Filipi 1 - Samoan Contemporary New Testament

O ‘Upu Fa‘afeiloa‘i

1O Paulo ma Timoteo, o ‘au‘auna a Keriso Iesu. O le tusi i le au pa‘ia uma o ‘iā Keriso Iesu o lo‘o i Filipi, ‘atoa ma epikopo ma tiakono.

2‘Ia ‘iā te ‘outou le alofa tunoa, ma le manuia mai le Atua lo tatou Tamā, ‘atoa ma le Ali‘i o Iesu Keriso.

O le Tatalo a Paulo mo ē e Faitau i le Tusi

3‘Ou te fa‘afetai i lo‘u Atua i taimi uma ‘ou te manatu ai ‘iā te ‘outou,

4e lē aunoa fo‘i ‘ona ‘ou ōle atu ma le fiafia i a‘u tatalo uma mo ‘outou uma lava,

5‘ona o lo ‘outou mafuta fa‘atasi i le Tala Lelei, e amata mai i le ulua‘i aso se‘ia o‘o mai i le taimi nei.

6‘Ua ‘ou mautinoa fo‘i o lē na amataina le galuega lelei ‘iā te ‘outou, o ia lava lea na te fa‘a‘ato‘atoaina i le aso o Iesu Keriso.

7‘Ua tatau ‘ona ‘ou manatu fa‘apenā ‘iā te ‘outou uma; auā ‘ua teuina ‘outou i lo‘u loto, ‘ona ‘ua tatou ‘auai fa‘atasi ma a‘u i le alofa tunoa, i le taimi na ‘ou i ai i le falepuipui ‘atoa ma lo‘u tu atu e fa‘amaonia le Tala Lelei.

8Auā ‘ua silafia e le Atua lo‘u naunau ‘iā te ‘outou uma lava, i le alofa naunauta‘i o Iesu Keriso.

9O la‘u tatalo fo‘i lenei, ia fa‘atuputeleina pea lava lo ‘outou alofa, ma le iloa lelei, ‘atoa ma le fa‘autauta uma,

10‘ina ‘ia ‘outou lagolagoina le mea e lelei ‘ato‘atoa. ‘Ona ‘avea ai lea o ‘outou ma tagata e mamā ma e sao ‘ona lelei i le aso o Keriso.

11E fa‘atūmulia fo‘i ‘outou i fua o le amiotonu mai ‘iā Iesu Keriso, ‘ina ‘ia vi‘ia ma fa‘ane‘ene‘eina ai le Atua.

O le Ola ‘iā Keriso

12Uso e, ‘ou te mana‘o ‘ina ‘ia ‘outou iloa, o mea na o‘o ‘iā te a‘u, ‘ua fesoasoani ia e fa‘alauteleina atili ai le Tala Lelei.

13O lea ‘ua fa‘aalia ai le noanoatia o a‘u ‘ona o Keriso, i le fale uma o le ‘au e leoleo ‘atoa ma isi mea uma.

14O le to‘atele fo‘i o le au uso o i le Ali‘i, ‘ua matuā fa‘atuatua ‘ona o le noanoatia o a‘u; ‘ua atili ai ‘ona fa‘amalosi i latou e tautala atu i le afioga a le Atua e aunoa ma le fefe.

15E i ai isi ‘ua tāla‘i atu Keriso ma le matau‘a ma le finau vale, a o isi fo‘i ‘ua tāla‘i atu ma le lotolelei.

16O ē e tāla‘i ma le alofa, ‘ua iloa e i latou na tu‘uina a‘u ‘i‘inei ‘ina ‘ia ‘ou tu atu e finau mo le Tala Lelei.

17A o ē e tala‘iina Keriso ma le finau vale, e lē faia ma le fa‘amaoni e i latou lea mea, a ‘ua faia ma le manatu ia fa‘aopoopo mai ai le puapuagā i o‘u noanoataga.

18A fa‘apefea nei la? E ui lava i faiga uma, pe fa‘atagā fai, pe fai ma le fa‘amaoni, ‘ua tala‘iina atu ai Keriso, o le mea lenā ‘ou te ‘oli‘oli ai.

19O le mea lea, o le a ‘ou ‘oli‘oli lava, auā ‘ua ‘ou iloa e i‘u atu le mea lenei i le lavea‘iina o a‘u, ‘ona o ā ‘outou tatalo ‘atoa ma le fesoasoani mai o le Agaga o Iesu Keriso.

20O lo‘o ‘ou naunau tele ma fa‘amoemoe ‘ina ‘ia ‘ou lē ma i se mea e tasi, a ‘ia ‘ou matuā fa‘amalosi fa‘apei ‘ona ‘ou faia e lē aunoa, e fa‘apea fo‘i i aso nei, ‘ina ‘ia vi‘ia ai Keriso i lo‘u tino, i le ola po o le oti.

21Auā o lo‘u ola ‘ua ‘iā Keriso lea; a o lo‘u oti o lo‘u manuia lea.

22‘Āfai ‘ou te ola i le tino, e fua mai le galuega mo a‘u. Peita‘i, ‘ou te lē iloa po o lē fea tonu le mea ‘ou te filifilia.

23Auā ‘ua ‘ou fa‘alētonu i manatu e lua; ‘ou te naunau tele ‘ou te alu, ‘ina ‘ia fa‘atasia a‘u ma Keriso; o le mea lea e sili ‘ona lelei.

24Peita‘i ia ‘ou tumau i le tino, o le mea lea e sili ‘ona aogā ‘iā te ‘outou.

25‘Ua ‘ou mautinoa le mea lenei, ‘ou te tumau; tatou te tūtūmau fa‘atasi fo‘i, ‘ina ‘ia alualu pea ‘outou ma ‘ia fiafia i le fa‘atuatua;

26‘ina ‘ia fa‘atuputeleina ai lo ‘outou ‘oli‘oli ‘iā Keriso Iesu ‘ona o a‘u, i lo‘u toe alu atu ‘iā te ‘outou.

27Tau lava ‘ina ‘ia tusa ai la ‘outou amio ma le Tala Lelei ‘iā Keriso, pe ‘āfai ‘ou te alu atu ma feiloa‘i ma ‘outou, po o lo‘u nofo ‘ese fo‘i nai ‘iā te ‘outou, ia ‘ou iloa lava sina tala ‘iā te ‘outou, e tusa ma lo ‘outou tumau i le agaga e tasi, ma le manatu e tasi, o lo‘o finau fa‘atasi mo le fa‘atuatuaga ‘ua i le Tala Lelei.Kolo 1.10; Fili 4.3; 1 Tesa 2.12

28A ‘ia lē fa‘amata‘uina ‘outou i se mea e tasi e i latou o ē e tete‘e mai. O le fa‘ailoga lea ‘iā te i latou o le malaia; a o le fa‘ailoga o le ola ‘iā te ‘outou; ma o lea lava fa‘ailoga e mai le Atua.

29Auā ‘ua foa‘iina fua mai ‘iā te ‘outou ‘ona o Keriso, e lē tau ‘ina fa‘atuatua ‘iā te ia, a ‘ia fa‘atigāina fo‘i ‘outou ‘ona o ia.

30‘Ua aofia ai fo‘i ‘outou i lea lava tauiviga sa ‘outou va‘ai i ai, ma ‘ua ‘outou fa‘alogo nei i ai ‘iā te a‘u.