Salmo 111 - Bible in Guaraní Mbyá

Nhanderuete opena porãague re ijayvua

1Aleluia!

Xepy'a ha'e javi py aroporaei 'rã Senhor

heko porã va'e kuery ijatya py.

2 Senhor rembiapokue ma tuvixa meme.

Oguerovy'a va'e kuery ha'e javi oikuaa pota 'rã ha'e nunga re.

3Guembiapo ha'e javi py oexa uka guexakãa ha'e opo'akaa,

heko porãa avi oĩ 'rã raka'e rã peve.

4Hembiapo porã re nhanema'endu'a aguã rami ojapo.

Senhor ma porayvu ha'e nhomboaxy va'e.

5Omongaru 'rã henonde ojererokyjea rupi ikuai va'e,

ima'endu'a riae 'rã guexeve guarã ojapo va'ekue re.

6Ojeupegua kuery pe oexa uka 'rã opo'akaa mba'emo ojapoa py,

ijyvyrã amboae regua kuery ikuaiague ome'ẽa py.

7Opo py ojapo va'e ma anhetẽ ha'e teko porã rupi meme ojapo,

nhanembo'ea voi ojeroviapy meme.

8Ha'e nunga oĩ porã 'rã raka'e rã peve,

ojeroviapy oikoa ha'e teko porã rupi oeja rire.

9Ojeupegua kuery pe ombou heraa jepearã,

guexeve guarã ojapo vy raka'e rã peve guarã.

Hery ma iky'a e'ỹ va'e ha'e nhomongyjea.

10 Senhor renonde jajererokyjea rupi jaiko vy 'rãe jaupity 'arandua.

Ha'e rami ikuai va'e ha'e javi oexa uka 'rã 'arandu.

Jaroporaeia oĩ riae 'rã raka'e rã peve!