Awit sa mga Awit 2 - Revised Bible

1Ako usa lamang ka ihalas nga rosas sa Sharon,

usa ka lirio diha sa kawalogan.

Ang Lalaki

2Sama sa usa ka lirio taliwala sa kasampinitan

ang akong hinigugma taliwala sa kababayen-an.

Ang Babaye

3Kon itandi ka sa ubang lalaki,

ikaw nga akong hinigugma sama sa kahoyng mansanas taliwala sa kalasangan.

Gusto akong mopasilong sa iyang landong

ug tam-is ang iyang bunga.

4Gidala niya ako sa lawak-kombirahan,

ug gihabolan niya ako sa bandila sa gugma.

5Busga ako sa mga pasas

ug pakan-a akog mga mansanas

kay naluya ako tungod sa gugma.

6Giunlanan ko ang wala niyang kamot

ug ang tuo niyang kamot naghapohap kanako.

7Saari ako, mga babaye sa Jerusalem,

ug panumpa kamo sa lagsaw nga matulin

nga dili gayod ninyo tugawon ang among gugma.

Ang Ikaduhang AwitAng Babaye

8Nadungog ko ang tingog sa akong hinigugma;

nagdagan siya sa kabungtoran paingon kanako.

9Sama sa lagsaw ang akong hinigugma;

sama siya sa nating osa.

Nagbarog siya luyo sa among paril.

Milili siya sa mga bintana

ug mitan-aw kanako diha sa mga rehas.

10Nakigsulti kanako ang akong hinigugma.

Ang Lalaki

Ngari kanako, hinigugma ko,

ug manlakaw kita, minahal ko.

11Ang tingtugnaw milabay na;

mihunong na ang ulan,

12ug namuklad na ang mga bulak sa kaumahan.

Panahon na karon sa pag-awit;

mabati na diha sa kaumahan ang awit sa mga salampati.

13Nagsugod na pagpanghinog ang mga igos,

ug nangalimyon na ang bulak sa mga paras.

Busa ngari kanako, hinigugma ko,

ug manlakaw kita, minahal ko.

14Sama ka sa salampati nga nagtago sa lungag sa bato.

Pasud-onga ako sa matahom mong nawong

ug padungga ako sa tingog mong mananoy.

15Dakpa ninyo ang mga milo, ang gagmayng mga milo,

sa dili pa sila makahimog kadaot sa among namulak nga parasan.

Ang Babaye

16Iya ako sa hinigugma ko

ug siya akoa usab.

Gipasibsib niya ang iyang kahayopan

diha sa mga kaliriohan

17hangtod sa paghuyohoy sa hangin sa kabuntagon

ug sa pagkahanaw sa kangitngit.

Balik, hinigugma ko, sama sa lagsaw,

sa laking lagsaw sa kabukiran sa Beter.