Salmo 61 - Bible in Guaraní Mbyá

1Xeruete, endu ke ajapukaia.

Eikuaa pota anhembo'e ramo.

2Yvy apy gui ajapukai ndevy,

xepy'apy py ajexavai vy.

Xereraa ke itaova xegui yvateve va'e áry.

3Mba'eta ndee ma anhemiaty,

xerovaigua kuery gui torre imbaraete va'e reiko.

4Taiko riae nembojeroviaaty rupi raka'e rã peve.

Ndepepo guýry xee anhemi va'e.

5Mba'eta Xeruete, ndee rendu anhemboayvu rã.

Ha'e rami vy xevy pe reme'ẽ iporã va'e,

nderery oendu vy ojererokyje va'e kuery reve.

6Remoĩve 'rã huvixave ára.

Hi'ára ipukuve ete 'rã aỹgua ha'e raka'e rãgua ikuaia peve.

7Toĩ riae Nhanderuete renonde.

Ndereko porãa ha'e ndeporayvua rupi vy toikove riae.

8Ha'e rami rã nderery rupi aporaei 'rã raka'e rã peve,

anhemboayvuague ajapo aguã ko'ẽ nhavõ.

Jajerovia aguã regua

Jogueroporaei va'e Jedutum oporaeia rami oporaei aguã Davi ombopara va'ekue.