Salmo 25 - Bible in Guaraní Mbyá

Nhanderuete pe onhepytyvõ ukaa agueDavi ombopara va'ekue.

1Ndere Senhor, aroma'endu'a xenhe'ẽ.

2Xeruete, ndere xee ajerovia va'e.

Axĩmba rei aguã rami e'ỹ ke xerereko,

xerovaigua kuery xere ovy'a rei e'ỹ aguã.

3Ha'e rã nerarõ va'e kuery ma peteĩve noxĩmbai 'rã.

Oxĩmba va'erã ma nhemi rupi joapo vai va'e kuery.

4 Senhor, eikuaa uka xevy ndeguigua tape.

Xembo'e ke reikoa rupi aiko avi aguã.

5Xerereko ndeguigua anhetẽ va'e rupi, xerekombo'e guive,

mba'eta ndee ma Xeruete xereraa jepea,

ndee ae roarõ aikovy ko'ẽ nhavõ.

6 Senhor, nema'endu'a ke renhomboaxy ha'e ndeporayvua rupi

jypy guive reikoa re.

7Nema'endu'a eme ke xekunumi jave ajejavyague re,

neĩ nderovai xereko vaiague re.

Senhor, xemboaxya rupi anho ke nema'endu'a xere,

ndeporayvu va'e vy.

8 Senhor ma iporayvu ha'e heko porã va'e vy

ojejavypa va'e kuery pe oikuaa uka 'rã tape.

9Yvyĩgueve ma ha'e oguereko 'rã teko porã rupi,

ombo'e 'rã ojeguigua tape rupi oiko aguã re.

10 Senhor guigua tape ha'e javi rupi oĩ nhomboaxya ha'e anhetẽ va'e,

guexeve guarã ojapo va'ekue ha'e ijayvuague rupi ikuai va'e pe.

11 Senhor, nderery remboete ukaa rupi vy

emboguepa xereko vaiague heta teĩ.

12Avakue Senhor renonde ojererokyjea rupi ikuai va'e pe

oikuaa uka 'rã tape oo aguã.

13Ha'e ramo ha'e kuery nhe'ẽ opytu'u 'rã ovy'a reve,

ha'e gui hamymino kuery jevy ikuai porã 'rã yvy re.

14 Senhor renonde ojererokyjea rupi ikuai va'e ma ha'e omonhemboja 'rã.

Ha'e va'e kuery pe oikuaa uka 'rã guexeve guarã ojapo va'ekue.

15Ama'ẽ riae aikovy Senhor re,

mba'eta ha'e ae oipe'a 'rã xepy nhuã gui.

16Ejevy ju xea py, xemboaxy ju,

mba'eta xeae'i aĩ vy ajexavai.

17Xemombytu'u ke xepy'a py nda'eveia gui,

xepe'a ke ajexavaia gui.

18Eikuaa pota aiko axya ha'e ajexavaia re,

ha'e emboguepa ajejavyague ha'e javi.

19Eikuaa pota ke xerovaigua kuery re,

heta vaipa ramo.

Xere ija'e e'ỹ va'e kuery xembojeguaru rei okuapy.

20Earõ xenhe'ẽ re, ha'e xerepy.

Taiko eme axĩmba rei aguã rami,

ndere anhemi rire.

21Anhetẽ rupi ha'e teko porã rupi aikoa tojapo akanhy e'ỹ aguã rami,

mba'eta ndee ae xee roarõ.

22Xeruete, eraa jepe Israel kuery

ikuai axya ha'e javi gui.