Jeremias 18 - Revised Bible

Si Jeremias didto sa Balay sa Magkukulon

1Giingnan ako sa Ginoo,

2“Lakaw ngadto sa balay sa tighimog kulon ug didto ihatag ko kanimo ang akong isulti.”

3Busa miadto ako ug didto nakita ko ang tighimog kulon nga nagtrabaho.

4Kon makita gani niya nga ang usa ka kulon dili maayong pagkabuhat, iya kining usbon pagmasa ug hulmahon ug lain.

5Unya giingnan ako sa Ginoo,

6“Dili ba mahimo ko kaninyo, katawhan sa Israel, ang gihimo sa tighimog kulon? Kamo ania sa akong kamot sama sa minasang yuta diha sa kamot sa tighimog kulon. Ako, ang Ginoo, maoy nag-ingon niini.

7Kon moingon ako nga akong ibton, gub-on o laglagon ang usa ka nasod o gingharian

8ug unya ang maong nasod maghinulsol sa iyang pagkadaotan, dili ko ipadayon ang gihunahuna kong buhaton.

9Apan sa laing bahin, kon moingon ako nga tukoron ko ang usa ka nasod o gingharian

10ug unya kanang nasora magpakasala, dili ko ipadayon ang maayo nga giingon ko nga akong buhaton.

11Busa ingna ang katawhan sa Juda ug ang mga lumolupyo sa Jerusalem nga ako, ang Ginoo, naglaraw batok kanila ug andam na sa pagsilot kanila. Pahunonga sila sa ilang pagpakasala ug pahinulsola sila.

12Sila motubag kanimo, ‘Dili! Nganong mohunong man kami? Walay makapugong kanamo sa pagbuhat ug daotan sumala sa among gusto.’”

Gisalikway sa Katawhan ang Ginoo

13Busa ako, ang Ginoo, nag-ingon:

“Pangutan-a ang tanang kanasoran.

May nahitabo bang sama niini sukad-masukad?

Ngil-ad kaayo ang gibuhat sa Israel!

14Kawad-an bag yelo ang tumoy sa kabukiran sa Lebanon?

Kahubsan ba ang mga sapa niini?

15Apan ang akong katawhan nahikalimot kanako!

Nagsunog silag mga insenso ngadto sa mga diosdios.

Nahisukamod sila

ug wala na sila mosubay sa naandan nga dalan.

Lain nang mga agianan ang ilang gisubay.

16Gihimo nilang kalisangan ug talamayon kining nasora hangtod sa kahangtoran.

Ang tanang moagi niini malisang sa ilang makita ug magpanglingo.

17Patibulaagon ko ang akong katawhan atubangan sa ilang mga kaaway

sama sa abog nga gipadpad sa timog.

Talikdan ko sila

ug dili ko sila tabangan kon moabot kanila ang mga katalagman.”

Usa ka Laraw batok kang Jeremias

18Unya miingon ang katawhan, “Sigi! Hiposon ta si Jeremias! Kabsan ba gud kitag mga pari nga makatudlo kanato o mga tawong maalamon nga makatambag kanato o mga propeta nga mosangyaw sa gisulti sa Dios? Dili! Pasakaan ta siyag sumbong ug dili na kita mamati sa iyang isulti.”

19Busa nag-ampo ako, “O Ginoo, pamatia intawon kining isulti ko kanimo ingon man ang gipanulti sa akong mga kaaway batok kanako.

20Daotan ba diay ang balos sa kaayo? Apan naghimo silag lit-ag alang kanako. Hinumdomi nga midangop ako kanimo aron paghangyo kanimo nga hunongon mo unta ang imong kasuko kanila.

21Apan karon, O Ginoo, pamatya ang ilang mga anak pinaagi sa gutom ug sa gubat. Mawad-an untag bana ug mga anak ang mga asawa. Mangamatay unta sa sakit ang mga lalaking hamtong ug mangamatay unta sa gubat ang mga batan-on!

22Ipaguba sa mga tawong daotan ang ilang kabalayan sa kalit lamang ug pasinggita sila sa kalisang! Naggahong sila alang kanako ug nagtaod silag mga lit-ag aron pagbitik kanako.

23Apan masayod ka, O Ginoo, sa tanan nilang laraw sa pagpatay kanako. Ayaw sila pasayloa sa ilang daotang mga buhat ug sa ilang mga sala. Pahiagoma sila sa kaparotan ug ipahamtang kanila ang imong kapungot.”