Eperu 5 - Samoan Contemporary New Testament

1Auā o ositaulaga sili uma lava ‘ua filifilia mai i tagata, ‘ua tofia i latou mo tagata i mea a le Atua, ‘ina ‘ia faitaulaga i latou i meaalofa ma taulaga mo agasala,

2e mafaia e i latou ‘ona agamalū i ē ‘ua valelea ma ē ‘ua sesē, ‘ina ‘ua si‘omia fo‘i i latou i le vāivāi.

3O le mea fo‘i lea ‘ua osi ai e i latou taulaga, e lē gata ‘ina totogi a‘i agasala a le nu‘u, ‘ae fa‘apenā fo‘i a latou lava agasala.

4E lē so‘ona faia fua fo‘i e se isi lenei galuega mamalu, vaganā ai lē ‘ua filifilia e le Atua e pei o Arona.

5E fa‘apenā fo‘i Keriso, sa lē fa‘amaualugaina o ia e ia lava ‘ina ‘ia ‘avea o ia ma ositaulaga sili, a o le Atua lava na tofia o ia, ma fetalai mai,

“O lo‘u Atali‘i pele oe,

‘ua ‘ou fānaua oe i le aso nei.”

6E pei fo‘i ‘ona fetalai mai o ia i le isi ‘upu,

“O le ositaulaga oe e fa‘avavau,

e uiga fa‘atasi ma Mekisateko.”

7O ia lenei sa tatalo atu i ona po na tino tagata ai, ma ‘ai‘oi atu ma le tagi tele ma loimata i lē na mafaia ‘ona fa‘aola ‘iā te ia nai le oti, na fa‘afofogaina fo‘i o ia ‘ona o lona migao.

8E ui lava ‘ina o ia o le Alo, a o mea sa puapuagātia ai o ia, na a‘oa‘oina ai o ia ‘ia usiusita‘i,

9‘ua fa‘a‘ato‘atoaina fo‘i o ia, ‘ona ‘avea ai lea o ia ma tupuga o le fa‘aolataga e fa‘avavau mo i latou uma o ē e usiusita‘i ‘iā te ia;

10‘ua ta‘ua fo‘i o ia e le Atua o le ositaulaga sili e uiga fa‘atasi ma Mekisateko.

O le Lapata‘iga e Uiga i le Tu‘ua o le Fa‘atuatua

11E tele lava ‘upu matou te fia tautala atu ai e uiga i lenei matā‘upu, ‘ae faigatā ‘ona fa‘amatala atu, ‘ona ‘ua ‘avea ‘outou ma tagata a‘oa‘ogatā.

12Auā fo‘i e ui lava ‘ina ‘ua leva ‘ona tatau ‘ona ‘avea ‘outou ma a‘oa‘o, ‘ae tatau lava ‘ona i ai se isi na te a‘oa‘oina ‘outou i matā‘upu muamua o le afioga a le Atua; ‘ua ‘avea fo‘i ‘outou ma tagata e tatau i ai le suāsusu ‘ae lē o mea ‘a‘ano.

13Auā o i latou uma ‘ua fa‘asusuina i le suāsusu, e lē atamamai i latou i le ‘upu o le amiotonu; auā o tama meamea i latou;

14a o mea ‘a‘ano, e fetaui tonu lea i tagata matutua, o ē e masani ‘ona lagona ‘ua a‘oa‘oina so‘o, ma iloa ai le lelei ma le leaga.