Rembiapocue 23 - Paraguayan Guarani 1913 New Testament

1Upei catu Pablo oyesareco umi pe oñemonoôjápe oiva reje ja jei: Peê carai cuera, che reŷí cuera, che aico vaecue jecope che pya pôrâ rejeve Tûpâ Ñandeyára ypypeguaicha cova co ára peve.

2Ja upei catu pe pai guasu Ananias jeíucá umi jicuai vaecuepe jenondepe oinûpâ jaguâ ichupe iyuru reje.

3Upei catu jei Pablo ichupe: Tûpâ Ñandeyára to nenûpâ ndeve, nde oyeyapete morôtîva! ¿Ndepa reguapyva reina che moñeê jaguâ jecópe ja jecope ŷ che nûpâucá cheve?

4Ja umi jicuaiva upepe jei: Co Tûpâ Ñandeyára pai guasúpépa reñeê vaí?

5Ja jei Pablo: Che nda jechacuaai ichupe, che reŷí cuera, jae paiguasujá. Oyeé Santa Escriturape voi: Pene retâ ruvichape ani reñeê vaí.

6Upei catu Pablo ojechacuaama ramo peteî atyra Saduceojá ja pe atyra ambue Fariseojá, osapucai pe oñemonoôjápe: Carai cuera che reŷí cuera, che Fariseo, ja Fariseo raŷré, coanga upe ñajaarô vaerâ reje umi omano vaecue rejejápe yajecha oicove yebynepa oñeñotŷ jaguegui? upevareje chemoñeêsejá coápe.

7Ja jeima ramo coambae oyuaby jicuai oñondive umi fariseo ja umi saduceo ja upeicha oyepea oyuejegui umi oñembyatŷva jicuai.

8Umi Saduceo voi jei ndipórijá oicove yeby jaguâ umi omano vaecue paûgui, ndipórijá yvapegua, ja ndipórijá anga, umi Fariseo voí jei oimejá â mocoîve mbae.

9Ja oico aybu guasu ja oñemboŷ umi iñaranduva umi Fariseo renda cotŷgua ja oyuaby jendive cuera jeivo: Ore ndo royujui mbaeve ivaíva co cuimbaepe. Sapya oime nerae angue terâ yvapegua oñeê vaecue ichupe.

10Ja upepe oyuaby etegui jicuai pe mburuvicha okyjŷyévo icatu jaguâ Pablo oñemongui jaecuera rupi oguerúrucá jembiyocuáipe ôguenojê jaguâ ichupe iyapytegui cuera ja ogueraja jaguâ pe mburuvicha rogape.

11Ja pe pyjare ambue oyejechauca Ñandeyára ichupe ja jei: Nde pya guasúna, Pablo, remojerâcuâ jagueicha Chejegui co Jerusalempe, upeicha avei tecôtevê reicuaáucá Chejegui Romape avei.

12Ja coê vove, oime umi Judio cuérava oñembyaty vaecue ja omeê iñeê Tûpâ rerape oicuameêvo ndocarui jaguâ ja ndoŷui jaguâ oyuca peve Pablope.

13Ja oi jetave cuarenta cuimbaegui upe iñeê omeê vaecue.

14Umiva oyéoi umi pai ruvicha ja umi ituyáva rendape ja jei: Ore romeêma ore ñeê Tûpâ rerape rou ŷ jaguâ mbaeve royuca peve Pablope.

15Coanga, upeicharamo, peêcuera ja umi ambue ore ruvicha cuera ta peyerure pe mburuvichape tôguenojê ichupe peême coêramo peicuaa pôrâvese jaguâicha mbae añetévegua ichugui, ja ore jae ôguajê mboyve roimembane royuca jaguâ ichupe.

16Uperamo voi peteî Pablo reindy memby ojendu omoñujá jaguâ umiva ja upegui ojo ja oiké pe mburuvicha cotype ja oicuaáucá Pablope.

