Salmo 80 - Bible in Guaraní Mbyá

1Israel kuery re repena va'ety, ejapyxaka ke.

Ndee rereko José ramymino kuery mymba rami.

Anjo ipepo va'e ikuaia áry reĩa gui exa uka nerexakãa.

2Efraim, Benjamim ha'e Manassés regua kuery pe

exa uka ndepo'akaa, eju guive orereraa jepe aguã.

3Oreruete, oremoingo porã ju ke.

Orevy pe exa uka nderova rexakãa, roo jepe aguã.

4 Senhor Oreruete nexondaro reta va'e,

raka'e peve 'rã tu rendu rive ndevygua kuery onhembo'ea?

5Orerexay re ae oremongaru tembi'u 'rãgue py,

karo remonyẽ orepy'a vaia roy'u aguã.

6Rejapo orea katy'i ikuai va'e orere opu'ã aguã rami,

ha'e orerovaigua kuery orere opuka rei aguã.

7Oreruete nexondaro reta va'e, oremoingo porã ju ke.

Orevy pe exa uka nderova rexakãa, roo jepe aguã.

8Egito yvy gui reru raka'e peteĩ uva rakãgue'i.

Yvy regua kuery remoxẽague py renhotỹ.

9Yvy remboa'eveague rupi hapo porã ovy,

ha'e yvy áry rupi hakã'i oaĩ ovy.

10Ha'e rami vy omokuaray'ãmba yvyty ikuai va'e,

yary tuvixakueve va'e guive.

11Ye'ẽ peve oo oiny hovapy,

ha'e hoky ma yakã peve oo.

12Ha'e rire teĩ mba'e re tu ha'vy reity uka ikora?

Ha'e ramo tape rupi oaxa va'e tema omondo 'rã hi'a.

13Tajaxu omou'ũmba 'rã,

ha'e mymba kuery nhuũndy rupigua ho'upa 'rã.

14Oreruete nexondaro reta va'e, rojerure ndevy:

Ejevy ju orea py.

Pe yva gui ema'ẽ orere,

eju eikuaa pota aguã ndevygua uva rembypy re.

15Epy ke ndepo py ae renhotỹ va'ekue,

hakã pyau ndejeupe guarã ae remombaraete va'ekue.

16Ojayapaa ma rire oapypaa ma tata py.

Tokanhymba orerovaigua kuery ndepoxya nderova py rexa uka ramo.

17Tove ndepo toĩ ndeyke re ikuai va'e kuery re,

ava ra'y ndejeupe guarã ae remombaraete va'ekue re.

18Ha'e rire ore kuery ndorojepe'avei ma 'rã ndea gui.

Oremoingove ju ke.

Ha'e ramo 'rãe nderery rupi rojapukai.

19 Senhor Oreruete nexondaro reta va'e, oremoingo porã ju.

Orevy exa uka nderova rexakãa, roo jepe aguã.

Jaroporai ha'e nhanhe'ẽ rendu aguã regua

Jogueroporaei va'e pe mboraeirã Asafe ombopara va'ekue “Uva'a onhamiaty” he'ia py oporaeia rami oporaei aguã.