Roma 3 - Samoan Contemporary New Testament

‘Ua Nofo Sala Tagata Uma

1O le ā ‘ea se mea ‘ua sili ai le tagata Iutaia? O le ā fo‘i se aogā o le peritomeina?

2E i ai mea e tele! O le mea muamua, o tagata Iutaia na tu‘uina mai i ai afioga a le Atua.

3‘Ae fa‘apefea la pe ‘āfai e lē fa‘amaoni nisi? E ‘avea ‘ea le lē fa‘amaoni o i latou ma mea e fa‘alēaogāina ai le fa‘amaoni o le Atua?

4E leai lava. Tusa lava pe lē fa‘amaoni tagata uma, e fa‘amaoni pea lava le Atua; e pei ‘ona tusia:

“E tatau ‘ona ta‘uamiotonuina oe i au ‘upu,

e tatau fo‘i ‘ona e mālō pe a fa‘amasinoina oe.”

5‘Āfai ‘ua ‘avea la tatou amioleaga ma ala e fa‘aalia manino mai ai le amiotonu a le Atua, o le ā sa tatou ‘upu e fai i lea mea? ‘Ua lē amiotonu ‘ea le Atua ‘ina ‘ua fa‘ao‘o mai lona to‘asā ‘iā te i tatou? (‘Ua ‘ou tautala atu i le gagana fa‘aletagata i lenei mea.)

6E leai lava. Auā, e fa‘apefea la ‘ona fa‘amasinoina le lalolagi e le Atua?

7Peita‘i, ‘āfai e ‘avea lo‘u pepelo ma mea e fa‘ateleina atili ai le fa‘amaoni o le Atua e o‘o ai i lona vi‘iga, aiseā la ‘ua fa‘amasinoina ai pea a‘u e pei o se tagata agasala?

8Aiseā fo‘i la e lē faia ai le amioleaga, ‘ina ‘ia tupu mai ai le lelei? e pei ‘ona pepelo ane ai nisi fa‘apea na matou fai atu fa‘apenā. ‘Ua sa‘o lelei le fa‘asalaga o i latou na.

E leai se Tagata e Amiotonu

9O le ā ‘ea le uiga o lenei mea? E sili ‘ea i tatou tagata Iutaia i lo tagata o Nu‘u ‘ese? E leai lava! Auā ‘ua uma ‘ona ‘ou fa‘aali atu o tagata uma, o Iutaia ‘atoa ma Eleni, ‘ua nofo sala.

10E pei ‘ona tusia:

“E leai sē e amiotonu, e leai lava se isi,

11e leai se isi e malamalama,

e leai fo‘i se isi o sā‘ili i le Atua.

12‘Ua liliu ‘ese tagata uma,

‘ua o fa‘atasi i latou i le leaga;

e leai lava se isi o i latou e amio lelei, e o‘o lava i se tagata e to‘atasi.

13‘Ua pei o se tu‘ugamau fa‘amaga o latou fa‘a‘ī,

‘ua fa‘a‘ole‘ole o latou laulaufaiva.

O lo‘o i o latou laugutu le mea ‘o‘ona a le gata.

14‘Ua tumu o latou gutu i le fetu‘u ma ‘upu fa‘atigā.

15‘Ua televavave o latou vae i le fa‘amaligiina o le toto.

16O lo‘o i o latou ala le fa‘atafunaiina ma le puapuagā;

17‘ua lē iloa e i latou le ala o le manuia.

18E matuā leai lava so latou mata‘u i le Atua.”

19O lenei, ‘ua tatou iloa, so o se mea lava ‘ua fai mai ai le tulafono, e fa‘asino tonu lava lea i ē o lo‘o nonofo i le tulafono, ‘ina ‘ia punitia gutu uma lava, ma ‘ia nofo sala le lalolagi uma i luma o le Atua.

20Auā e leai se tagata e to‘atasi e ta‘uamiotonuina i luma o le Atua i galuega o le tulafono; auā o le tulafono e iloa lelei ai le agasala.

O le Ta‘uamiotonuina e le Atua

21A ‘ua fa‘aalia mai nei le amiotonu a le Atua, e aunoa ma le tulafono, e ui lava ‘ina molimau i ai le tulafono ma perofeta;

22o le amiotonu lea a le Atua e auala mai i le fa‘atuatua ‘iā Iesu Keriso, mo tagata uma ‘ua talitonu; auā e leai se ‘ese‘esega o i latou.

23Auā ‘ua agasala tagata uma lava, ma ‘ua lē o‘o i le mamalu o le Atua.

24‘Ua ta‘uamiotonuina fua i latou i lona alofa tunoa, e ala i le togiola ‘ua ‘iā Keriso Iesu.

25O lē ‘ua tu‘uina mai i luma e le Atua, e ‘avea ma taulaga mo agasala i lona toto, e maua i le fa‘atuatua; ‘ina ‘ia fa‘aalia manino mai lana amiotonu, ‘ina ‘ua lē tauia e ia agasala ‘ua mavae ‘ona o le ‘onosa‘i o le Atua.

26‘Ina ‘ia fa‘aalia manino mai ai fo‘i lana amiotonu i aso nei, ‘ina ‘ia iloa ai e amiotonu o ia, ma ‘ua ta‘uamiotonuina e ia lē ‘ua fa‘atuatua ‘iā Iesu.

27O lenei, o le ā la se mea e mitamita ai? E leai se mea! E mitamita ‘ea ‘ona o le tulafono? ‘Ona o le tulafono ‘ea o galuega? E leai lava! Peita‘i ‘ona o le tulafono o le fa‘atuatua.

28Auā ‘ua tatou tāofi, e ta‘uamiotonuina le tagata i le fa‘atuatua e aunoa ma galuega o le tulafono.

29E fa‘apitoa ‘ea na o tagata Iutaia le Atua? E lē aofia ai ‘ea fo‘i ma Nu‘u ‘ese? Ioe, e aofia ai ma Nu‘u ‘ese.

30Auā fo‘i e to‘atasi lava le Atua; o ia lea na te ta‘uamiotonuina i le fa‘atuatua lē ‘ua peritomeina, ‘atoa ma lē e le‘i peritomeina, pe ‘āfai e fa‘atuatua i lā‘ua uma.

31A tatou fa‘alēaogāina ‘ea la le tulafono ‘ona o le fa‘atuatua? E leai lava! Peita‘i ‘ua tatou fa‘atumauina ai le tulafono.