2 Corintoýgua 8 - Paraguayan Guarani 1913 New Testament

1Upeicha avei, che reŷicuera, to roicuaauca peême Tûpâ Ñandeyára ipya pôrâite jague umi Iglesiaŷgua Macedoniapeguape,

2ja ojasa asŷete ramo yepe pe oñejaâ jaguepe, jetaite jory jicuai, ja iporiajú eterei ramo yepe, na jâcâteŷi eterei jicuai omeêve meme jaguâ ipo yeyopy-ŷ-reje.

3Che voi amojerâcuâ jaecuera omeê jague icatu jagueicha ja icatuve jagueicha yepe omeê,

4ja ikyreŷetéve oyerure oreve yepe iya jaguâ ichupecuera pe ipya pôrâ cueragui oipytyvô jaguâ co ore rembiapópe umi imarangatúva rejeguarâ.

5Jaecuera ndo yapoi pe ore rojaârô jagueicha, upeicharamo yepe iñypyrumbŷ oñemeê raê oyupecuera voi Tûpâ Ñandeyárape ja oreve avei, Tûpâ Ñandeyára oipota járeje upeicha.

6Upeicharamo romomarandúucá Titope upe jae oñypyrú jagueicha yma, upeicha avei co tembiapo pôrâ oyapopá jaguâ jecope peêmeguarâ avei.

7Upeareje peêcuera pene mbaepôrâjá reje opambaepe peyeroviajápe, peneñeême, pene mbaecuaape, ja pene kyreŷjápe, ja pe ore rembiaŷjúucápy peême, upeicha avei ta pene mbaepôrâ co tembiapoapó pype avei.

8Nañeêi che rembiapoucapy vaicha peême, ajechaucasénte pende poraŷjú ndajaeijá guaúnte romboyoyá pype ambuecue kyreŷcue reje.

9Peê peicuaama voí imbae pôrâja Ñandeyára Jesú Cristo, pende raŷjupápe voi Jae oñembo poriaju jague mbae rerecojá ramo yepe Jae, icatu jaguâ peêcuera upe Jae iporiaju jague reje peyeyapo mbae rerecojá ramo.

10Coina ape oime peteî mbae che jae vaerâ peême cova catu ipôrâ peêmeguarâ peñypyrú vaecue ymama voí peyapovo upeva, ja upeicha avei pebya eterei peyapojápe pe roŷ ambue guive voí yepe.

11Ipôrâ coanga avei peyapo jecoitépeve co tembiapóapopŷ ja voíeté pebya jagueicha peyaposévo, upeicha avei peî voíeté peyapo jaguâ jecópe icatu jaicha peême.

12Upeicha voi ñande kyreŷma guive yayapose voívo co ñane rembiapo, oyererojorŷne iya jaichaminte ñandeve ja anichene iya-ŷ-jaicha ñandeve.

13Che voí ndaei cova ambuepe ivevui jaguâ, ja peême ipojyi jaguâ,

14icatu jaguânte coanga guârâ opava peteîcha pene mbae rerecojágui peipytyvô ichupecuera iporiajújápe ja jaecuera imbae rerecojáguima penepytyvô peême pende poriajújápe ja upeichape peico jaguâ peteîcha,

15oyee jaicha Santa Escriturape: Pe omonoô jeta vaecue ndoguerecoi jembyrâ, ja pe omonoô mboby vaecue ndoguerecoi oicôtevê jaguâicha.

16Tûpâ Ñandeyárape arojory Jae ombo pyakyreŷjá upeicha avei Titope pende rejejápe.

17Jae voi avei añetejápe oguerojory pe che rembiapoucapy ja ikyreŷetégui yepe oyejegui vointe ojo pene rendape.

18Ja romondo jendive upe ñande reŷivape pe imombeuguasu pyré pe Evangelio rejejápe umi Iglesia rejegua oparupiguape,

19ja nda upevareje añoi, jae voi oñembosacoi vaecue umi Iglesiarejegua gui ore îrûrâ tapérâme rogueraja jaguâ co mbae pôrâ romboyao vaerâ opavape oñembotuvicha jaguâ Tûpâ Ñandeyára voi ja oyejechaucá jaguâ voi pene kyreŷjá.

20Ore roñejaâ voí anichene jaguâ oremoî vaí reí co romboyaójápe co tûpâmbae,

21roñejaâvo ore reco pôtí pôrâ jaguâ na Ñandeyára resápe añói umi cuimbae cuera resápe yepe upeicha avei.

22Romondo avei jendivecuera co ñande reŷivape jeta yeby royuju vaecue ikyreŷjá jéta mbaepe, ja coanga jae ikyreŷetevé yepe, oyerovia tuvichaite gui pende reje.

23Ja co Tito voi jae che îrûva, ja che pytyvôjára pomboejápe peême, ja umi ore reŷicuera ambuecue avei, jaecuera opava umi Iglesia rejegua rembiyocuai (Apostoles), ja jaecuera Cristo mbotuvichajára.

24Upeicharamo pejechaucana umi Iglesiarejegua resápe añetejá peporojaŷjujá ja jecopejá co ore pomombeu guasu jague peême ichupecuera.