Isaias 30 - Revised Bible

Walay Kapuslanan ang Pagpakig-abin sa Ehipto

1Nag-ingon ang Ginoo,

“Alaot ang mga pangulo sa Juda kay sila misupak kanako.

Naglaraw sila ug ilaila ra

ug naghimog kasabotan nga supak sa akong kabubut-on,

ug sa ingon nagpatungpatong ang ilang sala.

2Sa walay pagpakitambag kanako, nangadto sila sa Ehipto

aron pagpakitabang sa hari sa Ehipto,

ug aron makapasilong sa iyang landong.

3Apan maulawan lamang sila sa ilang pagdangop kaniya,

ug sa ilang pagpasilong sa landong sa Ehipto.

4Kay bisag ang ilang mga embahador

atua na sa mga siyudad sa Ehipto nga mao ang Soan ug ang Hanes,

5ang katawhan sa Juda maulawan lang gayod gihapon

kay wala man silay mapaabot nga tabang gikan niining mga tawhana.”

6Mao kini ang giingon sa Dios bahin sa mga mananap sa Negeb:

“Ang mga sinugo nila milatas sa makuyaw nga mga dapit

diin magpuyo ang mga liyon,

ang mga lala nga bitin ug ang mga pak-ang halas;

gidala nila ang ilang bahandi,

gikarga sa mga asno ug kamelyo

aron ihatag sa nasod nga dili makatabang kanila.

7Walay kapuslanan ang tabang sa Ehipto

busa ginganlan ko siyag ‘Ang Dragon nga Walay Gahom.’”

Ang Masupilong Katawhan

8Gisugo ako sa Dios nga isulat diha sa usa ka basahon kon unsa kadaotan ang katawhan,

aron may kasulatan nga kanunayng magmatuod sa ilang pagkadaotan.

9Kay katawhan sila nga masupilon,

mga anak nga bakakon nga dili buot nga tudloan sa Ginoo.

10Sila miingon sa mga mananagna:

“Ayaw pangitag panan-awon,”

ug ngadto sa mga propeta:

“Ayaw kamig sultihi unsay matarong;

sultihi hinuon kamig mga butang nga anindot paminawon

ug matahom nga mga panan-awon.

11Ayaw alihi ang among dalan;

ayaw na kamig sultihi mahitungod sa Balaang Dios sa Israel.”

12Busa nag-ingon ang Balaang Dios sa Israel,

“Kay wala man kamo magtagad sa akong gisulti

ug nagsalig man kamo sa pagpanlupig ug sa mga buhat nga daotan

13busa sad-an kamo;

sama kamo sa habog nga paril nga may liki,

naghirig na ug katumbahon

ug sa kalit lamang mahugno.

14Ang iyang pagkahugno sama sa pagkapusgay sa usa ka kulon,

ug walay tipak niini nga igong kasudlag kalayo

o magamit sa pagkabog tubig gikan sa atabay.”

15Kini mao ang pulong sa Ginoong Dios ang Balaang Dios sa Israel:

“Balik kamo ngari kanako ug pahulay ug maluwas kamo;

diha sa kahilom ug pagsalig anaa ang inyong kusog.”

Apan dili kamo gustong mohimo niini.

16Miingon hinuon kamo,

“Dili mahimo kay mangagiw kami sakay sa tulin nga mga kabayo.”

Busa nanglayas kamo

apan mas tulin ang maggukod kaninyo.

17Managan ang usa ka libo sa hulga lang sa usa ka tawo;

managan kamong tanan sa hulga sa lima,

hangtod nga kamo na lamay mahibilin

sama sa tukon sa bandila didto sa tumoy sa usa ka bukid,

ug mahimo kamong usa ka timaan didto sa usa ka bungtod.

18Busa naghulat ang Ginoo

nga ikapakita niya ang iyang kaluoy nganha kaninyo,

ug ikalipay niya ang pagkaluoy kaninyo.

Kay ang Ginoo Dios sa hustisya;

bulahan ang mosalig kaniya.

Panalanginan sa Dios ang Iyang Katawhan

19Matuod gayod kini, O mga tawo nga nagpuyo sa Sion sa Jerusalem. Dili na gayod kamo maghilak. Ayaw duhaduhai nga kaluy-an kamo sa Ginoo inigsangpit ninyo kaniya. Inigkabati niya kaninyo, tubagon kamo niya.

20Bisag gihatag sa Ginoo kaninyo ang pan sa kaguol ug ang tubig sa kasakit, siya mismo mag-uban kaninyo aron pagtudlo kaninyo ug dili na kamo mangita pa kaniya.

21Kon motipas ka sa tuo o sa wala, mabatian mo ang iyang tingog diha sa imong luyo nga moingon, “Dia ra ang dalan; subaya kini.”

22Unya ngil-aran na kamo sa inyong mga diosdios nga hinimog plata ug bulawan. Inyo kining ilabay daw hugaw nga trapo ug moingon kamo, “Wala na kami magkinahanglan kaninyo.”

Magmauswagon ang Sion

23Ug paulanan niya ang binhi nga inyong ipugas ug hatagan kamo niyag daghang abot ug daghang kasibsiban sa inyong kahayopan.

24Ug ang mga baka ug mga asno nga gigamit ninyo pagdaro mangaon sa labing maayong kan-onon.

25Ug sa kabukiran ug kabungtoran modagayday ang mga sapa inig-abot sa adlaw nga pamatyon ang inyong mga kaaway inigkalumpag sa ilang mga tore.

26Ang bulan mahisama ka hayag sa adlaw ug makapito unya piloa ang kahayag sa adlaw sa panahon nga tambalan na sa Ginoo ang samad sa iyang katawhan nga nahimo sa iyang kastigo.

Silotan sa Dios ang Asiria

27Ang gahom ug ang himaya sa ngalan sa Ginoo makita bisan sa layo,

makita ang iyang kasuko pinaagi sa kalayo ug sa aso.

Kon mosulti siya,

ang iyang pulong makapaso sama sa kalayo.

28Nagpadala siya ug hangin sama sa nagbaha nga suba nga mobanlas sa tanan,

aron pag-alig-ig sa mga nasod diha sa nigo sa kalaglagan,

ug aron hiktan ang baba sa mga katawhan aron sila pahisalaagon.

29Pag-awit kamo sama sa buhaton ninyo inigkagabii kon maghimo kamo sa balaang kasaulogan. Pagsadya kamo sama sa mga tawo nga, dinuyogan sa plawta, moadto sa Templo sa Ginoo nga mao ang Batong Dalangpanan sa Israel.

30Ug ipabati sa Ginoo ang harianon niyang tingog ug ipakita niya ang iyang tumang kasuko, inubanan sa dilaab sa kalayo, mga dalugdog, bagyo ug mga ulan sa yelo.

31Mangahadlok pag-ayo ang taga-Asiria inigkadungog nila sa tingog sa Ginoo ug inigkatilaw nila sa hampak sa iyang silot.

32Ug duyogan sa katawhan sa Dios ug tambor ug alpa ang matag hampak nga ipahamtang sa Ginoo sa mga kaaway. Ang Dios mismo makig-away uban sa iyang katawhan batok sa taga-Asiria.

33Dugay nang giandam ang dapit diin sunogon ang hari sa Asiria. Dako ug lapad ang daob. Andam na ang daghang igsusugnod ug maoy mopasiga niini ang gininhawa sa Ginoo nga samag sapa sa sinunog nga asupre.