Salmo 108 - Bible in Guaraní Mbyá

Mboraeirã Davi ombopara va'ekue. Salmo 57.7-11; Salmo 60.5-12

1Xeruete, xekuraxõ oĩ atã ma.

Aporaei vy roguerovy'a 'rã xenhe'ẽ ha'e javi py.

2Mbaraka ha'e mba'epu ixã reta va'e, pevy ke.

Xee ambovy 'rã ko'ẽ ju.

3 Senhor, roguerovy'a 'rã yvy regua kuery mbyte,

ndevy aporaei 'rã ha'e javi regua mbyte.

4Mba'eta renhomboaxya oo 'rã yva peve,

ha'e ndereko porãa ma arai rovai peve 'rã oo.

5Xeruete, enhemboyvate yva áry rupi,

ha'e yvy jave re tojekuaa nerexakãa,

6ore nerembiayvu kuery roo jepe aguã.

Orereraa jepe ke reiporu kuaa regua py, ha'e orembovai.

7Nhanderuete ijayvu oky'a e'ỹa rupi:

“Xepo'akaa rupi vy amboja'o 'rã Siquém yvy,

aa'ã 'rã Sucote regua yvyugua guive.

8Gileade ha'e Manassés yvy ma xemba'e meme itui.

Efraim yvy ma xengora ratã.

Judá ma xepo pygua.

9Ha'e rã Moabe yvy ma hy'a ajejoiaty itui,

Edom yvy áry ma amombo 'rã xepy regua,

ha'e Filístia pygua kuery re xepo'aka vy avy'a nhendu 'rã.”

10Mava'e nda'u xereraa 'rã tetã ikorapa va'ea py?

Mava'e nda'u xereraa 'rã Edom yvy re?

11Mba'eta Oreruete, ndee orereja rive va'ekue.

Oreruete, ndereovei ma orexondaro kuery reve!

12Orereraa jepe nho ke rojexavaia gui,

mba'eta avakue orereraa jepea ma mba'everã ndovarei.

13Nhanderuete re vy ae 'rã nhandepo'aka,

mba'eta ha'e opyrõ 'rã nhanderovaigua kuery re.

Ngovaigua kuery ombopagaa aguã re ojerurea ague

Jogueroporaei va'e pe mboraeirã Davi ombopara va'ekue.