Salmo 81 - Bible in Guaraní Mbyá

1Peporaei ke pevy'aa rupi Nhanderuete nhanemombaraetea pe.

Perovy'a Jacó Ruete.

2Peporaei vy pembojoguy pandeiro pu py.

Pembopu porã mba'epu ixã reta va'e ha'e mbaraka.

3Pembopu ke mimby guaxu

jaxy pyau ha'e jaxy inhypytũ nhavõ,

nhandevygua ngaru oikoa ára.

4Ha'e rami aguã ae Jacó Ruete oeja va'ekue

Israel kuery rekorã.

5José kuery rekorã oeja raka'e

Egito pygua kuery re opu'ã vy oo jave.

Peteĩ ayvu xee naendu kuaai va'ekue aendu ju aipoe'i rã:

6“Pendevoyi amboguejy va'ekue pendeaxi'y áry gui,

pendepo voi aipe'a ajaka peupi heravyague gui.

7Pejexavai vy xevy pejapukai ramo xee rogueraa jepe va'ekue.

Yapu mbyte gui xee rombovai,

roeko a'ã va'ekue guive Meribá py yy oĩ va'e yvýry”, he'i.

8“Xevygua kuery, pejapyxaka ke pendevy xeayvu rã.

Israel kuery, peẽ kuery xenhe'ẽ rendu va'e rire.

9Penembyte pereko eme Penderuete ramigua rive,

tuuete mboae renonde pembojerovia eme.

10Xee ae ma Senhor Penderuete,

Egito yvy gui penerenoẽare.

Peipe'apa ke pendejuru, ha'e rã xee romongaru 'rã”, ha'e va'ekue.

11Ha'e rami teĩ xevygua kuery naxenhe'ẽ rendui.

Israel kuery ndaxekuaa potai.

12Ha'e rire xee ajapo ha'e kuery ae akã ratãa rupi ikuai aguã rami,

ha'e kuery oipotaa rami rive ikuai aguã.

13Xevygua kuery xenhe'ẽ rendu va'e rire,

Xeguigua tape rupi ae Israel kuery oo va'e rire

14xee amomba voi 'rãgue hovaigua kuery,

xepo'aka 'rãgue ija'e e'ỹ va'e ha'e javi re.

15 Senhor re ija'e e'ỹ va'e kuery ikuai 'rãgue ixupe,

ha'e rami ikuai 'rãgue raka'e rã peve.

16Ha'e rã peẽ kuery ma trigo iporãve va'e re romongaru 'rãgue,

ei ita pa'ũ gui guare ame'ẽ 'rãgue penevyatãmba peve.

Ha'eve e'ỹa rami joe opena va'e kuery pe ijayvua

Mboraeirã Asafe ombopara va'ekue.