17Upei catu Pablo ojenoî peteî umi mburuvichávape ja jei ichupe: Eraja coa cariaŷpe pe mburuvicha guasu rendape, oguereco voi mbae oicuaáucá vaerâ ichupe.

18Ja upeicha oipyjy ichupe ja oguerajá pe mburuvicha ambue rogape ja jei: Pablo, pe oiva ybyracua rogape, che renoî râmô, ja oyerure cheve aru jaguâ coápe co cariaŷpe oguerecova mbae nemongueta jaguâ ndeve.

19Upemaramo pe mburuvicha oipyjy ichupe ipogui ja ogueraja ichupe jaeñojapecuera ja oporandu: ¿Mbaépa rereco ere vaerâ cheve?

20Ja jae jei: Oime umi Judio oñemongueta oyerure jaguâ ndeve renojê jaguâ coê ramo pe Pablope pe iñemoñoôjápe oporandu pôrâse jaguâicha ichupe mbae añetevégua.

21Ja ani nde rerovia ichupecuera. Oime jetave cuimbae cuarenta gui omañava jese jicuai, omeê vaecue iñeê Tûpâ rérape ani jaguâ ocaru terâ joŷú oyuca peve ichupe. Ja coanga oñembosacoíma jicuai ojaâróvo ne ñeênte.

22Upemaramo pe mburuvicha omondo pe cariaŷpe jeivo ichupe ani jaguâ jei avavepe omombeu jague ichupe upea.

23Upei catu ojenoî mocoî mburuvichaípe ja ombuesacoíucá upe pyjare ryguasu sapucai peteî rô guârâ doscientos tembiyocuaipe oyeói jaguâ Cesareape ja setenta cabayu arigua ja doscientos lanceros,

24ja ombosacoí jaguâ cabayu omoî jaguâ Pablope jiari ja ogueraja jaguâ ichupe imârâŷreje Felix pe mburuvicha guasu rendape.

25Ja oyapo peteî cuatia ñeê coicha:

26Che Claudio Lisias, romomaiteiuca ndeve, che Felix, che carai mbaepôrâiteva, ore ruvicha guasu.

27Co cuimbae oñeñapytî vaecue umi Judio rupi ja jaecuera oyuca moâ ichupe, ja che anojê ichupe ichugui cuera aja pype che rembiyocuai rejeve oñemomarandú jague reje cheve jae Romanojá.

28Ja aicuaa pôrâse gui jecópe mbaépa omboyase rae jese arajauca pe iñemonoôjápe jaecuera.

29Ja upepe ayuju omboyasejá jese oyuaby jague reje jendive mbae jetâ reco rejeguape, ja ndiporijá mbaeve omboya vaerâ jese icatu jaguâicha yayucauca jaguâ ichupe terâ ñamoî jaguâ ichupe ybyrácuápe yepe.

30Upegui oñemombeu rupi cheve umi Judio oñembosacoi jaguâ jicuai moñujájápe, upevove arajauca ichupe nerendape ja amombeu avei umi omombeujarépe ichupe toñemonguetá nerenondepe co mbae oguerecova icoty coty.

31Upei catu umi temboyocuai cuera oyeyapóucá jagueicha ichupecuera, oipyjy Pablope ja ogueraja ichupe pyjarepe Antipatrispeve.

32Ja pe ára ambuepe ojeya pype jendive umi cabayúariguápe ojo jaguâ jendive, umi ambue cuera oyeby yeby pe mburuvicha rogape.

33Ja ôguajêma ramo Cesareape, omeê pe cuatia ñeê pe mburuvicha guasúpe ja omoingue avei Pablope jenondepe,

34ja pe mburuvicha omoñeêmbáma ramo pe cuatiañeê oporandu ichupe ¿mbae tetâmeguapa? Ja oicuaama ramo jae Ciliciápeguajá jei ichupe:

35Che rojendune ndeve ouma ramo umi nemombeujárâ. Ja upei catu oñangarecóucá jese pe Herodes rogape.