia se akarava pe a ōle mai i se fuāmoa?

13O le ā lava lo ‘outou leaga, ‘ae tou te iloa lava ‘ona avatu mea lelei ia ‘outou fānau. E lē sili ‘ea la ‘ona foa‘i mai e le Tamā i le lagi le Agaga Pa‘ia i e ōle atu ‘iā te ia?”

O Iesu ma Pelesepulo(Mata 12.22-30; Mare 3.20-27)

14Sa tulia e Iesu le temoni gūgū. ‘Ua alu i fafo le temoni, ‘ona fa‘ato‘ā tautala ai lea o le tagata. ‘Ona ofo tele ai lea o tagata;

15a o isi ‘ua fai ane, “O Pelesepulo le ali‘i o temoni ‘ua na avatua ‘iā te ia le mana e tutuli ai i latou.”

16‘Ua lamalama fo‘i isi ‘iā te ia, ma fesili atu mo se fa‘ailoga e iloa ai ‘ua ‘iā te ia le Atua.

17A ‘ua silafia e Iesu o latou manatu, ‘ona fetalai atu lea ‘iā te i latou, “O mālō uma e fevaevaea‘i e lē tumau; o se ‘āiga fo‘i e fevaevaea‘i e fa‘aumatia.

18‘Āfai la e fevaevaea‘i le mālō o Satani, e fa‘apefea ‘ona fa‘atumauina? A ‘ua ‘outou fai mai o Pelesepulo na ‘ou tulia ai temoni.

19‘Āfai o Pelesepulo na ‘ou tulia ai temoni, o ai la ‘ua tulia ai temoni e o ‘outou tagata? O lea ‘ua fa‘amaonia mai lo ‘outou sesē e ‘outou lava tagata.

20‘Āfai o le mana o le Atua ‘ua ‘ou tulia ai temoni, o lona uiga, ‘ua o‘o mai lava ‘iā te ‘outou le Mālō o le Atua.

21“A leoleoina e le tagata malosi ma ana ‘au‘upega uma lona fale, e saogalemū ana mea uma.

22‘Ae ‘āfai e osofa‘ia o ia e se isi e sili ‘ona malosi ‘iā te ia, ma fa‘ato‘ilalo ‘iā te ia, ‘ona fāoa ai lea o ana ‘au‘upega uma na ia fa‘alagolago i ai, ma tufatufa atu i isi.

23“O sē e lē au fa‘atasi ma a‘u, e tete‘e mai o ia ‘iā te a‘u; o sē e lē fa‘aputuputu fa‘atasi ma a‘u, o ia lea na te fa‘ata‘ape‘apeina.

O le Toe Fo‘i Mai o le Agaga Leaga(Mata 12.43-45)

24“A alu i fafo le agaga leaga nai le tagata, ‘ona fealualua‘i lea o ia i nofoaga matūtū e sā‘ili se mea e mālōlō ai; ‘āfai e lē maua, ‘ona fai ifo lea o ia, ‘Se‘i ‘ou toe fo‘i i lo‘u fale na ‘ou sau ai.’

25‘Ua toe fo‘i o ia i le fale, ma iloa ai ‘ua mamā ma ‘ua saunia lelei.

26‘Ona alu ai lea o ia ma ‘aumaia isi agaga e to‘afitu, e sili lo latou leaga i lo ia; ‘ua latou ō mai ma mau ai i inā. ‘Ona sili ai lea o le leaga o le i‘uga o lea tagata nai lo le amataga.”

O le Fiafia Moni

27A o fetalai Iesu i nei mea, sa vala‘au atu se fafine mai totonu o tagata e to‘atele, “ ‘Amu‘ia le manava na fānaua oe, ma susu na e susu ai.”

28A ‘ua tali atu Iesu, “E moni, ‘ae sili ai ‘ona ‘amu‘ia i latou o ē e fa‘alogo i le afioga a le Atua ma usita‘i i ai.”

O le Mana‘o Naunau mo se Vāvega(Mata 12.38-42)

29‘Ua lolofi ane pea tagata ‘iā Iesu, ‘ona fetalai atu lea o ia, “ ‘Ua matuā leaga tele tagata o lenei tupulaga! ‘Ua sā‘ili mai i latou i se fa‘ailoga e fai ma fa‘ailoga va‘aia o le mana o le Atua; peita‘i e leai se fa‘ailoga e tu‘uina atu ‘iā te i latou, vaganā le fa‘ailoga na faia ia Iona.

30Auā e pei ‘ona ‘avea le perofeta o Iona ma fa‘ailoga i tagata o Nineva, e fa‘apea fo‘i ‘ona ‘avea o le Atali‘i o le Tagata e fai ma fa‘ailoga mo tagata i aso nei.

52“Talofa ‘iā te ‘outou a‘oa‘o tulafono! ‘Ua ‘outou ‘ave‘esea le ki o le poto. ‘Ua ‘outou tāofi i latou o lo‘o fia ulu atu i ai, a o ‘outou tou te lē ulu lava i ai.”

53‘Ua maliu ‘ese Iesu nai lea mea, ‘ona matuā ita ai lea o faresaio ma a‘oa‘o tulafono, ‘ua tu‘ufesili fo‘i i latou e tau fa‘aosooso ‘iā te ia i mea e tele;

54ma taumafai e lamalama ma sā‘ili i sana ‘upu e ono molia ai o ia.