Salmo 48 - Bible in Guaraní Mbyá

1Yvate ete va'e ma Senhor oiko,

ha'evea rami jaroporaei

Nhanderuete pegua tetã py.

2Ixupegua yvyty iky'a e'ỹ va'e ma yvate ete,

yvy jave re oguerovy'aa va'e.

Sião yvyty oĩ kuaray puku-a yke katy,

huvixave retã oĩa.

3Tetã py oo ikorapa va'e rupi

Nhanderuete ojekuaa uka nhanhemi aguã yvate va'e rami.

4Ha'e nunga rupi huvixa kuery nhomoirũmba jogueruvy va'ekue

okanhymba.

5Tetã oexa vyve onhemondyipa.

Okyjepa vy onhamba.

6Ha'e py ngyje rive ipo'aka ha'e kuery re,

oendu guive haxy imemby ta va'e rami.

7Yvytu kuaray oua katy gui ou va'e py

rembovaipa Társis gui kanoã ou va'ekue.

8Omombe'ua rã nhaenduague rami

jaexa Senhor ixondaro reta va'e pegua tetã py oiko va'e,

Nhanderuete pegua tetã py ae.

Nhanderuete omoĩ atã 'rã raka'e rã peve.

9Oreruete, renhomboaxya re orema'endu'a

ndevygua templo mbyte roĩa py.

10Oreruete, nderery oikuaa pavẽ 'rã.

Ha'e rami vy ndevy oporaei rã yvy apy peve 'rã onhendu.

Ndepo py ha'evea rami rejoguereko.

11Tovy'aa Sião yvyty re,

Judá rajy kuery avi tovy'a ne'arandua re.

12Peguata ke Sião rupi,

ha'e javi rupi pejere.

Peipapa torre ikuai va'e.

13Peikuaa pota porã ikora yvatea re,

ha'e pexa pota oo ikorapa va'e ikuai va'e re,

raka'e rã ikuai va'erã pe pemombe'u kuaa aguã:

14“Ha'e rami oiko Nhanderuete

raka'e rã peve guarã.

Nhanderereko 'rã nhamano peve.”

Avakue okanhymba aguã re ijayvua

Jogueroporaei va'e pe Coré ra'y kuery ombopara va'ekue.