Galuega 23 - Samoan Contemporary New Testament

O le Fa‘amasinoga o Paulo

1‘Ua va‘ai toto‘a atu Paulo i le fono ma fai atu, “Uso e, na ‘ou ola mai e tusa ma le loto fuatia ifo e lelei i luma o le Atua, se‘ia o‘o mai lava i le asō.”

2‘Ona fai mai lea o le ositaulaga sili o Anania i ē na tutū ai, ia po atu i lona gutu.

3A ‘ua fai atu Paulo ‘iā te ia, “O oe o le pa ‘ua fa‘apa‘epa‘eina; o le a po oe e le Atua; ‘e te nofo ‘ea e fa‘amasino mai a‘u e tusa ma le tulafono, a ‘ua e solitulafono i lou fai ane ia po mai a‘u?”

4‘Ua fai mai ē na tutū ai, “ ‘Ua e fāifāi ‘ea i le ositaulaga sili a le Atua?”

5‘Ona fai atu lea o Paulo, “Uso e, ‘ou te le‘i iloa o ia o le ositaulaga sili; auā ‘ua tusia, ‘ ‘Aua ‘e te ‘upuleaga i le ali‘i o lou nu‘u.’ ”

6‘Ua iloa e Paulo o satukaio nisi o i latou, a o faresaio isi, ‘ona ‘alaga lea o ia i le fono, “Uso e, o a‘u nei o le faresaio, o le atali‘i o le faresaio; o le fa‘amoemoe i le toetū mai o ē ‘ua oti ‘ua fa‘amasinoina ai a‘u.”

7‘Ua fai atu e ia lea ‘upu, ‘ona fefinaua‘i ai lea o faresaio ma satukaio; ma ‘ua vaeluaina ai le fono.

8Auā fai mai satukaio e leai se toetū, po o se agelu, po o se agaga; ‘ae manatu faresaio e i ai uma mea ia.

9‘Ua tupu fo‘i le pisapisaō tele; ‘ona tula‘i lea o a‘oa‘o tulafono o le vaega a faresaio, ‘ua matuā finau malosi ma fai atu, “Matou te lē iloa se mea leaga i lenei tagata; a o le ā se manatu pe ‘āfai ‘ua tautala mai se agaga po o se agelu ‘iā te ia?”

10‘Ua tupu tele pea le finauga, ma ‘ua fefe le ta‘ita‘i‘au sili ‘ina ne‘i saeia Paulo e i latou. O lea na fai atu ai o ia i le ‘autau e ō ifo e toso ‘ese mai Paulo ‘iā te i latou, ma ta‘ita‘i atu i le ‘olo.

11‘Ua o‘o i le po na soso‘o ai, ‘ona tu mai lea o le Ali‘i i ona tafatafa, ma fetalai mai, “Paulo e, ia e lototele; auā e fa‘apei ‘ona e molimau ‘iā te a‘u i Ierusalema, e fa‘apea fo‘i ‘ona e molimau atu i Roma.”

‘Ua Lamalama Tagata Iutaia ia Fa‘aumatia Paulo

12‘Ua ao, ‘ona au fa‘atasi lea o tagata Iutaia e fai la latou tautoga, e lē ‘a‘ai pe feinu vaganā ‘ua fasiotia Paulo e i latou.

13E sili atu i le fasefulu i latou na ‘auai i lenei taupulepulega.

14‘Ua ō atu i latou i ositaulaga sili ma toeaina, ma fai atu, “ ‘Ua matou tautō matou te lē ‘a‘ai i sina mea e ‘ai se‘iloga ‘ua matou fasiotia Paulo.

15O lenei, ia fa‘ailoa atu e ‘outou ‘atoa ma le Fono i le ta‘ita‘i‘au sili, ‘ina ‘ia ta‘ita‘i ifo Paulo e ia ‘iā te ‘outou a taeao, e peiseaī o le a ‘outou matuā su‘esu‘eina mea e uiga ‘iā te ia; a o i matou ‘ua matou nofo sauniuni e fasioti ‘iā te ia, a o le‘i latalata mai o ia.”

16‘Ua fa‘alogo ai le tama a le tuafafine o Paulo i lenei lamalamaina o ia, ‘ona alu atu lea o ia, ‘ua ulufale i le ‘olo ma ta‘u atu ‘iā Paulo.

17‘Ona vala‘au lea e Paulo le isi ta‘ita‘i‘au ma fai atu i ai, “Ta‘ita‘i atu le taule‘ale‘a lenei i le ta‘ita‘i‘au sili; auā e i ai se mea o lo‘o fia ta‘uina atu i ai e ia.”

