Hoera 1 - Maori Bible 2012(MRI2012)

1Ko te kupu a Ihowā i puta mai ki a Hoera tama a Petuere.

He Tangi mō te Urupatu o ngā Huanga Kai

2Whakarongo ki tēnei, e ngā kaumātua,

kia whai taringa, e ngā tāngata katoa o te whenua.

I ō koutou rā rānei tēnei,

i ngā rā rānei o ō koutou mātua?

3Kōrerotia taua mea ki ā koutou tamariki,

mā ā koutou tamariki anō hoki e kōrero ki ā rātou tamariki,

ā, mā ā rātou tamariki e kōrero ki tētahi atu whakatupuranga.

4Ko te toenga a te whangawhanga

pau ake i te māwhitiwhiti;

ko te toenga a te māwhitiwhiti

pau ake i te tātarakihi;

ā, ko te toenga a te tātarakihi

pau ake i te moka.

5E ara, e te hunga haurangi, e tangi;

auē, e ngā kaiinu wāina katoa,

ki te wāina hou;

kua whakakorea nei hoki mā ō koutou māngai.

6Kei te haere mai tētahi iwi ki tōku whenua,

he kaha, e kore e taea te tatau;

ko ōna niho he niho raiona,

he niho pūrākau ōna nō te raiona kātua.

7Kore ake i a ia tāku wāina,

ko tāku piki tīhorea ake e ia;

poto rawa te peha i a ia, ākiri rawa;

ko ōna manga meinga ana kia mā.

8E tangi, kia rite ki te tamahine kua oti te whītiki ki te kākahu taratara,

e tangi ana ki te makau o tōna tamāhinetanga.

9Kua whakakāhoretia te whakahere totokore me te ringihanga

i roto i te whare o Ihowā.

Kei te tangi ngā tohunga,

ngā minita a Ihowā.

10Kua hē te māra,

kei te tangi te oneone;

nō te mea kua mate te wīti,

kua maroke te wāina hou,

kua kahakore te hinu.

11Kia whakamā, e ngā kaingaki whenua;

auē, e ngā kaimahi wāina,

mō te wīti, mō te pārei;

kua kore nei hoki ngā hua o te māra.

12Kua maroke te wāina,

kua pūtokitoki te piki;

ko te pamekaranete, ko te nīkau, ko te āporo –

ko ngā rākau katoa o te whenua, kua maroke;

kua maroke nei hoki te koa

i roto i ngā tamariki a te tangata.

He Karanga ki te Rēpenatā me te Īnoi

13Tātua i a koutou ki te kākahu taratara, e tangi, e koutou e ngā tohunga;

auē, e ngā minita o te āta.

Haere mai, hei te mea taratara he kākahu mō koutou i te pō,

e ngā minita o tōku Atua.

Kua kore nei hoki te whakahere totokore

me te ringihanga i roto i te whare o tō koutou Atua.

14Whakatapua he nohopuku,

karangatia he hui nui.

Whakaminea ngā kaumātua,

ngā tāngata katoa o te whenua,

ki te whare o Ihowā, o tō koutou Atua,

ka karanga ki a Ihowā.

15Auē te mate o taua rā nei!

Kua tata hoki te rā o Ihowā,

ka rite hoki tōna putanga mai

ki te whakangaromanga a te Kaha Rawa.

16He teka ianei kua hātepea atu te kai

i mua atu i ō tātou kanohi,

āe rā, te koa, me te whakamanamana

i roto i te whare o tō tātou Atua?

17Kua pirau te purapura i raro i ngā pōkurukuru;

kua takoto kau ngā whare kai,

kua pākarukaru ngā whare wīti;

nō te mea kua ngingio te wīti.

18Anō te auē o ngā kararehe!

Raruraru ana ngā kāhui kau

i te kore wāhi kai mā rātou;

āe rā, ko ngā kāhui hipi he noa iho.

19E Ihowā, ka karanga ahau ki a koe.

Kua pau hoki i te ahi

ngā wāhi kai o te koraha,

kua wera i te mura

ngā rākau katoa o te pārae.

20Āe rā, kei te tangi hoki ngā kararehe o te pārae ki a koe;

nō te mea kua maroke ngā awa wai,

kua pau hoki i te ahi

ngā wāhi kai o te koraha.