1 Timoteo 6 - Paraguayan Guarani 1913 New Testament

1Opa tembiguai jicuaiva ambue poguŷpe toguereco iyára ete umi oñembuete vaerâicha jecoitépe, anichene jaguâ oyeyao Tûpâ Ñandeyára réra, ja pe ore remimboe.

2Ja umi oguerecova iyára ogueroviávape, ani ogueroŷrô ichupecuera ñande rejeguajá reje, toyeyocuáiucánte jecopévé yepe ichupecuera ogueroviaja reje, ja oyejaŷjúva já reje umi ojupitŷva jembiapocue jecopegua. Coicha eporomboé ja emomanduá.

3Oime ramo oporomboe ambuétéva, ja ndoyoyáiva umi ñeê jecopegua reje Ñandeyára Jesu Cristo ñeê reje voi, ja ndo yoyáiva pe ore remimboe ñanemombuete vaerá jecope reje,

4upeva oñembobúva reí, ja ndoicuaai mbaeve jecoitepe, ja oico itabŷvaicha oyuaby ja oñoraŷrôvo ñeê rei reje. Umimbae voi ñañomaêvaíucá, ja ñañembo yuabŷucá, ja ñañembo yoyaóucá, ja ñañembo pyapy ñañáucá,

5ja omboyererovia tapia umi tecove iñâcâ taby raívape oicova pe pytûnguype pe Tûpâ Ñandeyára Ñeê añetegua gui, ja oimoâva Tûpâ Ñandeyárape ñambuetejá ñane mombaeguasuucajaraja.

6Anetejape pe ñambuete Tûpâ Ñandeyárape upéva ñanemo mbaeguasúcá jarâ ñandéve yabŷájápe ramo.

7Ñande nda yarui vaecue voi mbaeve voi co ybype, ja ndicatui yaraja jaguâ mbaeve co ybyari gui yajávo.

8Ja yareco ramo icatu jaguâ yacaru ja ña ñemonde, ta yabyá coa rejeve.

9Umi oñemo mbae rerecójaséva, icatu joa mbaepochŷ oñatôijápe ja ñujâme, ja jetambae itaby raívape, ja itieŷvape imârâ jaguâme. Umimbae omondo umi ybypóra cuerape pe oñemo cañŷ ja oñembuaipájápe.

10Pe imbae repy rerecosejá voí, upéva opaichagua mbae vaí rapóicha, ja oime voí peteîva oyepyso etereiva pe mbaerepŷ reje opia vaecue pe iyeroviajá gui, ja upeichape oyecutu vaecue jetaite pya mbyasype.

11Nde, cuimbae, Tûpâ Ñandeyára rejegua, eñeguajê umi mbae gui, ja eñejaâ reñembo jecopôrâ pôrâve jaguâ, rembuete jaguâ jecoitepe Tûpâ Nandeyárape, ja reyeroviápá pôrâ jaguâ, rejaŷjú jaguâ jecope, ja nde reco kîrîrî jaguâ, ja nde reco pochy cuaa ŷ jaguâ.

12Eñejaâ icatu jagueicha co ñoraŷrô pôrâme yayeroviaja rejejápe, eyapocói pe tecove iyapyra-ŷ-vareje pe reñejenôi jaguepe reñemombeu pôrâ yave guare co teco marangatu rejeguajá jeta nde rechajaré renondepe.

13Che romomandua Tûpâ Ñandeyára ypype guaicha pe omoingovéva opambaepe, ja Cristo Jesús ypype guaicha upe oñemombeú pôrâ vaecue Poncio Pilato ypype Jae co teco marangatu rejeguajá.

14Ayerure ndeve, upeicharamo, rembuaye jaguâ jecope pe Tûpâ Ñandeyára rembiapoucapy nde reco mârâ ŷ reje oime ŷ reje nemoî vaíjárâ Ñandeyára Jesu Cristo oyejechauca yeby jaguâ ára peve.

15Upe jiarape voi oyejúucáne upéva pe imarangatúetéetévéva pe jaeñova tuvichá vichavéva, pe mburuvicha guasu Ruvicha guasu yebŷva, pe carai guasu Carai guasu yebŷva.

16Upéva voi jaeño oico omano-ŷ-vaerâ, oicova jendyva apytepe icatu-ŷ-jápe yaya, pe avave cuimbae ndojecha vaecuei, ja icatu ŷ vaerâ ojecha, toñembuete Jae ja toñembotuvicha icatu jagueicha tapia guârâ. Amen.

17Emomanduá umi mbae rerecojá angaguápe, ani oñembotuvicha reí, ja ani oyerovia pe imbae rerecojá reje, icatu jaguâ ojaârô -- mbae opyta-ŷ-va upeva -- toyeroviánte pe Tûpâ Ñandeyára oicoveva reje omeêva ñandeve opambae jemby jaguâicha yabya jaguâ:

18ta imbaepôrâ, ta jembiapo pôrâ jeta meme, ta oporo ñomboyaóva, ta oporo ñombaéva,

19ombyatyvo iyupe guârâ cuera ombojapó pôrâ jaguâ pe omopuâ vaerâme, icatu jaguâ ojupity pe tecove jaeteva peve.

20Nde Timoteo eñangareco pôrâ umimbae oyeyerovia jague ndereje. Eyere catu umi oñeê reí reíva guaujápe gui, ani jaguâ reñejaâ umi imbaecuaáva ndive umi guaujápe guarénteva.

21Oime vaecue voi peteîva umiva rejeguava oñemombeu guasu ramo yepe co ñande yayeroviajá reje, upeicha rejeve oyaby. Ñandeyára ta pene mbopyapôrâ peême. Amen.