Galuega 19 - Samoan Contemporary New Testament

O Paulo i Efeso

1O aso ia sa i ai Apolo i Korinito, a ‘ua te‘a ‘ese atu Paulo i le nu‘u maualuga, ma taunu‘u atu ai i Efeso; ‘ua iloa ai e ia i ‘ina isi so‘o.

2‘Ona fai atu lea o ia ‘iā te i latou, “Na ‘outou maua ‘ea le Agaga Pa‘ia ‘ina ‘ua ‘outou fa‘atuatua?”

‘Ua tali mai i latou ‘iā te ia, “Matou te le‘i fa‘alogo lava e i ai se Agaga Pa‘ia.”

3‘Ona fai atu lea o ia ‘iā te i latou, “O le ā le mea na papatisoina ai ‘outou?”

‘Ua tali mai i latou, “O le papatisoga a Ioane.”

4‘Ona fai atu lea o Paulo, “Na papatiso atu Ioane i le papatisoga o le salamō, ma fai atu i tagata ‘ia fa‘atuatua i lē o lo‘o mulimuli mai, o Iesu lea.”

5‘Ua fa‘alogo atu i latou, ‘ona papatisoina lea i le suafa o le Ali‘i o Iesu.

6‘Ua fa‘ae‘e atu fo‘i e Paulo ona lima ‘iā te i latou, ‘ona o‘o mai lea o le Agaga Pa‘ia ‘iā te i latou; ‘ona tautala ai lea o i latou i gagana ‘ese‘ese ma vavalo atu.

7O ia tagata uma pe tusa ma le to‘asefulu ma le lua i latou.

8‘Ua ulufale Paulo i le sunako ma lauga atu ma le lototele, o lo‘o finau atu ma a‘oa‘o atu ‘iā te i latou i mea a le Mālō o le Atua, i masina e tolu.

9A ‘ua loto ma‘a‘a pea nisi, ma ‘ua lē talitonu, ma ‘ua ‘upuleaga mai i lenei lotu i luma o tagata e to‘atele; ‘ona alu ‘ese lea o Paulo mai ‘iā te i latou, ma ‘ua ‘ave e ia so‘o fa‘atasi ma ia; ‘ua tautala atu fo‘i o ia i lea aso ma lea aso i le falea‘oga o le tagata e igoa ia Turano.

10E lua tausaga o faia e ia lenei mea, o lea na fa‘alogo ai i le afioga a le Ali‘i o Iesu i latou uma lava sa nonofo i Asia, o tagata Iutaia ‘atoa ma tagata Eleni.

O Atali‘i o Seva

11‘Ua faia fo‘i e le Atua vāvega uiga ‘ese i lima o Paulo;

12o lea ‘ua avatu ai solosolo ma ‘ie tali ‘ele‘ele sa i lona tino i ē sa mama‘i; ‘ona mavae loa lea o latou ma‘i, ‘ua ō ‘ese fo‘i agaga leaga sa ‘iā te i latou.

13‘Ona taumafai malosi lea o tagata fai togafiti fa‘ataulāitu o Iutaia, e ta‘u atu le suafa o le Ali‘i o Iesu i ē na i ai agaga leaga, ma fai atu, “Matou te matuā fai atu ‘iā te ‘outou i le suafa o Iesu, o lē ‘ua tala‘iina e Paulo.”

14Sa fai lenei mea e nisi tagata, o atali‘i ia e to‘afitu o Seva, o le tagata Iutaia, o le ositaulaga sili.

15A ‘ua tali mai le agaga leaga ma fai mai, “ ‘Ua ‘ou iloa Iesu, ‘ua ‘ou iloa fo‘i Paulo, a o ai ‘ea ‘outou nā?”

16‘Ona oso mai lea o le tagata ‘ua i ai le agaga leaga, ‘ua manumālō ‘iā te i latou, a ‘ua faia‘ina i latou ‘iā te ia; ‘ona sosola ai lea o i latou i fafo mai le fale, ‘ua lē lavalavā ma ‘ua manunu‘a.

17‘Ua iloa lenei mea e i latou uma lava sa nonofo i Efeso, o tagata Iutaia ‘atoa ma Eleni, ‘ona matata‘u tele ai lea o i latou uma, ‘ua vi‘ia fo‘i le suafa o le Ali‘i o Iesu.

18‘Ua ō mai fo‘i i latou e to‘atele o ē ‘ua fa‘atuatua, ‘ua ta‘utino mai ma fa‘aali mai a latou amio.

19E to‘atele ē na fai togafiti fa‘ataulāitu; na fa‘apotopotoina e i latou a latou tusi ma susunuina i luma o i latou uma, ma ‘ua iloa ai e limasefulu afe tupe siliva le tau o ia tusi uma.

20O lea ‘ua matuā tupu tele ai ma ‘ua manumālō le afioga a le Ali‘i.

