Efeso O le ‘Upu Tomua - Samoan Contemporary New Testament

O le ‘Upu TomuaO le Tusi a Paulo i le Ekalesia i Efeso, e fa‘atatau i fuafuaga a le Atua, o mea uma o i le lagi ma le lalolagi o Keriso o le ulu lea. Ma o lo‘o manino lelei pea le talanoa a Paulo i tagata Efeso, e ao lava ‘ona latou malamalama i le ‘a‘ano moni i nei fuafuaga a le Atua, o Keriso o le fa‘aolataga ma le fa‘a‘atoaga o tagata uma.I le vaega muamua o le tusi i le ekalesia i Efeso, o le talosaga a Paulo i le ola fealofani lea ‘ua ‘avea ai latou ma nu‘u filifilia ma tagata sa‘oloto ‘ona o Keriso auā o le Keriso lava e tasi lea o lo‘o latou tapua‘i i ai (2.11-22). Ma e tatau fo‘i ‘ona taumafai tagata uma ‘ia ola i se olaga e talafeagai ma le olaga fa‘a-Kerisiano (4.6-9).E tele se vaega o le tusi e talanoa ai Paulo e fa‘atusaina ai le Ekalesia o le tino a‘o Keriso o le ulu lea, ‘ua fa‘atusaina fo‘i i le fale a‘o Keriso o le ma‘a tulimanu lea, po o ‘ua fa‘aataina i le olaga fa‘aulugali‘i; o le Ekalesia o le avā, a‘o Keriso o le tane lea. So‘o se mea lava, ‘ia va‘aia i le malamalama o le alofa o Keriso, le faitaulaga, le fa‘amāgalo, le alofa ma le olaga mamā.O le to‘atele o tagata popoto i le ‘upu a le Atua, o le Tusi lenei sa tusia i le vaitaimi i le vā o le 61-63 vaitausaga o le Ali‘i.O le Fa‘asologa o Matā‘upuO le ‘Upu Fa‘afeiloa‘i 1.1-2O Keriso ma le Ekalesia 1.3-3.21O le ola fou ‘iā Keriso 4.1-6.20O ‘upu mulimuli 6.21-24