Hakaraia 9 - Maori Bible 2012(MRI2012)

He Whakawātanga ki ngā Hoariri o Īharaira

1Ko te poropititanga o te kupu a Ihowā i te whenua o Hararaka;

nā, ko tōna taunga atu kei Ramahiku.

E whai kanohi ana hoki te tangata

me ngā hapū katoa o Īharaira ki a Ihowā.

2Kei Hāmata anō e tata rā ki reira;

kei Tāira, kei Hairona nō te mea he pā whakaaro nui rawa ia.

3I hangā anō e Tāira he pā kaha mōna,

i opehia e ia te hiriwa, ānō he puehu,

te kōura parakore, ānō ko te paru o ngā waharoa.

4Nanā, mā te Ariki ia e pei,

ka patua hoki e ia tōna kaha i te moana;

ka pau ia i te ahi.

5Ka kite a Ahakerono, ā, ka wehi,

a Kaha, nui atu te mamae, me Ekerono anō;

nō te mea he whakamā tō tāna i tūmanako ai;

ka kore hoki tō Kaha kīngi;

e kore anō a Ahakerono e nohoia.

6Ā, ka nohoia a Aharoro e te pōriro,

ka hātepea atu anō e ahau te whakapehapeha o ngā Pirihitini.

7Ka kore anō i ahau ōna toto i roto i tōna māngai,

me āna mea whakarihariha i waenganui i ōna niho;

nā, hei mōrehu ia mō tō tātou Atua,

ka rite anō ki te kāwana i roto i a Hūrā,

ka rite anō a Ekerono ki te Iepuhi.

8Ka nohoia anō e ahau ngā taha o tōku whare,

hei ārai mō te taua, mō te tangata anō e tika ana nā reira,

mō te tangata e hoki ana.

E kore anō te kaitūkino e tika nā waenga i a rātou ā muri ake nei;

kua kite nei hoki ōku kanohi ināianei.

Te Kīngi e Haere mai mō Hiona

9Kia nui te whakamanamana, e te tamāhine a Hiona,

hāmama, e te tamāhine a Hiruhārama!

Nanā, ko tōu Kīngi e haere nā ki a koe;

he tika ia, he whakaora,

he ngākau māhaki, e noho ana i runga i te kāihe,

i te kūao anō, i te tama a te kāihe.

10Ā, ka hātepea atu e ahau te hāriata o Ēparaima,

me te hōiho o Hiruhārama;

ka hātepea atu anō te kōpere o te whawhai;

mō te rongo mau hoki āna kupu ki ngā tauiwi;

ka kīngi anō ia i tētahi moana ā tae noa ki tētahi moana,

i te awa ā tae noa ki ngā pito o te whenua.

11Me koe anō, nā te toto o tāu kawenata

i ungā atu ai e ahau ōu herehere

i roto i te poka kāhore nei ōna wai.

12Tahuri ki te pā kaha, e ngā herehere, e te hunga e tūmanako ana;

i tēnei rā nei me whakaatu e ahau e rua āku whakautu ki a koe.

13Kua piko hoki i ahau a Hūrā māku,

kua whakakīia te kōpere ki a Ēparaima;

ā, ka oho i ahau āu tama, e Hiona,

ki te whawhai ki āu tama, e Kariki,

ka meinga hoki koe e ahau kia rite ki te hoari a te mārohirohi.

14Ā, ka kitea a Ihowā i runga i a rātou,

ka puta atu anō tāna pere ānō he uira.

Ka tangi hoki te tētere a te Ariki, a Ihowā,

ā, ka haere ia i runga i ngā tūkauati o te tonga.

15Mā Ihowā o ngā mano rātou e tiaki;

ā, ka kai rātou, ā, ka takahi i ngā kōhatu o te kōtaha;

ka inu anō rātou, ka hāmama me te mea nā te wāina;

ka kī rātou ānō he peihana,

ānō ko ngā koki o te āta.

16Nā, ka whakaora a Ihowā, tō rātou Atua,

i a rātou i taua rā, me he kāhui nō tāna iwi;

ka rite hoki rātou ki ngā kōhatu o te karauna,

maiangi rawa i runga i tōna whenua.

17Nā, koia anō tōna pai, koia anō tōna ātaahua!

Ka tupu ngā tama i te wīti,

ngā kōtiro i te wāina hou.