O le Vevesi i Efeso

21‘Ua mavae ia mea, ‘ona manatu lea o Paulo a uma ‘ona ui atu i Maketonia ma Akaia, ‘ona alu lea o ia i Ierusalema. ‘Ua fai ane fo‘i o ia, “A uma ‘ona ‘ou i ai i inā, e tatau ‘ona ‘ou asiasi i Roma.”

22‘Ona ‘auina atu lea e ia i Maketonia tagata e to‘alua o ē na ‘au‘auna ‘iā te ia, o Timoteo ma Erato, a o ia ‘ua nofo ai pea i se taimi umi i Asia.

23O aso ia ‘ua tupu ai le vevesi tele ‘ona o le Ala o le Ali‘i.

24Auā o le isi tagata e igoa ia Temetiu, o le tagata gaosi fa‘atagata siliva o ia, o lē sa faia fa‘atusa siliva o le malumalu o Tiana, ma sa maua ai ‘oloa e tele mo tufuga.

25‘Ua fa‘apotopoto i latou e ia ‘atoa ma le ‘au faigaluega i mea fa‘apenā, ma ‘ua fai atu, “Ali‘i e, ‘ua ‘outou iloa o le galuega lenei ‘ua tatou mau‘oloa ai.

26‘Ua ‘outou iloa fo‘i ma ‘outou fa‘alogo, e lē gata i Efeso, a ‘ua toetoe ‘ina so‘o Asia ‘atoa o fa‘aliliu‘eseina ai e lenā Paulo tagata e to‘atele, i lona fai atu i ai, o atua uma ‘ua faia e lima e le ni atua.

27E lē gata ‘ina maumau a latou galuega o le a tu‘ulafoa‘iina, peita‘i e ta‘ulēaogāina fo‘i le malumalu o le atua fafine silisili o Tiana, o le a fa‘aumatia lona mamalu, o lo‘o tapua‘i i ai Asia uma lava ‘atoa ma le lalolagi uma.”

28‘Ua fa‘alogo i latou i lenei mea, ‘ona tūtūmu ai lea o i latou i le ita tele, ‘ua ‘alalaga atu, “E silisili Tiana o Efeso.”

29‘Ua lolofi mai le ‘a‘ai ‘atoa, ‘ua pu‘eina fo‘i Kaio ma Aritako, o tagata Maketonia o le au malaga a Paulo, ma ‘ua ō atu fa‘anatinati fa‘atasi i latou i le fale mata‘aga;

30‘ua mana‘o Paulo e o fa‘atasi ma tagata ‘ae lē mafafai so‘o.

31O isi ali‘i o Asia o ē na alolofa ‘iā te ia, na ‘auina atu e i latou nisi ‘iā te ia, ma ōle atu i ai e ‘aua le alu fa‘amalosi i le fale mata‘aga.

32‘Ua ‘alalaga solo tagata i lea mea ma lea mea; auā ‘ua so‘ona vevesi le fa‘apotopotoga, ‘ua lē iloa fo‘i e le to‘atele le mea na potopoto ai i latou.

33‘Ua fa‘atūina atu Alesana e nisi o le fa‘apotopotoga ‘ina ‘ua tu‘uina atu o ia e Iutaia. ‘Ona tālo atu lea e Alesana lona lima, ‘ua fia fa‘atonu atu e ia le nu‘u.

34‘Ua iloa e i latou o le tagata Iutaia o ia, ‘ona tasi ai lea o latou leo uma lava, pe tusa ma le lua itūlā o ‘alalaga i latou, “ ‘Ua silisili Tiana o Efeso.”

35‘Ua fa‘afilemūina tagata e le a‘oa‘o tulafono o le ‘a‘ai, ‘ona fai atu lea o ia, “O ‘outou tagata Efeso, o ai ‘ea le tagata lea, na te lē iloa o lo‘o ‘au‘auna le ‘a‘ai lenei o Efeso i le malumalu o le atua fafine silisili o Tiana, ma le tupua na pa‘ū ifo mai le lagi?

36O lea, ‘ona e lē mafai ‘ona ta‘usesēina e se isi nei mea, e tatau la ‘ona ‘outou nonofo filemū, ma ‘aua ne‘i so‘ona faia se mea.

37Auā ‘ua ‘outou ta‘ita‘iina mai tagata ‘i‘inei, ‘ae lē o ni tagata e fao mea pa‘ia, po ‘ua ‘upuvale fo‘i i latou i lo ‘outou atua fafine.

38O lea, ‘āfai o ia Temetiu ma lana au tufuga se mau i se isi, e i ai aso e fai ai fono, o lo‘o i ai fo‘i kovana e molia i ai e le tasi le isi.

39Peita‘i, ‘āfai tou te sā‘ili atu i nisi mea, e fa‘atonuina lea mea i le fono e tala‘iina.

40Auā e ono molia i tatou ‘ona o le vevesi vale i le fono i lenei aso, ‘ona ‘ua leai lava sa tatou ‘upu e mafai ‘ona fa‘atonuina atu ai lenei pisapisaō.”

41‘Ua uma atu ia ‘upu, ‘ona fa‘atū‘ua lea o le fa‘apotopotoga e ia.