Ruth 1 - Revised Bible

Si Elimelec ug ang Iyang Panimalay Namalhin ngadto sa Moab

1Kaniadto sa panahon nga ang mga maghuhukom pa maoy nagmando sa Israel, may gutom nga miabot sa maong nasod. Busa may usa ka tawo nga taga-Betlehem sa Juda nga miadto sa nasod sa Moab uban sa iyang asawa ug duha ka anak nga lalaki aron adto una mopuyo didto.

2Siya mao si Elimelec ug si Naomi ang iyang asawa. Ang ilang duha ka anak nga lalaki mao si Mahlon ug si Quilion. Taga-Efrata sila, nga sa ato pa, Betlehem sa Juda. Miadto sila sa Moab ug mipuyo didto.

3Si Elimelec namatay ug si Naomi na lamang ang nahibilin uban sa duha niya ka anak nga lalaki.

4Kining duha naminyog mga babaye nga taga-Moab nga ginganlag Orpah ug Ruth. Tapos sa mga napulo ka tuig nilang pagpuyo didto,

5namatay usab si Mahlon ug si Quilion ug si Naomi na lang ang nahibilin, wala nay bana ug mga anak.

Si Naomi ug si Ruth Mipauli sa Betlehem

6Nakabalita si Naomi nga gipanalanginan sa Ginoo ang iyang katawhan pinaagi sa paghatag kanilag maayong ani. Busa nangandam siya pagbiya sa Moab uban sa iyang mga umagad.

7Milakaw siya uban kanila balik sa Juda.

8Apan samtang naglakaw sila, si Naomi miingon sa iyang mga umagad, “Pamauli kamo sa inyo ug tipon kamo sa inyong mga inahan. Hinaot unta nga panalanginan kamo sa Ginoo sama nga kamo maayo kanako ug niadtong mga nangamatay.

9Ug itugot unta sa Ginoo nga maminyo kamo pag-usab ug makabaton kamog panimalay.”

Busa mihalok si Naomi kanila ug nanamilit. Apan mihilak sila sa makusog

10ug miingon kaniya, “Dili kami mopauli! Mokuyog kami kanimo ngadto sa imong katawhan.”

11Unya mitubag si Naomi, “Kinahanglan nga mamauli kamo, mga anak. Nganong mokuyog man kamo kanako? Makabaton pa ba akog mga anak aron inyong mabana?

12Pamauli kamo kay tigulang na ako ug dili na maminyo pag-usab. Apan bisag maminyo pa ako pag-usab karong gabhiona ug manganak ug mga lalaki,

13magpaabot ba kamo nga modagko sila aron kamo maminyo kanila? Makapugong ba kana kaninyo sa pagminyo sa lain? Mga anak, nasayod kamo nga dili gayod kana mahimo. Nasuko kanako ang Ginoo ug naluoy ako pag-ayo kaninyo.”

14Niining tungora mihilak na usab sila sa makusog. Unya si Orpah mihalok sa iyang ugangan ug nanamilit ug mipauli sa iyang katawhan. Apan si Ruth wala gayod mobiya kang Naomi.

15Unya si Naomi miingon kang Ruth, “Ang imong bilas mipauli na sa iyang katawhan ug sa iyang dios. Lakaw, kuyog kaniya.”

16Apan mitubag si Ruth, “Ayaw ako agdaha pagbiya kanimo ug ayaw ako pugngi sa pagkuyog kanimo. Bisan asa ka mopaingon mokuyog gayod ako. Bisag asa ka mopuyo adto usab ako puyo. Ang imong katawhan mahimong akong katawhan ug ang imong Dios mahimong akong Dios.

17Bisan asa ka mamatay, adto usab ako mamatay ug ilubong. Mahiagoman ko unta ang labing makalilisang nga silot sa Ginoo kon tugotan ko ang bisan unsa nga magbulag kanato gawas sa kamatayon.”

18Nakita ni Naomi nga mokuyog gayod si Ruth kaniya busa wala na siya modugang ug sulti.

19Unya mipadayon sila paglakaw hangtod nga miabot sila sa Betlehem. Nangalipay ang tanan sa pag-abot nila ug ang mga babaye miingon, “Si Naomi ba kini?”

20Mitubag si Naomi, “Ayaw ako tawga ug Naomi kondili Mara kay gipaantos ako pag-ayo sa Labing Gamhanang Dios.

21Sa paggikan ko dinhi daghan akog kabtangan apan wala akoy nahot nga gipapauli sa Ginoo. Busa nganong tawgon man akog malipayon nga gihukman ug gipaantos man ako sa Ginoo nga Labing Gamhanan?”

22Ingon niana ang paghibalik ni Naomi gikan sa Moab uban sa iyang umagad nga si Ruth nga taga-Moab. Miabot sila sa Betlehem sa pagsugod sa ting-ani sa sebada.