Mga Salmo 58 - Revised Bible

Pag-ampo nga Silotan ang mga Daotan

1Mga pangulo, naghatag ba kamo ug mga matarong nga hukom?

Gihukman ba ninyo ang tanang tawo uban sa kaangayan?

2Wala! Naghunahuna lamang kamo sa daotan nga inyong buhaton,

ug bangis ang inyong binuhatan dinhi sa yuta.

3Ang mga daotan magpabiling daotan sa tibuok nilang kinabuhi;

bakakon sila sukad sa ilang pagkatawo.

4Lala sila sama sa mga halas,

ug gisampongan nila ang ilang mga dalunggan

sama sa bungol nga halas

5nga dili makabati sa tingog

o sa awit sa batid nga salamangkero.

6Hingoi sila sa ilang ngipon, O Dios;

hingoa ang mga tango niining bangis nga mga liyon, O Ginoo!

7Mahanaw unta sila sama sa tubig nga nag-anam ug kahubas,

ug malaya unta ingon sa mga balili diha sa dalan.

8Matunaw unta sila sama sa hilahila,

ug mahisama sa bata nga natawong patay nga wala gayod makakita sa kahayag.

9Sa dili pa sila masayod, putlon sila sama sa sagbot;

buhi man sila o patay, huypon sila sa Dios

tungod sa iyang hilabihang kasuko.

10Malipay ang matarong inigkakita niya nga silotan ang mga makasasala;

yatakan niya ang nagbanaw nga dugo sa mga daotan.

11Moingon ang mga tawo, “Gigantihan gayod ang mga matarong!

Aduna gayoy Dios nga naghukom sa kalibotan!”