2 Samuel 10 - Revised Bible

Gibuntog ni David ang mga Amonihanon ug ang mga Sirianhon(1 Cron. 19:1-19)

1Unya human niini namatay ang hari sa mga Amonihanon ug mipuli kaniya si Hanun nga iyang anak.

2Ug miingon si David, “Magmaayo ako kang Hanun, anak ni Nahas, ingon nga maayo kanako ang iyang amahan.” Busa nagpadala si David ug mga sulugoon aron pagpahasubo kaniya sa iyang kaguol tungod sa kamatayon sa iyang amahan.

Ug miabot sa yuta sa mga Amonihanon ang mga sulugoon ni David.

3Apan ang mga kadagkoan sa mga Amonihanon miingon kang Hanun nga ilang agalon, “Nagtuo ka ba nga tungod kay gipadad-an ka ni David ug mga maghuhupay sa imong kaguol, nagpasidungog siya sa imong amahan? Tingali bayag gipaanhi sila ni David aron mangispiya ug unya ilogon nila ang atong gingharian.”

4Busa gidakop ni Hanun ang mga sulugoon ni David ug gibarbasan niya ang katunga sa bungot sa tagsatagsa kanila ug gipamutlan niya ang ilang mga bisti dapit sa may hawak ug unya iyang gibuhian sila.

5Naulaw sila busa wala sila mamauli. Sa pagkasayod ni David niini gipasugat niya sila ug giingnan nga magpabilin sila sa Jerico hangtod katuboan sila sa ilang bungot.

6Sa pagkasabot sa mga Amonihanon nga nasuko si David, nanuhol silag mga taga-Siria nga didto nagpuyo sa Betrehob ug sa Soba: 20,000 ka sundalo nga naglakaw ug 1,000 ka tawo ni Hari Maaca ug 12,000 sa mga tawo ni Tob.

7Ug sa pagkabalita ni David niini, gipadala niya si Joab ug ang tanang anad na sa gubat.

8Miasdang ang mga Amonihanon ug nagpahiluna sila sa ganghaan andam sa kombati. Didto sa kapatagan ang mga taga-Siria nga nagpuyo sa Soba ug sa Rehob ug ang mga tawo ni Tob ug ni Maaca.

9Sa pagtan-aw ni Joab nga may mga kaaway siya sa atubangan ug sa luyo niya, gipili niya ang pipila ka hawod nga mga tawo sa Israel ug giandam niya sila batok sa mga Sirianhon.

10Ang uban niyang mga tawo iyang gipadumala ni Abisai nga iyang igsoon ug gipaandam niya sila batok sa mga Amonihanon.

11Si Joab miingon kaniya, “Kon lig-on ra kaayo ang mga Sirianhon alang kanako, tabangi ako ninyo. Apan kon ang mga Amonihanon lig-on ra kaayo alang kaninyo, tabangan ko kamo.

12Ayaw kamo kahadlok. Ipakita ta nga kita kasaligan sa atong mga tawo ug sa mga siyudad sa atong Dios. Hinaot unta nga buhaton sa Ginoo ang iyang giila nga maayo!”

13Busa midasdas si Joab ug ang iyang mga tawo sa mga Sirianhon ug nanagan ang mga Sirianhon.

14Sa pagkakita sa mga Amonihanon nga nanagan ang mga Sirianhon, nanagan usab sila ug misulod sila sa siyudad. Unya mipauli si Joab gikan nga nakig-away sa mga Amonihanon ug miadto siya sa Jerusalem.

15Unya sa nakita sa mga Sirianhon nga gibuntog sila sa mga Israelita, nagtigom sila.

16Ug gipakuha ni Hadadeser ang mga Sirianhon nga didto sa unahan sa Suba sa Eufrates ug nangadto sila sa Helam, ubos sa pagdumala ni Sobak, ang pangulo sa kasundalohan ni Hadadeser.

17Sa pagkasayod ni David niini, gitigom niya ang tanang Israelita ug milabang sila sa Jordan ug miadto sa Helam. Ang mga Sirianhon nangandam usab batok kang David ug nakiggubat sila kaniya.

18Nanagan ang mga Sirianhon ug nakapatay si David ug mga tawo nga nagmaniho sa 700 ka karwahi ug 40,000 ka sundalo nga nagkabayo. Niadtong gubata nasamad ug namatay si Sobak ang heneral sa kasundalohan.

19Sa pagkasayod sa tanang mga hari nga sakop ni Hadadeser nga gibuntog sila sa Israel nakigdait sila sa Israel ug nahimo silang mga alagad. Busa sukad niadto nahadlok na ang mga Sirianhon sa pagtabang sa mga Amonihanon.