2 Corintoýgua 5 - Paraguayan Guarani 1913 New Testament

1Ñande yaicuaa voi co oga ybyarigua oga aoguiguaicha ñane anga ryrú oñembyai ramo, yarecojá Tûpâ Ñandeyára gui ñane rendâgua, nda oga iyapopyrei avavé porupi voí, yaico tapia jaguâ yvagape.

2Cova co yaicojápe ñane ajô ñaina ja ñande pya yerure ñañemondé yoa jaguâ pe yaico jaguâme yvápe,

3icatu jaguâ ñañemondé pype, upeicha ani yayeyujú opívo.

4Ñande voi ñaiméva co ñande roga aoguiguaicha ñane anga ryrupe, ñane ajô asy pojyi eterei, ndajaei ñañemboíségui, ñañemondé yoáse guinte, icatu jaguâ pe ñande roga omano vaerâ moa vaecue oyejea pe tecové iyapyraŷva reje.

5Pe ñande apojaré co vaerâ voínte, upéva Tûpâ Ñandeyára, upéva voi omeê vaecue ñandeve iyEspiritupe omotenonde ñypyrumbŷrâicha.

6Upeichape yaicove tapia pya guasu ja kyreŷ rejeve yaicuaavo voi co ñaime aya ñande retepe ñane rendâgua ñane ambuejá yaicovo Ñandeyára renda gui.

7Yarovia reje voi yaico, nañande resapyso rupiri.

8Upevareje yayerovia ñande pyaguasu, ja jiâite ñandeve ipôrâve yayerová ñande retégui yaja jaguâ ñane rendâgua Ñandeyára ypype.

9Upévareje ñañejaâ avei ñane râcâteŷvo ñaiméme ja ñaimeŷme ñambojorŷ jaguâ Ichupe.

10Tecôtevê voí opavave ñande cuera yayejechácuaávo Cristo imburuvichajápe oñembojecovia jaguâ peteî teîvape jembiapocue oyapo jagueichagua jetépe oicové yave jicuai, ta ipôrâpa rae terâ ta ivaí rae.

11Upévareje yaicuaa pype Ñandeyára gui oyekyjŷyé vaerája ore rogueroviáucá umi ybypórape. Ore oreyejegui roime Tûpâ Ñandeyára resápe, ja aipota peê avei pende pyapype ore rechacuaa jecópe.

12Coanga no roñeporanguerecóucáséi yeby oreyupe peême, romeênte peême iya jaguâ peême peñemombeu guasu jaguâ ore rejejápe pereco jaguâ peye vaerâ umi oñemombeu guasuva oyupe voi guaujápe ja nda ipyapŷpei.

13Sapya ore roñembotarová ramo, Tûpâ Ñandeyára rejejápente racae, ja ore âcâ guapy pôrâ ramo pende rejejápente racae.

14Cristo rayju voi ore ñatôi, ja roimoâ upeicha peteî omano rire opavavé rejejápe, upeicha ramo opavave omanomba jague,

15ja Jae omano jague opavave rejejápe umi oicoveva anichene jaguâ oicovévé iyejejápente, oicové jaguânte pe omano ja oicove yeby vaecue jesejápecuera rejejápe.

16Upeicharamo, ore coanga guive jenondévo ndo roicuaai avavépe ore reco cue guivó cuimbaeicha, ja Cristope yepe roicuaa rire yepe ore recocue guivo, coanga ndo roicuaavéima Ichupe upeicha.

17Upeicharamo, oime ramo Cristo rejeguava, upéva oñemoña pyajuma vaecue rejegua, umimbae ymaguare coanga opáma, coanga opambae oñembo pyajúpá.

18Opa âmbae Ñandeyára guiguante. Upéva ore moñyrô iyupe voi Cristo rupi ja omeê oreve jembiyocuaiguaicha pe roporo moñyrô jaguâ.

19Aiporamo Tûpâ Ñandeyára oi jagueicha Cristo pype omoñyrôvo umi ybypóra cuera iyupe voi imanduave ŷ jaguâ iñangaipa reje, upeicha avei, Jae omeê ore pype iñeê roporo moñyrôjárâ.

20Upeicharamo, ore jembiyocuai, roñemongueta vaerâ Cristo recoviá Tûpâ Ñandeyára oyerurevaicha ore rupi, upeicha ore royerure peême Cristo rérape Peñyrôkéna Ñandeyárape.

21Upe iñangaipacuaa-ŷ-vaecuepe Jae oyapo Ichupe angaipavóra ramo ñande rejejápe icatu jaguâ ñande Jesecuera gua ramo yayejecha imarangatuvaicha Tûpâ Ñandeyára ypype.