Filipi 3 - Samoan Contemporary New Testament

O le Amiotonu Moni

1O‘u uso e, o le toe manatu lenei: ‘Ia ‘outou ‘oli‘oli i le Ali‘i. ‘Ou te lē fiu e tusi atu ‘iā te ‘outou mea ‘ua uma fo‘i pei ‘ona ‘ou tusi atu ai, a o le a saogalemū ai ‘outou.Fili 2.18; 4.4

2‘Ia ‘outou fa‘aeteete i ta‘ifau, ‘ia ‘outou fa‘aeteete i ē e fai galuega leaga, ‘ia ‘outou fa‘aeteete mo ē e fa‘amanu‘a fua le tino;

3auā o le au peritomeina moni i tatou, o ē e ‘au‘auna i le Atua i le agaga, ma mitamita ‘iā Keriso Iesu, ‘ae lē fa‘alagolago i le tino.

4‘Ae lē fa‘apea ‘ua aunoa a‘u ma ni mafua‘aga e tatau ai ‘ona ‘ou fa‘alagolago i le tino; auā ‘āfai e manatu se isi o ‘iā te ia ni uiga fa‘apea, e sili atu ‘ona tele mea fa‘apenā ‘iā te a‘u.

5Na peritomeina a‘u ‘ina ‘ua valu aso talu ‘ona ‘ou fānau. O Isaraelu lo‘u nu‘u, i le itū‘āiga o Peniamina, o a‘u o le Eperu o sa Eperū. O a‘u o le faresaio i le itū tau le tulafono.Galu 26.5; Luka 1.59; 2.21; Roma 11.1

6O lo‘u mā‘elegā na ‘ou fa‘asauā ai i le ekalesia. E le‘i ta‘uleagaina fo‘i a‘u i le amiotonu e tusa ma le tulafono.

7Peita‘i o mea uma sa aogā ‘iā te a‘u, ‘ua ‘ou manatu ‘ua le aogā ia mea ‘ona o Keriso.

8O lenei, o lo‘u manatu moni lava ‘ua lē aogā mea uma ‘ona o le silisili ‘ese o le iloa o Keriso Iesu lo‘u Ali‘i. ‘Ua ‘ou fa‘alēaogāina mea uma lava ‘ona o ia, ma ‘ua ‘ou manatu o otaota ia mea, ‘ina ‘ia ‘ou maua Keriso,

9ma ‘ia maua fo‘i a‘u ‘ua i totonu ‘iā te ia. E leai sa‘u lava amiotonu e tusa ma le tulafono, peita‘i na o le amiotonu o lo‘o i le fa‘atuatua ‘iā Keriso, o le amiotonu lea mai le Atua i le fa‘atuatua;

10‘ina ‘ia ‘ou iloa o ia, ma le mana o lona toetū mai, ma ‘ia fa‘atasi a‘u ma ia i ‘ona puapuagā, ‘ona ‘ua fa‘atusaina a‘u ‘iā te ia i lona maliu,

11pe mafai lava ‘ona ‘ou o‘o atu i le toetū mai nai ē ‘ua oti.

Momo‘e Aga‘i i le Sini

12E lē fa‘apea ‘ua ‘ou maua nei, po ‘ua ‘ou ‘ato‘atoa ‘ona lelei; a ‘ou te tausisi atu pea pe mafai ‘ona ‘ou maua le mea na maua ai a‘u e Keriso Iesu.

13Uso e, ‘ou te lē manatu ‘ua ‘ou maua, a o le mea e tasi ‘ou te faia, ‘ou te fa‘agalogalo i mea ‘ua tuana‘i, ‘ou te momo‘e punoua‘i fo‘i i mea o lumana‘i,

14‘ou te tausisi atu i le fa‘ailoga, ia maua ai le taui na vala‘auina ai a‘u mai lugā e le Atua ‘iā Keriso Iesu.

15O lenei, o i tatou uma o ē ‘ua fai ma tagata matua, ‘ia tatou mafaufau fa‘apenā; ‘āfai fo‘i e ‘ese so ‘outou manatu i se isi itū, o le a ‘outou maua se fa‘aaliga mai le Atua e fa‘atatau i ai.

16A ‘ia fa‘amaoni la tatou amio e tusa ma le tulaga ‘ua tatou aulia.

17Uso e, ‘ia ‘outou fa‘aa‘oa‘o fa‘atasi mai ‘iā te a‘u, ma ‘ia ‘outou va‘ava‘ai i ē o savavali fa‘apea, fa‘apei ‘ona ‘avea i matou ma fa‘aa‘oa‘o ‘iā te ‘outou.

18Auā e to‘atele i latou o ē na ‘ou fai atu so‘o ai muamua, ma ‘ou te toe fai atu ai nei fo‘i ma loimata, o lo‘o fa‘aalia i o latou olaga o i latou o fili o le satauro o Keriso.

19O lo latou taunu‘uga o le malaia lea; o lo latou atua o le manava lea; ‘ua ‘avea ma o latou fiafiaga le mea e māasiasi ai; e loto fo‘i i latou i mea a le lalolagi.

20A o lo tatou nu‘u moni o lo‘o i le lagi, ma o ‘i‘inā tatou te feiloa‘i ai ma lo tatou Fa‘aola, o le Ali‘i lea o Iesu Keriso.Efe 2.6; Kolo 3.1; Epe 12.22

21O ia na te liua o tatou tino fa‘atauva‘a, ia fa‘atatau i lona tino mamalu, e tusa ma le mana na te mafaia ai ‘ona fa‘ato‘ilaloina mea uma ‘iā te ia lava.