18‘Ona ‘ave lea o ia e le ta‘ita‘i‘au i le ta‘ita‘i‘au sili ma fai atu i ai, “Na vala‘au mai ‘iā te a‘u Paulo, lē ‘ua fusifusia, ma ‘ai‘oi mai ‘ina ‘ia ‘ou ta‘ita‘iina mai le taule‘ale‘a lenei ‘iā te oe. O lo‘o ‘iā te ia se mea e fia ta‘u atu ‘iā te oe.”

19‘Ona tago lea o le ta‘ita‘i‘au sili i le lima o le taule‘ale‘a, ma ‘ua ō ane na o i lā‘ua, ma fesili atu, “O le ā le mea o lo‘o e fia ta‘uina mai ‘iā te a‘u?”

20‘Ua fai mai o ia, “ ‘Ua au fa‘atasi tagata Iutaia e ‘ai‘oi atu ‘iā te oe, ‘ina ‘ia e ta‘ita‘iina ifo Paulo taeao i le Fono, peiseaī o le a latou matuā su‘esu‘eina o ia.

21‘Ae ‘aua ‘e te usiusita‘i ‘iā te i latou, auā o lo‘o lamalama mai o latou tagata e silia i le fasefulu ‘iā te ia; ‘ua tautō fo‘i i latou e lē toe ‘a‘ai pe feinu, se‘ia uma ‘ona fasioti o ia e i latou. ‘Ua sauniuni nei fo‘i i latou, ma o lo‘o fa‘atalitali mai i sau ‘upu.”

22‘Ona tu‘uina atu lea e le ta‘ita‘i‘au sili le taule‘ale‘a e alu, ma ‘ua fai atu i ai, “ ‘Aua ‘e te ta‘uina i se isi ‘ua e fa‘ailoa mai nei mea ‘iā te a‘u.”

‘Ua ‘Auina atu Paulo i le Kovana o Filiki

23‘Ua vala‘au atu o ia i ta‘ita‘i‘au e to‘alua, ma fai atu, “Sauni le ‘autau e to‘aluaselau e o i Kaisareia, ma ē e ti‘eti‘e i solofanua e to‘afitusefulu, ma ē e tau i tao e to‘aluaselau, ‘ia o‘o atu i le itūlā e iva i le po.

24‘Ia sauni fo‘i manu e fa‘ati‘eti‘e ai Paulo, ma avatu saogalemū o ia i le ali‘i kovana o Filiki.”

25‘Ua tusia fo‘i e le ta‘ita‘i‘au sili le tusi e fa‘apea:

26“O a‘u o Kalaotio Lusia, o lo‘o ‘ou alofa atu i le ali‘i kovana silisili o Filiki.

27Na pu‘ea o le tagata lenā e Iutaia, se manū a fasiotia o ia e i latou; ‘ona ‘ou tula‘i lea ma le ‘autau, ma lavea‘i ‘iā te ia; na ‘ou iloa fo‘i o le tagatanu‘u Roma o ia.

28Sa ‘ou fia iloa le mea na molia ai o ia e i latou, ‘ona ‘ou ta‘ita‘iina ifo lea o ia i la latou Fono.

29I le ‘ua ‘ou iloa o su‘esu‘ega lava i la latou tulafono na molia ai o ia; a ‘ua leai lava se mea na molia ai e tatau ‘ona oti ai pe sāisāia ai o ia.

30‘Ua fa‘ailoa mai fo‘i ‘iā te a‘u o le a fa‘ao‘o le pule a Iutaia i le tagata, ‘ona ‘ou ‘auina atu loa lea o ia ‘iā te oe. ‘Ua ‘ou poloa‘i atu fo‘i ia i latou o ē na molia mai o ia, ‘ina ‘ia molia atu o ia i ou luma.”

31‘Ona ‘ave lea o Paulo e le ‘autau, e pei ‘ona poloa‘iina ai i latou; ‘ua momoli atu o ia i le po i Anipateri.

32O le taeao na toe fo‘i mai ai i le ‘olo fitafita na savavali, a ‘ua o pea ma ia i latou o lo‘o ti‘eti‘e i solofanua.

33‘Ua taunu‘u i latou i Kaisareia, ‘ona avatu lea o le tusi i le ali‘i kovana ma ‘ua tu‘uina atu fo‘i Paulo ‘iā te ia.

34‘Ua faitau e le ali‘i kovana, ‘ona fesili mai lea po o fea lona nu‘u. ‘Ua iloa ai fo‘i e sau o ia mai Kilikia.

35‘Ona fai mai lea o ia, “O le a ‘ou fa‘alogo atu ‘iā te oe pe a o‘o mai ē na molia oe.” ‘Ona fa‘atonu atu lea e ia ‘ina ‘ia leoleoina Paulo i le maota o Herota.