2 Samuel 15 - Revised Bible

Naglaraw si Absalom Pag-alsa batok kang David

1Human niini, si Absalom nakabaton ug usa ka karwahi ug mga kabayo ug 50 ka tawo nga mobantay kaniya.

2Niining higayona gihimong batasan ni Absalom nga mobangon sa sayong buntag ug mobarog daplin sa dalan paingon sa ganghaan sa siyudad. Kon may moagi nga tawo nga may kaso nga ipahusay sa hari, tawgon siya ni Absalom ug pangutan-on, “Taga diin ka mang siyudara?” Ug kon tubagon siya, “Sakop ako niini o niadtong banaya sa Israel,”

3moingon kaniya si Absalom, “Maayo, ug may katarongan ka sa imong kaso. Apan walay gitugyanag gahom sa hari aron sa paghusay niini.”

4Ug moingon pa gayod si Absalom, “Pagkaanindot unta kon ako pay maghuhukom dinhi! Ang tanan nga adunay kaso makaduol gayod kanako ug kahatagan ko silag hustisya.”

5Ug kon may moduol kang Absalom aron sa pagyukbo kaniya, itunol niya ang iyang kamot, kuptan niya siya ug hagkan.

6Gibuhat kini ni Absalom sa tanang Israelita nga moadto sa hari aron magpahusay sa ilang kaso. Tungod niining paagiha nadani ni Absalom ang mga Israelita.

7Milabay ang upat ka tuig ug giingnan ni Absalom ang hari, “Tugoti ako sa pagtuman sa akong saad sa Ginoo didto sa Hebron.

8Kay nanaad ako sa Ginoo sa didto pa ako sa Gesur, sa yuta sa Siria, nga kon pabalikon ako niya didto sa Jerusalem, maghalad ako kaniya sa Hebron.”

9Ug giingnan siya sa hari, “Pag-ayoayo sa imong panaw!” Busa miadto siya sa Hebron.

10Apan sa tago nagsugo si Absalom ug mga tawo ngadto sa tanang mga banay sa Israel aron ingnan ang mga tawo, “Inigkabati ninyo sa tingog sa trumpeta, singgit kamo, ‘Si Absalom hari na sa Hebron!’”

11Mikuyog kang Absalom ang 200 ka tawo nga taga-Jerusalem nga mga dinapit niya apan wala silay kasayoran sa laraw ni Absalom.

12Ug samtang naghalad si Absalom ug mga mananap nga sunogon, gipakuha niya si Ahitofel nga magtatambag ni David gikan sa siyudad sa Gilo. Nagkadako ang tinguha sa pag-alsa batok kang David ug nagkadaghan ang mga tawo nga dapig kang Absalom.

Milikay si David kang Absalom

13May sinugo nga miadto kang David ug miingon, “Nadani na gayod ni Absalom ang mga Israelita.”

14Unya gisultihan ni David ang tanan niyang mga kadagkoan nga nag-uban kaniya didto sa Jerusalem, “Mangagiw kita kay kon dili, hisakpan kita ni Absalom. Magdali kita aron dili kita hiapsan niya ug hutdon ug pamatay.”

15Miingon kang David ang iyang mga kadagkoan, “Hibaw-i nga andam kami sa pagtuman bisag unsay ipabuhat mo kanamo.”

16Busa milakaw si David ug mikuyog kaniya ang tibuok niyang banay ug gibilin ni David ang napulo niya ka puyopuyo aron pag-atiman sa palasyo.

17Milakaw ang hari ug mikuyog kaniya ang mga tawo. Unya nanghunong sila sa kataposang balay.

18Gipauna niya ang iyang mga kadagkoan, lakip ang mga guwardiya sa hari nga mga Cheretihanon ug mga Peletihanon ug ang tanang 600 ka Gitihanon nga mikuyog kaniya gikan sa Gat.

