Salmo 64 - Bible in Guaraní Mbyá

1Xeruete, endu ke ajexavai vy ajapukaia.

Eraa jepe xerekovea xerovaigua kuery poxya gui.

2Xenhomi heko vai va'e ojapoxe va'e gui,

heko vai va'e opa marã onhendu okuapya gui.

3Ha'e va'e kuery ma kyxe oaĩmbe'ea rami oguereko katu 'rã oapekũ,

hu'y oa'angaa rami oguereko katu 'rã ayvu vai,

4nhemi rupi ojapo vai aguã anhetẽ rupi ikuai va'e re,

ha'e kuery re opoi xapy'a 'rã okyje e'ỹ re.

5Mba'emo vai rupi ikuaia gui ndojepe'ai 'rãe,

nhemi rupi ijayvu 'rã joapo vai aguã re.

Ha'e vy joupe-upe “Mava'e tu nhanderexa 'rã?” he'i.

6Teko vai re rive oikuaa pota 'rã,

ha'e gui ojou 'rã ha'ekue rami ete ojapo aguã.

Yvykua vaikue rami onhembopy'aa ha'e peteĩ-teĩ py'a.

7Ha'e gui ma ha'e kuery re Nhanderuete ju 'rã opoi ngu'y.

Ha'e kuery oendu xapy'a 'rã onhyvõague.

8Po ramigua py ha'e kuery ho'a 'rã:

ijayvuague rami ae oiko 'rã ha'e kuery re.

Ha'e ramo hexaa kuery ha'e javi oakã ombovava 'rã,

9ha'e avakue ikuai va'e ha'e javi ma ojererokyje reve

oikuaa uka 'rã Nhanderuete rembiapo,

ha'e ojapo va'e oikuaa vy.

10Ha'e gui heko porã va'e ma oguerovy'a 'rã Senhor,

hexe ojerovia 'rã guive.

Anhetẽ rupi ipy'a va'e ha'e javi ovy'a 'rã.

Mba'emo aju omono'õmbaa ogueroma'endu'aa ague

Jogueroporaei va'e pe mboraeirã Davi ombopara va'ekue.