Numeros 17 - Revised Bible

Sungkod ni Aaron

1Ang Ginoo miingon kang Moises,

2“Sultihi ang katawhan sa Israel sa paghatag kanimog mga sungkod, usa ka sungkod sa matag banay, 12 ka sungkod ang tanan. Isulat ang ngalan sa pangulo sa banay diha sa iyang sungkod.

3Sa sungkod ni Levi isulat ang ngalan ni Aaron kay may usa man ka sungkod alang sa pangulo sa matag banay.

4Unya hiposa kini diha sa Tolda nga Tagboanan atubangan sa Sudlanan sa Kasabotan diin makigtagbo ako kaninyo.

5Ug mosalingsing ang sungkod sa tawo nga akong pilion ug sa ingon mohunong ang pagbagulbol sa katawhan sa Israel batok kanimo.”

6Gisultihan ni Moises ang katawhan sa Israel ug ang matag usa ka pangulo mihatag sa iyang sungkod sumala sa ilang banay. May 12 ka sungkod ang tanan ug ang usa niadto mao ang sungkod ni Aaron.

7Ug gihipos ni Moises ang mga sungkod atubangan sa Ginoo didto sa Tolda nga gibutangan sa Sudlanan sa Kasabotan.

8UgHeb. 9:4. sa pagkaugma miadto si Moises sa Tolda nga gibutangan sa Sudlanan sa Kasabotan ug nakita niya nga ang sungkod ni Aaron nga alang sa banay ni Levi nabuhi ug nanalingsing, namulak ug namungag hinog nga almendras.

9Unya gidala ni Moises ang tanang sungkod gikan sa atubangan sa Ginoo ngadto sa tanang katawhan sa Israel. Gitan-aw nila kini ug matag usa kanila mikuha sa iyang sungkod.

10Ang Ginoo miingon kang Moises, “Ibutang pagbalik ang sungkod ni Aaron atubangan sa Tolda nga gibutangan sa Sudlanan sa Kasabotan. Tipigi kini ingon nga pasidaan sa mga masupilon nga mamatay sila gawas kon mohunong ang ilang pagbagulbol batok kanako.”

11Gibuhat ni Moises ang gisugo kaniya sa Ginoo.

12Ang mga Israelita miingon kang Moises, “Kon mao kana, mangamatay kaming tanan.

13Kon mamatay man gani ang moduol sa Tolda sa Ginoo, sa ato pa mahurot gayod kamig kamatay!”