19Unya giingnan sa hari si Itai, ang Gitihanon nga ilang pangulo, “Nganong miuban ka man usab kanamo? Pauli ug alagari ang bag-ong hari kay langyaw ka ug gitalikdan mo ang imong balay.

20Bag-o ka pa lamang miabot ug dili mahimo nga mouban ka kanamo. Nasayod ka nga wala ako mahibalo kon asa ako padulong? Busa pauli ug dad-a ang imong mga kaigsoonan. Hinaot unta nga ang gugma sa Ginoo nga walay paglubad mag-uban kanimo.”

21Apan si Itai mitubag sa hari, “Ipanumpa ko sa Ginoo ug kanimo, Kamahalan, nga bisag asa ka mouban gayod ako kanimo, bisag unsay mahitabo.”

22Giingnan ni David si Itai, “Kon mao kana, makauban ka kanamo.” Busa mikuyog si Itai uban sa iyang mga sakop ug sa tanang kabataan nga kuyog nila.

23Ug nanghilak ang mga tawo sa kabalangayan nga ilang giagian. Unya milabang ang hari sa sapa sa Kidron uban sa iyang mga tawo ug mipadayon sila paingon sa kamingawan.

24Unya miabot si Abiatar ug si Sadok kinuyogan sa tanang mga Levita nga maoy nagyayong sa Sudlanan sa Kasabotan sa Dios ug sa iyang katawhan. Unya ilang gibutang sa yuta ang Sudlanan hangtod nakalabay ang tanang tawo nga gikan sa siyudad.

25Unya miingon ang hari kang Sadok, “Dad-a pagbalik ang Sudlanan sa Kasabotan ngadto sa siyudad. Kon gikahimut-an ako sa Ginoo, pabalikon ako niya ug makakita ako niini ug sa puloy-anan niini.

26Apan kon moingon siya, ‘Wala ako mahimuot kanimo,’ dili ako mogula dinhi ug siya na ang mag-igo kanako.”

27Miingon usab ang hari kang Sadok, “Sigi balik ngadto sa siyudad ug dad-a si Abiatar ug ang duha ka batan-on nga si Ahimaas nga imong anak ug si Jonatan nga anak ni Abiatar.

28Maghulat ako didto sa mga sapa sa kamingawan hangtod nga balitaan mo ako.”

29Busa gidala ni Sadok ug ni Abiatar ang Sudlanan sa Kasabotan balik sa Jerusalem ug nagpabilin sila didto.

30Unya mitungas si David nga naghilak ngadto sa Bungtod sa mga Olibo. Nagtiniil siya ug nagpurong. Ang tanang mga tawo nga mikuyog kaniya nagpurong usab ug nanungas nga naghilak.

31Unya may nagtaho kang David nga si Ahitofel usa sa mga nakigkombuya kang Absalom. Ug nag-ampo si David, “O Ginoo, himoa intawon nga walay kapuslanan ang mga tambag ni Ahitofel.”

32Sa pag-abot ni David sa kinatumyan sa bungtod diin gisimba ang Dios, gitagbo siya ni Husai nga Arkihanon nga nagkagidlay ug gibutangan ug yuta ang iyang ulo.

33Giingnan siya ni David, “Kon mopadayon ka sa pag-uban kanako, makasamok ka lamang kanako.

34Apan kon mobalik ka sa siyudad ug ingnon mo si Absalom, ‘Himoa ako nga imong sulugoon, Kamahalan, ingon nga sulugoon ako sa imong amahan kaniadto,’ masanta mo ang tambag ni Ahitofel.

35Dili ba tua man didto si Sadok ug si Abiatar nga mga pari? Busa bisag unsay imong mabati sa palasyo sa hari, isugilon kang Sadok ug kang Abiatar.

36Atua usab didto si Ahimaas nga anak ni Sadok ug si Jonatan nga anak ni Abiatar. Pinaagi kanila makataho ka kanako sa tanan nimong madunggan.”

37Busa si Husai nga higala ni David miabot sa siyudad sa pagsulod gayod ni Absalom sa Jerusalem.