2 Tesalonia 1 - Samoan Contemporary New Testament

O ‘Upu Fa‘afeiloa‘i

1O i matou o Paulo ma Siluano ma Timoteo, ‘ua matou tusi atu i le ekalesia i Tesalonia, o ē o i le Atua lo tatou Tamā ma le Ali‘i o Iesu Keriso.

2‘Ia ‘iā te ‘outou le alofa tunoa ma le manuia mai le Atua le Tamā ma le Ali‘i o Iesu Keriso.

O le Fa‘amasinoga pe a Afio mai Keriso

3Uso e, e tatau ‘ona matou fa‘afetai atu pea lava pea i le Atua ‘ona o ‘outou, e pei ‘ona tatau ai, auā ‘ua tupu tele lava lo ‘outou fa‘atuatua, ma ‘ua fa‘ateleina fo‘i le fealofani o ‘outou uma ta‘ito‘atasi.

4O le mea lea matou te mitamita ai ‘ona o ‘outou i ekalesia a le Atua, ‘ona o lo ‘outou ‘onosa‘i ma le fa‘atuatua i o ‘outou puapuagā po o sauāga, ‘atoa ma fa‘alavelave na ‘outou puapuagātia ai.

5O ‘outou o le molimau o le fa‘amasinoga tonu a le Atua, ‘ina ‘ia ta‘uaogāina ‘outou i le Mālō o le Atua, o le mea na tigāina ai ‘outou.

6O le amiotonu lava a le Atua o le a taui atu ai e ia i le puapuagā i latou o ē na fa‘apuapuagātiaina ‘outou.