Apocalipsis 3 - Paraguayan Guarani 1913 New Testament

1Ja umi Iglesia rejegua Sardispegua rerecuápe ereuca cuatia ñeême coicha: Cova upe jeiucáva pe Tûpâ Ñandeyára siete Espiritu ja siete ára resa rerecuá: Che aicuaa ye nerembiapocue ja ne rerâcuâjá reicovéjá remano ramo yepe.

2Epaŷkéna, ja emañá ja emombaraete umimbae opytáva gueteri ndeve ocañŷtavama jina, ndayujuijáreje nerembiapo jecopeguarejá Che Tûpâ Ñandeyára ypype.

3Nemanduákéna, upeicharamo, mbaeichapa rejupity ja rejendu rae ja eñongatu umimbae neâcâme ja eyepyapy. Upeichaŷramo repaŷ-ŷ-ramo Che ayune mondajaicha ja nde reicuaaichene mbae horapa sapyaite ayúne nerendape.

4Upeicharamo yepe rereco gueteri Sardispe mbobymi téra omonguŷá-ŷ-vaecue iyao: umiva oicone Chendive iyao morôtí vaerâ: iya voi ichupecuera upeicharâ.

5Pe oguero puacava coicha oñemondéne ao morôtíme, ja Che nambogueichene mbaeveicharamo jéra pe cuatia umi jecove iyapyra-ŷ-va rejegua gui, ja Che amombeune jéra Che Ru renondepe ja umi yvapegua renondepe.

6Pe iyapysáva tojendu pe jeiucáva pe Espiritu umi Iglesia rejegua cuerape.

7Ja umi Iglesia rejegua Filadelfiapegua rerecuápe eréucá cuatia ñeême: Cova pe jeiucáva pe Imarangatúva, pe Jaeteva, pe David rokê mbotyjá rerecuá, Upe oipeava ja ndipori imbotŷjárâ, ja Upe ombotŷva ja ndipori ipeájárâ.

8Che aicuaa pôrâ ye nerembiapo cue. Coina ape amoî nerenondepe peteî okê yepeapyre ndipóriva imbotyjárâ, ja nde nembaraeteminte ramo yepe rembuaye pôrâ yepe Che ñeê ja ne remomârâi Che réra.

9Coanga che arune umi Satanás mbaepochy atyra renda rejeguavape jeiva Judiojá ja jaeŷva, iyapúnte, Che amboune umivape cuera ja amoñesúucáne nde pŷ renondepe ja aicuaaucáne ichupecuera añetejá Che rojayjúvajá.

10Nde rembuaye jague reje Che ñeê reropuacavo kîrîrîjáme Cheicha yma, Che avei añangarecone ndereje umi ára pojyi yavé oico vaerâ yvy ári oñejaa jaguâme opa ybypóra.

11Che ayu voi aina. Nerâcâteŷna upe rerecova reje, anichene jaguâ avave ambue oipyjy pe ne mburuvicha âcâ ajoyá nembaerâ.

12Upe ogueropuacávape amoingóne iyocojarâ ramo Che Tûpâ Ñandeyára tûpâópeguarâ ja jae nosêvéi chene upegui máramo. Ja Che amoîne jese pe Che Tûpâ Ñandeyára réra ja pe Che Tûpâ Ñandeyára retâ réra, co Jerusalem ipyajúva ogueyŷtava oúva yva guive Che Tûpâ Ñandeyára guivo, ja amoîne avei jese Che réra pyajú.

13Pe iyapysáva tojendu pe Espiritu jeiucáva umi Iglesia rejeguapecuera.

14Ja umi Iglesia rejegua Laodiceapegua rerecuápe eréucá cuatiañeeme coicha: Cova pe jeiuca ja pe Amen, pe Jechajaré yeroviajá ja jecopegua, pe Iñypyrujára Tûpâ Ñandeyára moñemoñare rejegua.

15Che aicuaa ye nerembiapocue na nerôŷsâijá ja na nde racu pôrâijá avei.

16Mbaeicha tamo ne rôŷsâ terâ nde racu pôrâ mandi! Upeareje nde racu vaí vaíjá reje ja na ne rôŷsâi ja na nde racu pôrâi járeje, jaimetema roindybú ndeve Che yurugui.

17Nde voi ere: Che mbaererecojá ja añemombae rereco ja ñaicôtevê mbaeve reje, ja upeicha nde reicuaai ndipórijá ipoa-ŷ-va ndeicha, nde reicuaai reyeporiajuvereco rendajá, ja nde poriajujá, ja na nde resapysóijá, ja nde opívojá.

18Upévareje Che to romongueta ndeve reyogua jaguâ Chejegui oro ipotîmbyré tatape nde ne mbaerereco jaguâ, ja ao morôtíva reñemonde jaguâ, anichene jaguâ oyejecha nde opívojá, ja anichene jaguâ reñemotî, ja reyogua jaguâ tesá rasŷ pojâ remoná jaguâ nde resá reje icatu jaguâ rejecha.

19Oime ramo Che ajayjuva, upévape voi che ayao ja ainûpâ. Upévareje ne râcâteŷna Chereje ja eyepyapy.

20Coina ape Che aime añemboy aina okême ja ambota aina. Oime ramo ojendúva Che ñeê ja oipeáva Cheve pe okê Che aikene ichupe ja ayererojoryne jendive ja jae oyererojoryne Che ndive.

21Upe ogueropuacavape ameêne oguapy jaguâ Chendive añembo tuvicha jápe che aropuaca jagueicha avei ja aguapy jagueicha Che Ru ndive oñembotuvichajápe Jae.

22Pe iyapysáva tojendu pe jeiva pe Espiritu umi Iglesia rejeguape.