Rembiapocue 22 - Paraguayan Guarani 1913 New Testament

1Peê caraicuera, che rejegua cuera, ja peê ore ru cuera, pe cherendumikena cheve che añejaâ ramo añeê peême cheyeje voí.

2Ja ojenduma ramo jaecuera jae oñeêjá Hebreo Judio ñeêmé okîrîrîvé ja jae oñeê jeivo:

3Che añetejápe Judio, añemoña vaecue voínte Tarso pe Ciliciapeguape, ja acacuaa vaecue co tetâme pe Gamaliel che mboejara py renondepe, ja che mboepyre jecópe co ñande ru ypycue co ñane retâmegua reco rupi. Che nico che râcâteŷcatúva co Tûpâ Ñandeyára reje co peêcueraicha yoa coanga peimeva.

4Che voi areco vaí vaecue co Tapé rejegua cuerape amoñávo ichupecuera ayuca peve yepe. Che añapytî aicovo ja amoingue ybyrácuájápe ichupecuera cuimbae ja cuñáva,

5oicuaa pôrâ jaicha pe pai guasu ja opa umi carai ituyáva: umiva gui voi arajá vaecue cuatia ñeê jeŷi cuerape ja aja Damascope aru jaguâ umi jicuaiva upepe guive iñapytîjápe Jerusalempe oyeyopy jaguâ.

6Ja oyeju ajávo che âguajêvo Damasco ypype ára mbyte rupi sapyaite ojesapé yvaga gui peteî jendy verá cheyerecuévo.

7Ja jaá ybype ja ajendu peteî oñeêva jeiva cheve: Saulo, Saulo, ¿mbaerejépa Che moña reicovo. Upei catu che jae Ichupe: ¿Avápa nde, carai?

8Ja jae jei: Che co Jesús Nazareno, nde Che moñava reicovo.

9Ja umi jicuai vaecue chendive ojecha añetejápe pe jendŷva, nojenduinte osapucai ramo pe oñeêva chendive.

10Ja che jae: ¿Mbaépa ayapota, che Yara? Ja jei cheve Ñandeyára: Epuânte ja terejo Damascope ja upepe oyeépáne ndeve pe oñemoî vaecue reyapo jaguâ.

11Ja che ndicatuvei amaê pe jendy verá ojesapé vaecue gui, chereraja nte chesambyjyjápe umi jicuai vaecue chendive ja upeichape âguajê Damascope.

12Uperamo peteî caraí, Ananias, carai iñemboecatúva, ombuayepáva jecópe Moises ñeêngue, ja jerâcuâ pôrâva opa umi Judio cuera oico vaecue upepe ndive.

13Upéva ou che rendape ja oñemboyávo jei cheve: Che ryby, Saulo, toyeby ndeve nde resapysó. Ja upepe voi che resapysó pôrâ yeby ja amaê jese.

14Ja jae jei cheve: Tûpâ Ñandeyára pe ñande ru cuera ypycue Ñandeyára, yma guive voi nde poravó vaecue reicuaa jaguâ jembipota ja rejecha jaguâ upe Marangatuetévape ja rejendu jaguâ iñeê iyuruete rupi voí,

15icatu jaguâ nde voi reicuaáucá Ichupeguârâ opa ybypóra cuerape opambae nde rejecha ja rejendu vaecue.

16Ja coanga ¿maerâpa repyta rei? Epuânte ja eñemongaraíucá ja eñemopôtí ne angaipagui rejenoî pype Jéra.

17Ja uperire ayeby rire Jerusalempe sapya oñemboe aya tûpâope apyta che añeñandu ŷ reje, ja ajecha guau Ichupe jei ramo cheve:

18Nde pyae, esê voi Jerusalem gui, umiva na nde rerojorŷichene reicuaauca pype Chejegui.

19Ja che jae Ichupe: Che Yara, umiva oicuaa voi che amoingué jague ybyrácuápe ja aicutu jague umi tûpâope yepe umi oyerovia vaecue Ndereje pe.

20Ja oñejê ramo pe nemojerâcuâjaré Esteban ruguŷ, che avei aime upepe ja aime jendive cuera ichupe oyuca jaguepe ja añongatu umi iyucajaré ao.

21Ja Jae jei cheve: Terejonte! Che voi romondo vaerâ ndeve mombyry umi pytagua rendape.

22Ja ojenduma ramo jaecuera upe ñeê meve upei catu osapucai jeivo: Emboínte cuimbae coichaguape co ybyarigui. Naipôrâi oicové.

23Ja jaecuera osapucai jâtâ ja omombo iyao ja oity ybycui ybytu reje.

24Upévareje pe mburuvicha oguerajáucá ichupe pe mburuvicha roga ryepype ja jeiuca omoñeê jaguâ ichupe tucumbópe oyecuaáucá jaguâ mbaépa omboyá rae jese osapucai jaguâicha upeicha.

25Ja oñapytî ramo jina ichupe oinûpâ jaguâ ichupe, Pablo jei pe mburuvicha upepe oivape: Oime ramo carai jaéva Romano oñemoî vaí ŷ vaecue, ¿iyápa peême peinûpâ ichupe?

26Ja ojendu ramo upea pe mburuvicha ojo ja omomarandu pe mburuvicha ambuepe jeivo: ¿Mbaépa reyapota? Co cuimbae Romano voi.

27Upei catu ou pe mburuvicha ja jei ichupe: Eremi cheve ¿ndepa Romano? Ja jae jei: Che jae.

28Ja jei yeby pe mburuvicha: Jepyetereje che ayogua che cuatia añembo Romano jaguâ. Ja Pablo jei ichupe: Che voi jae che sy rygue guive vointe.

29Upei catu opoí voí ichugui umi oinûpâ moáva jina ja pe mburuvicha yepe avei okyjŷyé ojechacuaama ramo Romanojá, ja oñapytîucá jague reje ichupe.

30Ja pe ára ambuepe oicuaa pôrâse gui mbaépa, omboyase raé jese umi Judio, opoíucá oñeñapytî jague gui ja ojenoîucápá umi pai ruvichape ja umi juvicha cuerape yoa ja ôguenojê Pablope ja omoî ichupe jenondepe cuera.