Galuega 11 - Samoan Contemporary New Testament

‘Ua Tu‘uina atu e Peteru le Tala o le Galuega i le Ekalesia i Ierusalema

1‘Ua fa‘alogo le ‘au ‘aposetolo ma le au uso i Iutaia ‘ua talia e tagata o Nu‘u ‘ese le afioga a le Atua.

2‘Ua alu a‘e fo‘i Peteru i Ierusalema, ‘ona finau lea o ia ma tagata peritomeina.

3Fai mai i latou, “Na e alu i tagata e lē peritomeina, ma sa ‘outou ‘a‘ai fo‘i fa‘atasi ma i latou.”

4‘Ona amata loa lea ‘ona folafola atu fa‘asolo e Peteru ‘iā te i latou:

5“O a‘u nei sa ‘ou tatalo i le ‘a‘ai o Iopa. Na ‘ou iloa ai le fa‘aaliga ‘ina ‘ua fa‘aalia mai, o le mea pei se ‘ie lautele ‘ua tu‘utu‘u ifo mai le lagi i ona pito e fa; ‘ua o‘o mai lava ‘iā te a‘u;

6‘ua ‘ou va‘ai lelei i ai ma tau manatunatu, ‘ona ‘ou iloa atu lea o manu vaefā e tata‘a, ma manu fe‘ai, ma mea fetolofi, ma manu felelei.

7Na ‘ou fa‘alogo atu fo‘i i le si‘ufofoga ‘ua fa‘apea mai ‘iā te a‘u, ‘Peteru e, tu ia i luga e fasi ma ‘ai.’

8A ‘ua ‘ou fai atu, ‘Le Ali‘i e, ‘aua lava; auā e le‘i o‘o i lo‘u gutu sina mea‘ai e sa po o se mea e lē mamā.’

9A ‘ua toe tali mai ‘iā te a‘u le si‘ufofoga mai le lagi, ‘O mea ‘ua fa‘amamāina e le Atua, ‘aua ‘e te ta‘ua e sa.’

10Na faia fa‘atolu lenei mea, ‘ona toe sisi a‘e lea o mea uma lava i le lagi.

11I le sa tutū loa mai tagata e to‘atolu i le fale sa ‘ou i ai, na ‘auina mai ‘iā te a‘u mai Kaisareia.

12Na fai mai le Agaga ‘iā te a‘u matou te o ma i latou, ‘aua lava ne‘i toe fa‘atali. Na matou o fo‘i ma le au uso nei e to‘aono, na matou ulu atu fo‘i i le fale o Konelio.

13‘Ua tala mai fo‘i o ia ‘iā te i matou i lona va‘ai atu i le agelu na tu mai i lona fale, ma fai mai ‘iā te ia, ‘ ‘Inā ‘auina atu ia ni tagata i Iopa, e ‘a‘ami Simona o lē ‘ua ta‘ua fo‘i o Peteru;

14e ta‘u atu e ia ‘iā te oe ‘upu e fa‘aolaina ai oe, ‘atoa ma lou ‘āiga uma lava.’

15Na amata ‘ona ‘ou tautala atu, ‘ona afio ifo lea o le Agaga Pa‘ia ‘iā te i latou, fa‘apei ‘ona afio mai ‘iā te i tatou i le amataga.

16‘Ona ‘ou manatua ai lea o le afioga a le Ali‘i na fai mai, ‘Na papatiso atu lava Ioane i le vai, ‘ae papatisoina ‘outou i le Agaga Pa‘ia.’

17O lea la, ‘āfai e tutusa le alofa ‘ua foa‘iina mai e le Atua ‘iā te i tatou ‘atoa fo‘i ma i latou, ‘ina ‘ua fa‘atuatua i le Ali‘i o Iesu Keriso, o ai ‘ea a‘u nei ‘ou te mafaia ai ‘ona vavao le Atua?”

18‘Ua fa‘alogo mai i latou i ia ‘upu, ‘ona fa‘alologo lea o i latou. ‘Ua vivi‘i atu fo‘i i latou i le Atua ma fai ane, “E moni lava ‘ua foa‘iina e le Atua i tagata o Nu‘u ‘ese le salamō e ola ai.”

O le Ekalesia i Anetioka

19Na ō atu fo‘i ē na fa‘ata‘ape‘apeina i le sauāga na tupu ‘ina ‘ua oti Setefano, ‘ua o‘o lava i Foinie, ma Kuperu, ma Anetioka, ‘ua lē tautala atu i le ‘upu i se isi, ‘ae na o tagata Iutaia lava.Galu 8.1-4

20O tagata Kuperu ma Kurene fo‘i nisi o i latou, ‘ua ō atu i Anetioka; ‘ua tautala atu i tagata Iutaia e tautala i le gagana Eleni, ma tāla‘i atu le Tala Lelei i le Ali‘i o Iesu.

21Sa ‘iā te i latou fo‘i le ‘a‘ao o le Ali‘i; ‘ua fa‘atuatua fo‘i tagata e to‘atele, ma ‘ua liliu mai i le Ali‘i.

22‘Ua fa‘alogo le ekalesia i Ierusalema i lea tala; ‘ona ‘auina atu lea e i latou Panapa, ia alu atu o ia ‘ia o‘o lava i Anetioka.

23‘Ua taunu‘u o ia ma ‘ua na va‘aia le alofa tunoa o le Atua, ‘ona ‘oli‘oli lea o ia, ma apoapoa‘i atu ‘iā te i latou uma ‘ia tumau o latou loto, ma pipi‘i atu i le Ali‘i.

24Auā o le tagata amiolelei o ia, ‘ua tumu i le Agaga Pa‘ia ma le fa‘atuatua; ‘ua fa‘aopoopoina ai fo‘i tagata e to‘atele lava i le Ali‘i.

25‘Ona alu lea o Panapa i Taso e sā‘ili mai Saulo.

26‘Ua maua o ia, ‘ona ‘aumaia lea e ia i Anetioka. ‘Ua fa‘atasi fo‘i i lā‘ua ma le ekalesia, ‘ua ‘atoa le tausaga, ma ‘ua a‘oa‘o atu i tagata e to‘atele; o Anetioka fo‘i na ulua‘i ta‘ua ai lava so‘o, o Kerisiano.

27O aso ia na ō ifo ai perofeta mai Ierusalema i Anetioka.

28Na tula‘i fo‘i le isi o i latou, o Akapo le igoa, ‘ua fa‘aali e le Agaga ‘iā te ia o le a o‘o le oge tele i le lalolagi uma; na taunu‘u lava lea mea i le nofoa‘iga a Kaisara Kalaotio.Galu 21.10

29‘Ona filifili ta‘ito‘atasi lea o so‘o e fa‘atatau i le mea e mafai e le tagata, ‘ina ‘ia ‘auina atu se meaalofa i le au uso o lo‘o nonofo i Iutaia;

30na faia lava lea mea e i latou, ma ‘auina atu e o ma Panapa ma Saulo e ‘ave i toeaina.