Whakakitenga 7 - Maori Bible 2012(MRI2012)

Te Hunga 144,000 nō Īharaira

1Muri iho i ēnei mea ka kite ahau ngā anahera tokowhā, e tū ana i ngā pito e whā o te whenua, e pupuri ana i ngā hau e whā o te whenua, kia kaua e pupuhi te hau ki runga ki te whenua, kia kaua ki te moana, kia kaua rānei ki runga ki tētahi rākau.

2I kite anō ahau i tētahi atu anahera e haere ake ana i te rāwhiti, i a ia te hīri a te Atua ora; nā, nui atu tōna reo ki te karanga ki ngā anahera tokowhā, i tukua nei mā rātou e mea he kino ki te whenua, ki te moana,

3e mea ana, “Kaua e meatia he kino ki te whenua, kaua ki te moana, kaua hoki ki ngā rākau; kia hīritia rā anō e mātou ngā rae o ngā pononga a tō tātou Atua.”

4Ā, i rongo ahau ki te tokomaha o te hunga i hīritia, kotahi rau e whā tekau mā whā ngā mano i hīritia, nō ngā pū katoa o ngā tama a Īharaira:

5o te pū o Hūrā kotahi tekau mā rua ngā mano i hīritia,

o te pū o Reupena kotahi tekau mā rua ngā mano,

o te pū o Kara kotahi tekau mā rua ngā mano,

6o te pū o Āhera kotahi tekau mā rua ngā mano,

o te pū o Nepetarima kotahi tekau mā rua ngā mano,

o te pū o Mānahi kotahi tekau mā rua ngā mano,

7o te pū o Himiona kotahi tekau mā rua ngā mano,

o te pū o Rīwai kotahi tekau mā rua ngā mano,

o te pū o Ihākara kotahi tekau mā rua ngā mano,

8o te pū o Hepurona kotahi tekau mā rua ngā mano,

o te pū o Hōhepa kotahi tekau mā rua ngā mano,

o te pū o Pineamine kotahi tekau mā rua ngā mano i hīritia.

Te Mano Tini

9Muri iho i ēnei mea ka kite ahau, nā, he mano tini, e kore nei e taea e tētahi te tatau, nō ngā iwi katoa, nō ngā hapū, nō ngā huihuinga tāngata, nō ngā reo, e tū ana i mua i te torōna, i mua hoki i te Reme, he mea whakakākahu ki ngā kākahu mā, he nīkau hoki ki ō rātou ringaringa.

10Nui atu tō rātou reo ki te karanga, ki te mea:

“Ko te whakaoranga ki tō tātou Atua,

e noho nei i runga i te torōna,

ki te Reme hoki.”

11Nā, ko ngā anahera katoa e tū ana i ngā taha katoa o te torōna, i ngā taha hoki o ngā kaumātua, o ngā mea ora e whā; ā, ka tāpapa rātou ki mua i te torōna, ka koropiko ki te Atua,

12me te kī ake anō:

“Āmine!

Ko te whakapai, ko te korōria,

ko te mātauranga, ko te whakawhetai,

ko te hōnore, ko te mana, ko te kaha,

kei tō tātou Atua ake ake! Āmine!”

13Ā, ka oho mai tētahi o ngā kaumātua, ka mea mai ki ahau, “Ko ēnei i whakakākahuria nei ki ngā kākahu mā, ko wai rā? Ā, i haere mai rātou i hea?”

14Anō rā ko ahau ki a ia, “E kara, e mātau ana koe.”

Ka mea mai ia ki ahau, “Ko te hunga tēnei i puta mai i te tūkinotanga nui, ko ō rātou kākahu he mea horoi nā rātou, he mea whakamā ki ngā toto o te Reme.

15Koia rātou e noho nei i mua i te torōna o te Atua,

e mahi nei ki a ia i te ao, i te pō, i roto i tōna whare;

ā, mā tērā e noho rā i runga i te torōna e hīpoki tōna tapenākara ki runga i a rātou.

16Kore ake ō rātou matekai,

kore ake ō rātou matewai;

e kore anō hoki te rā e pā iho ki a rātou,

tētahi wera rānei;

17ko te Reme hoki i waenganui o te torōna hei hēpara mō rātou,

ā, māna rātou e ārahi ki ngā puna wai o te ora;

ā, mā te Atua e muru atu ngā roimata katoa i ō rātou kanohi.”