2 Korinito 7 - Samoan Contemporary New Testament

1O le mea lea, le au pele, o nei folafolaga ‘ua faia mo i tatou; o lea e ao ai ‘ona tatou fa‘amamā ‘iā te i tatou lava, i mea uma e leaga ai le tino ma le agaga, ma ‘ia taumafai ‘ona ola i le ola pa‘ia, i le mata‘u i le Atua.

O le Fiafia o Paulo

2‘Ia ‘outou talia i matou i o ‘outou loto, matou te le‘i agaleaga atu i se isi, matou te le‘i fa‘aleagaina se isi, matou te le‘i pule fua i mea a se isi tagata.2 Kori 12.17; Galu 20.33

3‘Ou te lē fai atu i lenei mea e fa‘asala ai ‘iā te ‘outou; ‘ua uma ‘ona ‘ou fai atu, ‘ua i ai ‘outou i o matou loto, ‘ua oti ma ola fa‘atasi ma ‘outou.

4‘Ou te tautala atu ‘iā te ‘outou ma le mautinoa; ‘ua tele lo‘u mitamita ‘ona o ‘outou. ‘Ua fa‘atūmuina a‘u i le loto tele; ‘ua fa‘atūmuina a‘u i le ‘oli‘oli i o matou puapuagā uma lava.

5Auā e moni lava ‘ina ‘ua matou ō mai i Maketonia, sa leai se mapu i o matou tino; ‘ae sa puapuagātia i matou i mea uma; o tau‘a i fafo a o le fefe i totonu.

6Peita‘i o le Atua, o lē e fa‘amafanafanaina ē ‘ua fa‘amaulaloina, na fa‘amafanafana o ia ‘iā te i matou i le o‘o mai o Tito;

7e lē na o lona o‘o mai, a o le fa‘amafanafanaga fo‘i na fa‘amafanafanaina ai o ia e ‘outou. Na ta‘u mai e ia ‘iā te i matou lo ‘outou naunau e fia va‘ai ‘iā te a‘u, o lo ‘outou fa‘anoanoa, ma lo ‘outou mā‘elegā ‘iā te a‘u, o lea ‘ua fa‘ateleina ai lo‘u ‘oli‘oli.

8Auā ‘āfai na ‘ou fa‘atigā atu ‘iā te ‘outou i le tusi, ‘ou te lē salamō ai (e ui lava ‘ina sa ‘ou salamō ai) auā ‘ua ‘ou iloa o le tusi lenā na fa‘atigā ‘iā te ‘outou, e ui lava ‘ina o sina taimi pu‘upu‘u.2 Kori 2.4

9O lenei ‘ou te ‘oli‘oli, e lē ‘ona ‘ua tigā ‘outou, ‘ae peita‘i ‘ona o lo ‘outou tigā ‘ua i‘u i lo ‘outou salamō; na fa‘atigāina ‘outou e tusa ma le finagalo o le Atua, ‘ina ne‘i puapuagātia ‘outou i se mea ia i matou.

10Auā o le tigā e tusa ma le finagalo o le Atua, e tupu ai le salamō e o‘o atu ai i le fa‘aolataga e lē toe i ai se salamō; a o tigā fa‘alelalolagi e tupu ai le oti.

11Auā ‘ua ‘outou va‘ai i le fa‘amaoni o lenei mea, o le tau‘aveina lea e ‘outou o le tigā e tusa ma le finagalo o le Atua, ‘ua fa‘atuputeleina ai ‘iā te ‘outou le mata‘u, o le naunau tele mai, o le mā‘elegā, ma le mana‘o e taui atu. O nei mea uma ‘ua fa‘amaonia e ‘outou ‘iā te ‘outou lava, tou te mamā i na mea.

12O le mea lea, e ui lava ‘ina ‘ou tusi atu ‘iā te ‘outou, ‘ou te le‘i tusi atu ‘ona o lē na faia le mea leaga, po o lē fo‘i ‘ua agaleagaina; ‘ae peita‘i ‘ina ‘ia fa‘aalia ai lo ‘outou mā‘elegā mo i matou i luma o le Atua.

13O le mea lea ‘ua fa‘amafanafanaina ai i matou.

E lē gata i lea, a ‘ua fa‘aopoopo i lo matou fa‘amafanafanaina lo matou ‘oli‘oli tele i le fiafia o Tito, auā ‘ua to‘afilemū lona loto ‘ona o ‘outou.

14Auā ‘āfai na ‘ou mitamita ‘iā te ia i se mea ‘ona o ‘outou, e lē fa‘amāina ai a‘u, ‘ae peita‘i fa‘apei ‘ona fa‘amaoni mea na matou tautala atu ai ‘iā te ‘outou, e fa‘apea fo‘i ‘ona fa‘amaonia lo matou mitamita ia Tito.

15‘Ua fa‘ateleina lona alofa mo ‘outou ‘ina ‘ua manatua e ia o ‘outou usiusita‘i uma, i lo ‘outou taliaina o ia i le fefe ma le gatete.2 Kori 2.9

16O le mea lea ‘ou te ‘oli‘oli ai ‘ina ‘ua ‘ou fa‘atuatua ‘iā te ‘outou i mea uma.