Romaýguape Guare 7 - Paraguayan Guarani 1913 New Testament

1¿Ndapeicuaaipa, che reŷicuera, (añeê vointe umi Moises ñeêngue oicuaava ndive) ñande yapytajá pe Moises ñeêngue guype, yaicove aya pucucuénte?

2Pe cuña omendava, imena oicove aya, oñeñapytî ichupe pe Moises ñeêngue rupi. Upegui omano ramo imena, pe Moises rembiapoucapy oñapytî vaecue ichupe imenape opyta reíma.

3Upeicha ramo, oicove aya imena, oico rire jae ambue cuimbae ndive oñembo jerane mendaré mbuaijare. Upegui imena omano ramo, osêma pe Moises rembipoucapy oñeñapytî jaguegui. Upeicharamo, ndajaeichene mendare mbuaijá, omenda yeby ramo cuimbae ambue reje.

4Upeicha avei peêcuera, peê che reŷícuera, peico omano vaicha pe Moises ñeênguégui pe Cristo oñembojete jague rupi, peico jaguâ ambue mbae ramo, yaévo, upe oicove yeby vaecue omano vaecue paûgui mbae, icatu jaguâ ñambotuvicha Tûpâ Ñandeyárape ñandereco pôrângue reje.

5Yaico aya ñandeyejegui voi, pe angaipa ñane atôiva pe Moises ñeêngue rupi guare oñatôi ñande retepe ñane rembiapo vai jaguâ ñande reraja jaguâ ñamano meve yepe.

6Coanga ñasêma pe Moises ñeêngue gui ñande yaicojá reje ñamanovaicha upe ñandeyocójaré gui, icatu jaguâ yayeyocuáiucá jecope co ñande reco pyajúvape ñande pyaite guive ja yaicoveŷ pe ñeêngue ymaguare rupi.

7¿Mbaépa yaeta, upeicharamo? ¿Pe Moises ñeêngue angaipa? Mbaevéichavo! Che voi mo ndaicuaai rae mbaépa pe angaipa, aicuaa ŷ rire pe Moises ñeêngue, upeicha avei, che mo ndaicuaaiche rae pe pyayerure vaí oyee ŷ rire Moises ñeême Ani reipota potave.

8Uperamo pe angaipa, iya vove ichupe pe Tûpâ Ñandeyára rembiapoucapy rupi, oñatôi chepype aipota potave jaguâ opaichagua mbae ivaíva. Pe Moises ñeêngue oi ŷ ramo, pe angaipa mo opyta omano vaicha.

9Yma che aicove vaecue sapyami Moises ñeêngue ŷ reje, upei catu ouma ramo pe Tûpâ Ñandeyára rembipoucapy sapyaite pe angaipa oicove yeby ja che amano voi.

10Ja oyeju pe Tûpâ Ñandeyára rembiapoucapy che moingove vaerâ vaecue oico cheve amano jaguâ.

11Pe angaipa voi, iya vove ichupe pe Tûpâ Ñandeyára rembipoucapy rupi, che mbotaby cheve, ja jaerupi avei che yuca.

12Upeicharamo, pe Moises ñeêngue añetejápe imarangatúva ja pe Tûpâ Ñandeyára rembiapoucapŷ imarangatu ja jecopegua ja imbaepôrâva.

13¿Upeicharamo pe ipôrâva oyeyapopa cheve amano jaguâ rae? Mbaeveicharamo. Pe angaipa mante jae icatu jaguâ oyejechauca jae angaipajá upe ombaapo vaecue ipôrâva rupi, che yuca jaguâ, icatu jaguâ oyecuaáucá pe Tûpâ Ñandeyára rembipoucapy rupi mbae ipojŷiteetevévajá pe angaipa.

14Yaicuaa voi pe Moises ñeêngue yvapegua rejeguajá, ja che ybypórantejá che añeñemu jague angaipa rembiguai ramo.

15Pe ayapova che nda jechacuaai che rembiapojá, ja pe aipotáva, ndajaei pe ayapova, pe chembŷayúva voí upéva pe ayapóva.

16Ja ayapo ramo pe aipotaŷva che aicuaauca ipôrâjá pe Moises ñeêngue.

17Ja upeicharamo, coanga ndajaeveima che ayapova co tembiapo, pe angaipa mante oicova chepyape, upeva pe oyapova.

18Che aicuaa che pype, yaicuaa che yejegui vointe, ndopytaijá mbaeve ipôrâva ja iya ramo yepe cheve aipota pôrâ jaguâ, ndaiyai cheve ayapo jaguâ jecope pe ipôrâva.

19Che ndayapoi pe mbae ipôrâva che aipotáva, ja pe ivaíva che aipotaŷva, upeva pe ayapo tapiáva.

20Ja ayapo ramo pe aipotaŷva nda che vémái pe oyapova upeva, pe angaipa oicova chepyape, upévante oyapo.

21Upeicharamo ayuju coichajá chereco, che ayapose ramo mbae pôrâ, oime pe ivaiva che moñujá oicovo tapiá.

22Che pyapype voi che abyá tuvicha pe Tûpâ Ñandeyára rembiapoucapype,

23upegui ajechacuaa oimejá teco ambue che retepype oñorayrô pe teco pôrâ che mbaecuaa rejegua ndive, ja che rerajáva añeñapytîjápe pe teco angaipa rejegua oiva che retépe rupi.

24Che angai nico ybypóra poriaju. ¿Avápa che renôjêne co che rete teôngueichagua gui?

25Arojorŷ Tûpâ Ñandeyárape icatujá reje Ñandeyára Jesú Cristo rupi. Upeichape che voi cheyejegui vointe ajechacuaa rupi che ae pe teco Tûpâ Ñandeyára Ñeê rejegua rembiguai, che ybypóra reco guivo che pe teco angaipa rejegua rembiguai che.