Heremaia 6 - Maori Bible 2012(MRI2012)

Te Putanga me te Wiwini o te Whakaekenga

1“Putere atu, e ngā tama a Pineamine,

i roto i Hiruhārama!

Whakatangihia te tētere ki Tekoa,

kōkiritia ake he ahi tohu ki Petehakereme.

He kino hoki te titiro mai nei i te raki,

he whakangaromanga nui.

2Ka tapahia atu e ahau te wahine ātaahua,

te wahine whakatarapī, te tamāhine a Hiona.

3Ka haere mai ngā hēpara, me ā rātou kāhui ki a ia;

ka whakatūria ō rātou tēneti ki tētahi taha ōna, ki tētahi taha;

ka kai rātou ki tōna wāhi, ki tōna wāhi.

4“Kia rite ngā mea mō te whawhai ki a ia;

whakatika, kia whakaekea i te poutūmārōtanga.

Auē te mate mō tātou! Kua tāwharara hoki te rā,

kua whakawairua kau anō ngā ātārangi o te ahiahi.

5Maranga, kia whakaekea e tātou te pō,

kia wāwāhia anō ōna whare kīngi.”

6Ko te kupu hoki tēnei a Ihowā o ngā mano:

“Tuaina he rākau,

haupūria ake he pukepuke hei whawhai ki Hiruhārama.

Ko te pā tēnei e whiua;

he tūkino kau tāna i roto i a ia.

7Rite tonu ki te pukenga ake o te wai

o te puna te pukenga ake o tōna kino.

He tūkino, he pāhua te rangona ana i roto i a ia;

kei tōku aroaro tonu te mamae me te patunga.

8E ako, e Hiruhārama,

kei puta kē tōku ngākau ki a koe,

kei meinga koe e ahau kia ururuatia,

he whenua kāhore e nohoia.”

9Ko te kupu tēnei a Ihowā o ngā mano:

“Ka āta hamua mārietia ngā toenga o Īharaira,

ānō he wāina;

kia rite tāu ki tā te kaikohi karepe,

whakahokia iho tōu ringa ki roto ki ngā kete.”

10Ki a wai rā tāku kōrero, tāku whakaatu tikanga,

e rongo ai rātou?

Nanā, he mea kokotikore tō rātou taringa,

tē whakarongo ai rātou.

Nanā, hei tāwainga mā rātou te kupu a Ihowā,

kāhore e arongia e rātou.

11Nā, kī tonu ahau i te riri o Ihowā;

ruha iho ahau i te koromaki.

“Ringihia ki runga ki te kōhungahunga i te ara,

ki te whakaminenga anō o ngā taitamariki, hui katoa;

nō te mea ka hopukia te tāne rāua ko te wahine,

te koroheke rāua ko te tangata kua maha ōna rā.

12Ka riro kē ō rātou whare i ētahi atu,

ngā māra ngātahi anō ko ngā wāhine;

nō te mea ka totoro tōku ringa

ki ngā tāngata o te whenua,”

e ai tā Ihowā.

13“Ko te mea iti ō rātou, ko te mea nui hoki

kei runga i te apo;

ko te poropiti, ko te tohunga,

rātou katoa kei te mahi teka.

14Ko tā rātou rongoātanga hoki

i te mamae o tāku iwi he hanga noa iho;

e kī ana, ‘Ka mau te rongo, ka mau te rongo’;

i te mea kāhore nei he maunga rongo.

15I whakamā rānei rātou i a rātou e mahi ana i ngā mea whakarihariha?

Hore rawa ō rātou whakamā,

kāhore hoki i mōhio ki te numinumi.

Mō reira ka hinga rātou i roto i te hunga e hinga ana;

i te wā e whiu ai ahau i a rātou,

ka whakatakā rātou,”

e ai tā Ihowā.

16Ko te kupu tēnei a Ihowā:

“E tū ki ngā ara, tirohia atu,

uia ngā ara tawhito kei hea te ara pai,

ka haere i reira, ā, ka kite koutou

i te tānga manawa mō ō koutou wairua.

Heoi, e kī mai ana rātou, ‘E kore mātou e haere i reira.’

17I whakatūria anō e ahau ētahi kaitūtei mō koutou, i mea ahau,

‘Whakarongo ki te tangi o te tētere.’

Heoi, e kī ana rātou, ‘E kore mātou e whakarongo.’

18Mō reira, whakarongo, e ngā iwi,

kia mōhio anō koe, e te huihui,

ki ngā mea kei roto i a rātou.

19Whakarongo, e te whenua;

tēnei ahau te kawe mai nei i te kino mō tēnei iwi,

i ngā hua o ō rātou whakaaro;

mō rātou kīhai i whakarongo ki āku kōrero;

ko tāku ture, paopaongia ake e rātou.

20Hei aha te whakakakara i tae mai ai ki ahau i Hēpā,

te kākaho kakara i te whenua tawhiti?

E kore ā koutou tahunga tinana e arongia,

e kore anō ā koutou patunga tapu e reka ki ahau.

21Mō reira ko te kupu tēnei a Ihowā:

Tēnei ahau te whakatakoto nei

i ngā tūtukitanga waewae ki mua i tēnei iwi,

e tūtuki ngātahi ai ngā mātua, ngā tamariki;

ka ngaro te tangata noho tata rāua ko tōna hoa.”

22Ko te kupu tēnei a Ihowā:

“Tēnei te haere mai nei he iwi i te whenua ki te raki,

ka whakaarahia mai anō he iwi nui i ngā pito o te whenua.

23Ka mau rātou ki te kōpere, ki te tao;

he nanakia rātou, e kore hoki e tohu tāngata.

Ko tō rātou reo, ānō kei te moana e haruru ana,

ā, eke ai rātou i runga i te hōiho;

rārangi rawa rātou, me te mea he tāngata e mea ana

ki te whawhai ki a koe, e te tamāhine a Hiona.”

24Kua rongo mātou ki tōna rongo;

ngoikore iho ō mātou ringa.

Mau pū mātou i te pāwera, i te mamae,

me te mea he wahine e whānau ana.

25Kei puta atu ki te māra,

kaua hoki e haere i te ara;

kei reira hoki te hoari a te hoariri,

ā, kei ngā taha katoa te wehi.

26E te tamāhine a tāku iwi, whītikiria te kākahu taratara,

ka takaoriori ki te pungarehu,

hei te tangi ki te huatahi tāu tangi ki a koe,

kia tīwerawera te tangi;

nō te mea kīhai i aha kua tae mai

te kaipāhua ki a tātou.

27“Kua oti koe te mea e ahau hei pourewa,

hei pā kaha, i roto i tōku iwi;

kia mōhio ai koe,

kia whakamātau ai i tō rātou ara.

28He tino nui tō rātou tutū,

ā, ko tā rātou i a rātou e hāereere ana he ngau tuarā.

He parāhi rātou, he rino;

he hunga whakangau kē rātou katoa.

29Kei te kakā te hau o te pupuhi ahi;

kua pau te matā i te ahi,

maumau whakarewa noa te kaitahi para;

kāhore nei hoki te hunga kino kia unuhia atu.

30E huaina rātou e te tangata he hiriwa i paopaongia,

nō te mea kua paopao nei a Ihowā ki a rātou.”