1 Ioane 2 - Samoan Contemporary New Testament

O Keriso o lo Tatou Fesoasoani

1La‘u fānau e, ‘ou te tusi atu lenei mea ‘iā te ‘outou ‘ina ne‘i ‘outou agasala; ‘ae ‘āfai e agasala se isi, ‘ua ‘iā te i tatou lē e amiotonu, o lo‘o fautua i le Tamā, o Iesu Keriso lava lea.

2O le togiola o ia mo a tatou agasala, e lē na o i tatou, ‘ae ‘atoa fo‘i ma agasala a le lalolagi ‘atoa.

3‘Āfai tatou te tausia ana poloa‘iga, ‘ua tatou mautinoa ‘ua tatou iloa o ia.

4‘Āfai e fai mai se isi, “ ‘Ua ‘ou iloa o ia,” ‘ae lē tausia ana poloa‘iga, ‘ua pepelo lava lea tagata, e lē o ‘iā te ia fo‘i le ‘upu moni.

5A o le tagata na te tausia lana afioga, o ia lea ‘ua ‘ato‘atoa lona alofa i le Atua. O le mea lea tatou te mautinoa ai ‘ua tatou ola i le Atua.

6O lē e fai mai o lo‘o tumau o ia ‘iā te ia, e tatau ‘ona ola o lea tagata fa‘apei ‘ona ola o Keriso.

O le Poloa‘iga Fou

7A‘u uō pele e, e lē o se poloa‘iga fou ‘ou te tusi atu ai ‘iā te ‘outou, a o le poloa‘iga tuai, na ‘iā te ‘outou mai le amataga. O le poloa‘iga tuai o le ‘upu lea ‘ua uma ‘ona ‘outou fa‘alogo ai.

8‘Ae ui i lea, o le poloa‘iga ‘ou te tusi atu ai ‘iā te ‘outou, ‘ua moni lea mea ‘iā te ia ‘atoa ma ‘outou, auā ‘ua mavae atu le pouliuli a ‘ua pupula mai nei le malamalama moni.

9O lē e fai mai ‘ua ‘iā te ia le malamalama ‘ae ita i lona uso, o lo‘o i le pouliuli lava ia e o‘o mai i aso nei.

10O lē e alofa i lona uso o lo‘o tumau o ia i le malamalama, e leai fo‘i se mea o ‘iā te ia e ta‘ita‘iina ai se isi i le agasala.

11A o lē e ‘ino‘ino i lona uso, o lo‘o i le pouliuli lava ia, o lo‘o savali fo‘i i le pouliuli; e lē iloa fo‘i e ia le mea e alu i ai, auā ‘ua fa‘atauasoina ona mata e le pouliuli.

12La‘u fānau e, ‘ou te tusi atu ‘iā te ‘outou, auā ‘ua fa‘amāgaloina a ‘outou agasala ‘ona o lona suafa.

13Tamā e, ‘ou te tusi atu ‘iā te ‘outou, auā ‘ua ‘outou iloa o ia mai le amataga. Taulele‘a e, ‘ou te tusi atu ‘iā te ‘outou, auā ‘ua ‘outou manumālō i lē o lo‘o leaga.

14Tamaiti e, ‘ou te tusi atu ‘iā te ‘outou, auā ‘ua ‘outou iloa le Tamā. Tamā e, ‘ou te tusi atu ‘iā te ‘outou, auā ‘ua ‘outou iloa o ia mai le amataga, Taulele‘a e, ‘ou te tusi atu ‘iā te ‘outou, auā ‘ua ‘outou malolosi; o lo‘o ‘iā te ‘outou fo‘i le afioga a le Atua, ‘ua ‘outou fa‘ato‘ilaloina fo‘i lē o lo‘o leaga.

15‘Aua tou te manana‘o i le lalolagi po o mea o le lalolagi. ‘Āfai e alofa se isi i le lalolagi, e lē o ‘iā te ia le alofa i le Tamā.

16O mea uma o i le lalolagi, o tu‘inanau o le tino, ma tu‘inanau o mata ma le fa‘alialia o lenei olaga, e lē mai le Tamā ia ‘ae mai le lalolagi.

17E mavae atu le lalolagi ma ona tu‘inanau, a o lē e faia le finagalo o le Atua e tumau e fa‘avavau.

O le Fili o Keriso

18Tamaiti e, o aso nei e gata ai. ‘Ua ‘outou fa‘alogo ‘ua sau le fili o Keriso, ma o le ‘upu moni o lo‘o i ai nei fo‘i le to‘atele o fili o Keriso. O le mea lea ‘ua tatou iloa ai ‘ua o‘o mai aso e gata ai.

19‘Ua ō ‘ese atu i latou mai ‘iā te i tatou, ‘ae lē ni tagata o tatou i latou; ‘āfai o ni tagata o tatou i latou, latou te tumau ‘iā te i tatou. A ‘ua ō ‘ese i latou ‘ina ‘ia fa‘aalia ai e lē ni tagata o tatou i latou.

20A o ‘outou ‘ua ‘iā te ‘outou le Agaga Pa‘ia, na liligi ifo ‘iā te ‘outou e Keriso, o le mea lea ‘ua iloa ai e ‘outou uma le ‘upu moni.

21Na ‘ou tusi atu ‘iā te ‘outou, e lē ‘ina ‘ua ‘outou lē iloa le ‘upu moni, ‘ae peita‘i ‘ona ‘ua ‘outou iloa, auā e leai se pepelo e sau mai le ‘upu moni.

22O ai ‘ea le tagata pepelo? O ia lea ‘ua fai mai e lē o Iesu le Keriso. O lē fo‘i e fa‘afitia le Tamā ma le Alo, o le fili o ia o Keriso.

23Auā o lē e fa‘afitia le Alo, ‘ua fa‘afitia fo‘i e ia le Tamā; o lē e fa‘aali le Alo, ‘ua ‘iā te ia fo‘i le Tamā.

24A o ‘outou, ‘ia tumau ‘iā te ‘outou le mea na ‘outou fa‘alogologo ai mai le amataga. ‘Āfai e tumau ‘iā te ‘outou le mea na ‘outou fa‘alogologo ai mai le amataga, tou te tumau fo‘i i le Alo ma le Tamā.

25O le mea fo‘i lenei na folafola mai e Keriso ‘iā te i tatou, o le ola fa‘avavau.

26‘Ua ‘ou tusi atu ia mea ‘iā te ‘outou ‘ona o ē o lo‘o taumafai e ta‘ita‘i sesē ‘iā te ‘outou.

27A o ‘outou, ‘ua liligi ifo e Keriso lona Agaga i o ‘outou luga, tou te lē manana‘o fo‘i i se isi e a‘oa‘o ‘iā te ‘outou. Auā o le Agaga na te a‘oa‘o ‘iā te ‘outou i mea uma lava, o le mea fo‘i na te a‘oa‘o mai, e fa‘amaoni ia, e lē pepelo. O le mea lea ‘ia ‘outou usiusita‘i i a‘oa‘oga a le Agaga, ma ‘ia tumau ‘iā Keriso.

28O lenei, la‘u fānau e, ‘ia tumau ‘iā te ia, ‘ina ‘ia maua ai e i tatou le lototele pe a fa‘aali mai o ia, ia lē fa‘amāina fo‘i i tatou i ona luma i lona afio mai.

29‘Āfai ‘ua ‘outou iloa o ia o lē e amiotonu, tou te iloa ai o i latou uma lava e fai le amiotonu o le fānau a le Atua.